كل الشكر والتقدير على المساعدة والله يجزاكم خير الجزاء ويحقق لكم أمانيكم ....

يا اخوان طحت في مقابلة شرسه مع اثنين مدري بشنو اوصفهم لكن عدت على خير ....

اول ما دخلت قلت السلام عليكم قال وعليكم السلام قال لي خذ هالموية وروح جيب لي عصير

وجبت له عصير وقلت له تفضل قال لي لف حول الجدار مرتين قلت طيب ولفيت ورجعت له قال

اللي معه لا لف حول الكرسي مرتين ورحت لفيت ورجعت وجلست على طول قال انا ما قلت لك

اجلس قوم وقمت وقفت شوي قال اجلس وجلست قال شسمك وقلت له اسمي قال وش لون الجدار

اللي وراك !!!!!! قلت لونه ابيض قال لي لا مو ابيض قلت الا ابيض قال متاكد قلت ايه قال لا مو ابيض

والتفت للجدار ولا هو ابيض قال الي بجنبه ليه تلتفت منت واثق من نفسك قلت له الا واثق من نفسي الحمد

لله قال لي طيب ليه تطالع وراك قلت لانه يقول لي مو لونه ابيض ابتاكد وعيونه مثل عيون ابليس شوي بياكلني

قال لي تعرف بنات قلت له لا قال ليه مو انت شباب قلت له الدين ما حثنا على المصاخه . قال طيب

انمسكت بالشرطه قلت له لا قال احد من اهلك انمسك قلت له لا قال لي وش فيك مرتبك ومتوتر قلت له

الحمد لله انا تمام مافيني شيء .. قال لي اللي جنبه كم جوال بجيبك قلت له واحد قال متأكد !!!!

قلت ايه متاكد ما باقي يسألني كم سروال لابس ...؟؟؟

وش رايكم يا أخون في هالأسئلة اللي سارت معي وأسلوب المقابلة طبيعي ولا هم يتمنذلون ؟؟

قالي خلاص نتصل عليك الله يوفقك قلت لهم وياكم وشاكرين لك التحمل والصبر قلت لهم العفو !!!!!

ههههههههههههههههههههههههههههههههههههههههههههههههه
أكيد اللي قابلوك مطاوعه

شفت أمس صورهم بالموقع , وشكلهم فلّه

عموماً اللي صار معاك ممتاز جداً
1- أخذت على جو المقابلات
2- تحملت وصبرت على طلباتهم الغريبة ولم تتصرف بتهور وكذلك رديت على أسئلتهم المستفزه
3- جتك أسئلة لم تتوقعها وتصرفت معها بشكل جيد

بس اللي ما نعرفه هل إنت مقدم على وظيفة خدمات عملاء أو سنترال أو استقبال أو فيها مقابلة للجمهور؟ لان بالعادة مثل هذه الاشياء اللي تصير تكون لمثل هذه الوظائف على الأغلب

وبالتوفيق ان شاء الله لك

وظيفه تسويق أو تمويل ... الله ييسر ويعين ...

وش يحس به ذا
طلاب الكليات العسكريه وانا كنت منهم مايسوون معهم الحركات ذي
فكيف بشركه