[align=center][/align]بسم الله الرحمن الرحيم
حبيت اطرح موظوعي للأسف انا مسؤول توظيف في احد الشركات

طرحة موظوع توظيف وفعلا استلمت ما يقارب 50 سيرة ذاتية طبعا العدد كان اكبر
بس بعض المتقدمين الله يصلحهم مايرسل سيرة ذاتية بس اسم وعمر ورقم جوال ونسو إن السيرة الذاتية اول إنطباع.
ثانيا بدينا نفرز ونشوف علا حسب الوظايف المطروحة وفعلا تقلص العدد لي 20 سيرة ذاتية

بدينا نتصل علا الناس مارد علينا إلا 10 واثنين اعتذرو صار المجموع النهائي 8

المؤسف والمحزن في الموضوع إن 8 اشخاص قالو بنجي وما جا إلا واحد !!!!
فحبيت إني اطرح الموضوع عشان الناس تفهم ليش الشركات تفظل الأجانب على ابن البلد لأن ابن البلد خان البلد .

ملاحظة انا حبيت اطرح الموضوع لتعم الفائدة وانا لا اعمم علا الجميع بالعكس هناك كثير من عيال البلد مجتهدين ويصبرون ووصلو لمراتب عالية

القطاع الخاص اذا كان الراتب مقبول
ماراح يتوظف فيه الا المجتهد والطموح او المحتاج فعلاً لمصروف ويعيل أسرة
اغلب الناس الان تركز على الوظائف الحكومية لان فيها استقرار وظيفي افضل من الشركات
حتى لو كانت وظيفة عسكرية
على كثر مااشتغلت بالشركات ماقد شفت سعودي مجتهد الا واحد والله ياجماعه انه يداوم بثوب نظيف واذا جاء نهاية الدوام انواع الغبار والحبر على ثوبه من الكرف لانه محتاج للوظيفه ويعيل اسرة ومصاريف مدارس لاخوانه الصغار مع ان ابوه عايش بس هو الاخ الكبير لكن كان في قمة النشاط بدأ معنا براتب 4200 بعد 9 شهور تقريباً تدرج في كذا وظيفه خلال اقل من سنة
الان ماشاء الله مستقر في بنك بالادارة العامة
ومرتاح وراتبه اعلى من 10 الاف
الله يزيده ان شاء الله
احياناً الموظف ممكن يصبر على معاناته في الوظيفه اذا كان الراتب عالي ويستاهل
بس اغلب الشركات راتبها قليل ومتعبه مستحيل احد يصبر فيها

تحياتي

طبعا الواحد مايجية الشي باردة مبردة بالعكس الواحد يبدا بي 4000 ولا يقعد في البيت
انا بديت 4000 امين مستودع بعد سنتين مدير مستودعات 6500 وبعدين طلعت من الشركة
والحين 7500 الحمدلله واتمنا من كل شاب طموح الصبر وما يعلق حياته علا وظيفة حكومية ما تدري الله وين كاتبلك الخير وعسا ان تحبو شيأ وهو شر لكم

والله ما فيه مصداقية من الشركة ولا المرشح
ولا فيه جهات توفر لك الموظف بالمتطلبات التي ترغبها وتعمل لك برنامج مقابله ما عليك الى تجي وتجد كل شيء جاهز

عبدالله سالم .. وش تقول طيب فيني

انا قدمت على ثلاث وظايف وكلهم دقو علي مقابله شخصيه ..وقالو ندق عليك ..ووواحد منهم قال الاسبوع الجاي اكلمك,,, ولا شفت أي اتصال .مين الي خان الثاني

وبعضهم يقولك راتب مغري.. تلقاه اخر شي 3500 او 4000 . هل ترى هذا الراتب يكفي الشخص الي توه بيبدا حياته من ناحية زواج او سياره والخ !!

عشان هالكم سيرة اللي جتك صار ابن البلد خاين للبلد؟؟؟؟!!!!

ترا الكلمة كبيرة على فكرة ولاهيب سهله بعدين شركتكم الموقرة ماتمثل البلد يوم أن عدم الرغبة

فيها يعتبر خيانة للبلد عموما الله يملي شركتكم بركة الأجانب روحوا دوروهم تراهم طاهرين نازلين من السماء ولا يخونون ولاشيء

بالعكس احنا نسميهم ذوي الهمة والذمة !!

معليش بس الموضوع استفزااازي بالدرجة الأوووولى.

اخي شركتكم بالشرقية ؟؟؟
اذا بالشرقية عطني مسميات الوظائف وانا خريج ثانوي عشان ابي اقدم