شدو حيلكم وراجعو اللغه كويس انا الحمدلله من اللي انقبلو في اول دفعة

بسم الله والصلاة والسلام على رسول الله

راح اتكلم عن عدة نقاط :

1_ صراحه الخطوط بالذات ماكنت حاط في بالي اني اتوظف فيها لان الفكرة السائدة في المجتمع ان الدعوه واسطات حتى اهلي واصحابي كانو يقولو لاتتعب نفسك الخطوط ماهي لك المهم قلت اجرب لاني طفشت من الوظائف الحكوميه والواسطات اللي عيني عينك وعلى ايش عاد راتب يسد النفس المهم شيل من راسك ان الدعوه واسطات لاني دخلت الوظيفة بتوفيق من رب العالمين

2_لما تعبي الابليكيشن في الموقع حيرسلو رساله بعد فتره يحددو فيها مكان اختبار اللغه الانجليزية والمكان اللي حتختبر فيه انا طبعا تخرجت من الكلية ما افك كلمتين انجليزي فجلست سنه في البيت ع اللابتوب احاول اتعلم والحمدلله سلكت اموري صرت كاني خواجه ههههههه المهم اختبرت بجده في المعهد المهني الصناعي اللي في الفيصلية طبعا الاختبار كان عبارة عن عدة صفحات وجميع الأسئلة اختيارات ومتعمقين في قواعد اللغة انا بالنسبة لي اشوف الاختبار سهل لاكن لازم تراجعو كويس لان في دفعتي كانو في شباب معاهم بكالوريوس وماجستير وخريجين لغة انجليزية ومبتعثين تخيلو عدد اللي قدمو 22000 واخذو بس 60 واحد.

3_إذا اجتزت الاختبار حيرسلو رساله مفادها انك اجتزت الاختبار بنجاح وينبغي عليك الحضور للمقابلة الشخصية في اليوم اللي راح يحددوه مع بنطلون وقميص وترى اللبس مهم ياجماعه وياحبذا لو تلبسون كرفته
طبعا لما توصلك الرساله حتطير من الفرحه وتخم اللي جنبك زي ماعمل صاحبكم اللي هو انا ههههههههههه

4_قبل اللمقابلة تدخل على غرفة الطول والوزن اذا كنت اوفر ويت حيقولو لك مع السلامه و اسئلة المقابله الشخصية اسئلة عامه تتكلم عن نفسك ويسئلونك اسئله صراحة مو فاكرها بس ممكن يقولك امشي قدامنا نشوف مشيتك ولازم ينتفك بسؤال يشوف انت تعصب ولا لا مثال ليش خشمك كبير ههههههههههه

5_بعد المقابله باسبوع تقريبا حيرسلو رساله كشف طبي طبعا حيكشفو عليك من راسك الين رجولك وحتتذكروني لما تعملو الكشف الطبي ويرسلوك لدكتور نفسيه يشوف نفسيتك كيف لاتفصل على الركاب

6_ادا امورك كلها تمام في الكشف الدكتور حيكتب لك fit ادا شفتو هالكلمه اعتبرو انفسكم موظفين رسميا

7_بعدها حتبدأو تدريب لمدة 7 شهور مقسمه على لغة انجليزية ودورات اداريه وخدمه جوية وسلامة وامان وبعدها تبدأو بالرحلات والرواتب السنعه ههههههههههه

نرجع لطبيعة عمل الوظيفة
اتكلم من وجهة نظري ان هالوظيفه افضل وظيفة ممكن تشتغل فيها تسألوني ليه:
1_ مافيها روتين يعني ماتصحى كل يوم الصباح وتحمي السيارة في البرد وقروشة زحمة السيارت والناس قافله اخلاقها
2_قبل كل شهر ميلادي تنزل الجداول اللي فيها الرحلات وتختار الرحلات اللي تبيها وهل تبي تنكرف ولا تبي تريح لان في بعض الجداول فيها مايقارب 17 يوم اوف يعني كانك عاطل ههههههههههه
3_ لما تطلع الطياره يكون فيه عليك مدير اللي هو السوبر فايزر لنفترض ان كانت اخلاقه سيئه فحتقول في نفسك
خلني اصبر الين تنتهي الرحله وبعدها ماحشوف وجهه. ممكن تطير معاه بعد اسبوع او شهر او سنة او سنتين المهم ان الجميل في الموضوع ان كل رحله معاك سوبر فايزر مختلف.
4_طبعا النظام في الطيران تقريبا مثل العسكريه يعني انت لك الاقدميه حتاخذ افضل جدول
5_كل ماتطير اكثر راتبك يزيد يعني بيدك ترفع راتبك او تنزله طبعا ماحقول لكم راتبي عشان الحسد ههههههههههه
6_الشغل ممتع جدا ويزيد من ثقافتك ومن لغتك
7_ بالنسبه لي الاشياء اللي تضايقني في الوظيفه انو يجيك احساس ان الطيران اشغلك عن اهلك وناسك
وبعض الرحلات تكون على وقت صلاة الجمعه فما يمديك تصلي او تكون على وقت مباراة
مثلا اليوم انا عندي رحله جده تبوك تبوك جده على الساعه 7:30 يعني
ماراح اشوف مباراة المنتخب ولا ننسى انو بالنسبه للمتزوجين احيانا تكون صعبه عليهم
لانو في رحلات تاخذ اربع ايام وخمس ايام فلازم تحسبو حساب هالشي مع ان اصحابي
المتزوجين ماعندهم اي مشكلة ويقولو افضل عشان ترجع البيت وام العيال مشتاقة لك لانو لو مقابلين بعض كل يوم
حتبدأ المشاكل والجميل انو ادا كانت الرحله خارج السعوديه تقدر تاخذ زوجتك معاك

اهداء للاخوان اللي قدموا موقع يقدم اختبار تجريبي يحدد مستواك العام بالانجليزي وفيه اكثر من اختبار لكل مستوى

لكن لاتعتمدوا عليه مره ,

http://www.englishjet.com/english_co...test_level.asp

انا اقترح لكم هدا الموقع جميل جدا وحتتعلمو منو الكثير

www.engvid.com

Gotta work hard just to ***** what you desire

All the best to you guys