السلام عليكم

أخواني وأخواتي اعضاء منتدى البطالة ..
أريد منكم حلاً لمشكلتي التي تعبت منها واستخرت في أكثر من أمر لحلها ومازلت مترددة قلت لابد من الإستشارة

أنا موظفة براتب قريب للـ 10 الاف ولله الحمد , وأموري كانت ماشية تمام لين فجأه انقلبت حياتي فوق تحت
قبل 3 سنوات احتجت لعملية جراحية والمستشفيات الحكومية معطتني موعد بعد مايقارب السنتين فـ اضطررت لأخذ قرض من البنك لعملها بمستشفى خاص وكلفت مبلغ وقدره وفشلت العملية !
وأضطررت لإعادتها والحمدلله - لم تكن بالنجاح المطلوب ومازلت أعاني من هذا الأمر لكن أفضل من انتيجة السابقة الحمدلله -
وصار عندي ظرف عائلي واضطررت لإكمال مبلغ القرض لإخراج نفسي من هذه المشكلة
طواال هذه السنوات الثلاث أصبح راتبي كللللله للديون والأقساط والسلف والفيزا والجمعيات مايبقى لي منه شي
راتبي مايكفي شي ويالله اشتري حاجاتي الأساسية واحيانا ماتكفيني
من 3 سنوات وانا مااعرف اسواق ومطاعم واجتماعات كله بسبب الماده
تدهورت نفسيتي جدااااااااااا فالمرء لا بد له من ترفيه لو بالقليل لكن اذا بشتري شي لنفسي اتحسف واقول لو شريت ماراح اقدر اشتري شي ضروري او اسدد جوالي - مع ان فاتورتي ماتزيد عن 300 لكن تمر علي شهور مااقدر اسددها فيها ! -
ما أقول الأمر للشكوى لكن علشان أوضح لكم حجم المأساة الي أعيشها مع ان الي يشوفني موظفة وبراتب عالي وماعندي مسئوليات من زوج وأطفال مايصدق اني ماعندي يحسبني بخيلة !

نجي للمهم وهو الي ابيكم تشيرون علي وخصوصا الي عندهم خبرة بالعقارات والأمور هذي
فكرت للخلاص من هذه المشكلة في اخذ تمويل عقاري لاشتري به استراحة واخذ تمويل زياده لكي أغطي باقي ديوني
يعني مثلا الاستراحه بـ 500 الف , انا اخذ من البنك 500 الف + 300 الف الديون واتفق مع صاحب الاستراحة انه يقول الاستراحه بـ 800 الف ويصير كذا قسطي واحد وهو 6 الاف ريال, على الاقل اقدر اثبت على شي ويبقى لي شي من الراتب ..
وبنفس الوقت أأجر الإستراحة تأجير يومي واستفيد ..
لكني متخوفة من موضوع القرض اخاف اخذه واتوهق أكثر أو أحتاج مبلغ لأي ظرف طارئ لا سمح الله ومايصير عندي أي مجال لأي قسط أو تمويل خلاص استنفذت الحد الأعلى !


شرايكم اقدم على هذه الخطوة أو لا ؟
وهل عندكم حلول لهذه المشكلة التي أرقتني وماعرفت كيف أخلص نفسي منها ؟

وجزى الله كل من يرد خير الجزاء ..

اولاً اسأل الله العلي القدير ان يفرج همك ويقضي دينك وان ينزل لك الشفاء العاجل
ثانياً من الخطأ قضاء الدين بدين
ثالثاً الحل كل الحل في العودة الى الله وطلب البركه منه سبحانه
من خلال المحافظة على الصلاة في اوقاتها وقراءة الاذكار بانضباط
وكثرة الاسغفار
قال تعالى ( فقلت استغروا ربكم انه كان غفارا يرسل السماء عليكم مدرارا ويمددكم باموال وبنين ويجعل لكم جنات ويجعل لكم انهارا)
رابعاً التفكير المكتوب
بعني الجلوس جلسه خاصة بالميزانيه الشهريه
وكتابة الطلبات الضروريه ووضع الميزانيه الخاصه بها
ووضع خطه لتوفير القسط القادم من الراتب الحالي
وهكذا حتى يتم تاسيس مبلغ جيد يمكن زيادته مع الوقت
خامساً محاوله البحث عن زيادة الدخل من خلال تجهيز وجبات في البيت
اعرف كثير بيوت ما تجد الوقت الكافي للطلبات
هذا ما تبادر لذهني للمساهمه في الحل
وتقبلي تحياتي

