السلام عليكم اخواني /اخواتي

انا اشتغلت بشركة لمدة 5 ايام وجاني عرض افضل براتب اعلى وبمكان نفس حي البيت !
كلمت المديرة قالت طيب تدفعين 3 الاف + تقعدين اسبوعين
اخواني انا اعرف انه خلال فترة 3 شهور مافيه شهر الانذار ولا ادفع لهم شيء صح ؟
مع العلم ان بالعقد مذكور اني ادفع 3الاف ولم يتم ذكر الفترة التجريبية ؟؟ هل علي شيء لأنه مذكور بالعقد او لا لان قانون وزارة العمل يجبر على فترة الثلاث اشهر !

لمّا قلت للمديرة انا في فترة تجربة هددتني قالت بتدخلين بقضيه بتستمر سنه وماراح احذف اسمك من التأمينات
شورو علي مهمومه ! خصوصا دوامي الثاني لازم اداوم بكرا خلاص والا بيدورون غيري

ملاحظه؛ اول يوم وقعت العقد كان مذكور فيه الفترة التجريبية ثم بعد يومين جاتني المديرة وجابت عقد جديد قالت وقعي هذا الاول غلط
قريته نفس الاول بس اللهم شالت الفترة التجريبية !

وش الحل الله يعافيكم انا مالي الا 5 ايام مداومه فقط

الملاحظه الثانيه اول ماوقعت العقد قالت لي فيه موظفات يوم دخلت اكتشفت انا الموظفة(الوحيدة) بقسم النساء وقسم الرجال فيه2
مرات المديرة تطلع بدري او ماتداوم مايبقى الا انا بقسمي (قسم النساء) وهم بقسهم صح انه مفصول لكن اقعد ارتجف والله من الخوف

شورو علي

الله يعينك في أي مدينة إنتِ ؟

الله يعينك اختي و يفرج همك طيب قوليلها بجيب أحد مكاني و انا اشوف هذا افضل حل لانها معتمده عليك انتي فقط ع حسب كلامك اتمنى تلاقي لك حل و الله يكتبلك الي فيه خير

اذا لديك نسخة من العقد الاول قدمي استقالتك وتجاهلي العقد الثاني غير قانوني
واذا تم الغاء العقد الاول واعتمدي العقد الثاني قدمي استقالتك واذكر سبب الاستقالة انك مو مرتاحة بالعمل لبيئة العمل
وهذ حق لك لأنك بفترة تجربة واوعديهم بدفع الغرامة بعد وتقدرين تأخذين اخلاء طرف وتستبعدين من التأمينات فورا
اتمنى لك التوفيق

اول شي : هالمديرة استغلاليه والدليل خلتك توقعين عقد ثاني وعدلت فيه باين تلعب بذيلها ..

ثاني شي : هدديها انك راح تفضحينها بالمنتديات وبوسائل التواصل عنها وعن شركتها إذا ما أخلت طرفك بإحسان..

يمكن شافتك ضعيفة شخصية عشان كذا قلت استقوي عليها .. بعدين لاتقولين لها انك لقيتي عمل افضل .. اكيد انها راح تغار وتتمسك فيك ..

بيني لها ان وراك ظهر وانها ماتقدر ترفع لاقضيه ولاغيره .. وقولي انا في فترة تجريبيه ماتقدري تمنعيني من ترك العمل ,
قولي مو مرتاحه بشركتك .. انا لوحدي مقدر اكمل .. بيني ان عندها عيوب عشان تخاف تفتحين العيون عليها

المهم لاتخليها تدوس لك طرف ولاتعطينها مجال تستقوي عليك ..

ومن جد ابي اعرف من هي وش شركتها عشان لانطيح بين يدينها الله يستر علينا ..

اختي انا جتني نفس مشكلتك توظفت في شركه شهر ولا شالو اسمي من التامينات رحت التامينات وشالوه لي
انتي روحي التامينات وراح يشيلونه لك بدون مايخاطبون الشركه

أختي نظام العمل والعمال يكفل لك الحق بترك العمل خلال فترة التجربة دون ارغامك على ابلاغ الشركة في حال تركتي العمل
اما غرامة وهذا الكلام فهو ماهو الا وسيله للظغط على الموظفين علشان مايستقيلوا والا اذا جا الجد واشتكيتي على مكتب العمل اتحداها تقول لهم انها غرامة او اي كان اسمها والمفروض من اول ماتوقعي على شئ الا لما تفهمين هل هو نظامي ومن حقك وشئ منطقي والا لا
نصيحتي اذهبي لعملك الجديد وخليهم يسجلونك في التامينات ولا عليك فيها

ربنا يوفقك
صممت الغروب

الله يكون في عونك ماهي احسن من مديرنا

مافي شي اسمه غرامه فيه شرط جزائي

خذي صورة العقد اللي معاك واسألي في مكتب العمل عن وضعك
وبالنسبه للشركة الثانيه عطيهم خبر ان الشركة السابقه بيتأخرون في حذف اسمك من التامينات وداومي اول شهر بدون التسجيل في التامينات
هذا اذا كانوا متعاونين معاك

كن مع الله ولا تبالي