الله يكون بعونك ويفرج همك يارب
اقترح عليك تصبري وتسددي ديونك أول بأول لحد ماتخلصيها
بعدين تبدين بالاستثمار
لانه اعتبره تهور تبدين مشروع وعليك ديون كثيره
اذا تبين تقتصدين بالمصاريف لاتشتري الا الاشياء المهمه اللي تحتاجينها يومياً
بتضغطين على نفسك صح لكن بترتاحين بعدين
بالتوفيق

يوووه الله يفرجهاااا عليييييك ويشفييك ويعافييك يااارب

أعرف أشخاص يفكرون هالتفكير أنهم ياخذون دينه كبيرة والتسديد يكون لشخص وااحد وبمبلغ محدد

بس مدري للحين أحسهم مترددين أسأل الله أن يفرجها علييك وعليييهم وعلى كل مديوووون الدييين صعععب

ويكسسر الظههر بس ماعلى الله شيء بعيييد الله يسخر لك ويوفي عنك يااارب ويكتب لك الشفاء والعافية

أعتذر ماأفدتك برأي لأن مالي علم بهالأمور بس ماحبيت أطلع قبل ما أدعي لك ^_^.

نصيحه لاختنا ولكل الاعضاء الكرام
اذا درست امرً ما
وقررت اي قرار
قبل التنفيذ عليك بصلاة الاستخارة
فيها خير عظيم
ووالله الذي لا اله الا هو
اني وجدت خير كثير من خلال الاستخارة
لاني لا اعمل عمل الا بعد صلاة الاستخارة
ركعتين ودعاء لا اتاخذ ٥ دقائق
تحياتي للجميع

وعليكم السلام ورحمة الله وبركاتة

اختي : اصبري وان شاء الله تفرج ..... الحين الاهم انك تسددين ديونك "

وبعدها تفتحين صفحة جديدة وبراحة نفسية لتخطيط للمستقبل ..

عموم الله يوفقك ويرزقك ويفرج همك ............بالتوفيق

اختي مالك غير تصمدين هالفترررة لين تبدا تخف الديووون بعدها حاولي تجدين دخل إضافي

فيه بنات اشوفهم يشتغلون بالتسويق الإلكتروني لكني والله ما اعرف طريقته اسالي و ابحثي عنه لعل الله يكتب لك فيه الفرج

هونيها وتهون ,, اول شيء انصحك تكتبين معروض للمسؤولين.. وهي انك تكتبين خطاب باللي صار معك وترسلينها برقية للملك ولوزير الصحة ولولي العهد وأمير الرياض ,, وترفقين اوراق المستشفى واوراق البنك .. وان شاء الله بيفيدونك ..
وثاني شيء : اذا نزل الراتب اكتبي كل مصروفاتك بورقة , لو بريال اكتبيه وشوفي اخر الشهر وش مصروفات المهمة والغير مهمة ..
والشهر اللي بعده بتعرفين وش تصرفين وش اللي ما راح تشترينه
وانا متأكد ان حالك بيزين ,, لأني مريت بهالحالة من زمان والحمدلله طلعت منها
وبالعكس استفدت منها اني عرفت وشلون اتصرف بفلوسي حتى بعد ما خصلت من ديوني ,,
والحمدلله الحين عندي محل وافكر افتح المحل الثاني .. وكل اجازة اسافر لديرة ,, الحمدلله
فيه شخص له مقاطع باليوتيوب حلوة مررة بخصوص هالشيء ,, اسمه سلطان العثيم وله كذا مقطع ,, انصحك تتابعينه .
وانصحك تتبرعين شهريا لو بمبلغ بسيط (250ريال) ككفالة يتيم لجمعية انسان من خلال حسابك بالنت بدون اي تعب

بس فكرة انك تاخذين قرض عقاري لا والف لا ,, الا بعد ما يكون عندك دخل ثاني
لأن القروض العقارية تسديدها يستمر لسنوات طويلة .
الله يوفقك ويرزقك ..

اخ جيتي ع الجرح
عندي وعندك خير
عايشة نفس الماساة
واصرف على عيالي بعد

بالدعاء تنفتح كل الابواب المغلقة

الله يسهل امرك ويفرج همك