[align=right]/



- هلا بك يالغلا (طموح آخر) ، والله يعطيك العافية على تفاعلك. كلامك صحيح ولكن أبشرك المعاملة لا تدخل مجلس الجامعة ولكن تُوقع فقط من قبل مدير الجامعة تفويضاً عن المجلس ، لأن مجلس الجامعة يعتبر أعلى مجلس ويترأسه وزير التعليم العالي نفسه ، فما عندهم وقت يناقشوا معاملات صغيرة مثل تعيين المعيدين ولجل كذه تم تأسيس لجنة دائمة معنية بهالأمر ، فطالما اللجنة أوصت بك كمرشح فليس على مدير الجامعة إلا التوقيع فقط مثل ما قلت نيابة عن المجلس وهالشي ياخذ من 3 إلى 4 أيام ولو أنت أخذت معاملتك بنفسك لمكتب المدير رح تخلصها ف نفس اليوم. ، لأن هذا الي صار معي. وهذا رابط أرفقته لك ( بند 6)

http://uqu.edu.sa/page/ar/141

- وهذا خط مسار المعاملة بالضبط من تجربة شخصية.

بعد المقابلة الشخصية يتم الإتصال بكم لإبلاغكم عن ترشيحكم كـ مرشح أساسي للوظيفة. بعد كذه يتم عرض معاملتكم على مجلس القسم وبعد موافقة مجلس القسم يتم عرضه على مجلس الكلية وبعد موافقة مجلس الكلية يتم إرسال محضر الإجتماع إلى مدير الجامعة للمصادقة عليه. في هذه الأثناء يتم مراسلة عمادة شؤن أعضاء هيئة التدريس لحجز الوظيفة بإسمكم. بعد ما يرجع المحضر من مدير الجامعة وبعد ما ترسل العمادة خطاب لتأكيد حجز الوظيفة بإسمكم ، يتم إرفاق هذه الورقتين في ملف معاملتكم وتبدأ ترسلها الكلية إلى اللجنة الدائمة. كذه الكلية خلاص سوت الي عليها وهذا الإجراء يأخذ تقريباً من شهر إلى شهر ونص.

- بعد ما توصل معاملتكم إلى اللجنة الدائمة. يتم توقيعها أولاً من وكل الدراسات العليا ومن ثم تحول إلى سكرتارية اللجنة ، يقوم السكرتير بالتأكد من جاهزية معاملتكم وإنه مافي شي ناقص (وهنا انتبهوا لو الكلية ارسلت أوراقكم ناقصة كذه رح ترجع أوراقكم مرة ثانية للكلية وهذا يكلفكم وقت وتأخير ، لجل كذه يفضل إنكم تتأكدون من جاهزيتها) ، بعد ما يتأكد السكرتير إن كل أوراقكم كاملة هنا يتم عرضها على أقرب موعد إجتماع للجنة. طبعاً اللجنة اش تسوي اش دورها هنا يعني ، تجلس تتأكد من معدلكم ومن درجاتكم ومن عدد أعضاء هيئة التدريس بكليتكم وتتأكد من كل شي يعني فعلاً يتم فتح ملفكم ودراسته دراسة كاملة. إذا كل شي تمام خلاص تبدأ اللجنة توافق عليكم ويتم عمل محضر للإجتماع ويرسلوه لمدير الجامعة للمصادقة عليه. بعد ما يرجع المحضر من المدير يرفقوه مع معاملتكم ويرسلوها لعمادة شؤون اعضاء هيئة التدريس. هذا الإجراء ياخذ تقريباً شهر ونص إذا كانت أوراقك كاملة.

- أول ماتوصل أوراقك لعمادة شؤون اعضاء هيئة التدريس ، يبدأ يجيك أول اتصال ، فلان الفلاني تعال عندنا عشان تعمل الكشف الطبي وكشف السموم. تاخذ الكشف الطبي وتروح للإدارة الطبية الي بالعزيزية وبعدين تروح لمعمل السموم ف جرول ، تخلص كل أمورك ولو كنت محظوظ تخلصها بيومين. بعد ما تعطي العمادة نتائج فحصك واذا كل شي تمام ، تبدأ العمادة بإرسال أوراقك كاملة مع الكشف إلى مدير الجامعة لإصدار قرار التعيين. وهنا نقطة الاختلاف ، هنا أوراقك ماتحتاج تدخل مجلس جامعة بقدر ما تحتاج إلى توقيع من المدير فقط لاغير ، لأن سبق ودرستها اللجنة فما له داعي يرجعوا يدرسوها مرة ثانية في مجلس الجامعة. هذا الإجراء مايطول ياخذ اسبوعين بالكثير.

- بعد كذه يقوم مكتب المدير بإرسال أوراقكم مرة أخرى إلى عمادة شؤن اعضاء هيئة التدريس لإصدار القرار التنفيذي. يدقوا عليكم العمادة يقولوا لكم يلا خلاص روحوا كليتكم باشروا. هذا الإجراء ياخذ أقل من 4 أيام.

- تروحوا لكليتكم وتباشروا وتعبوا ورقة المباشرة وترجعوا تعطوها للعمادة ، لجل بعد كذه ترسلها العمادة للخدمة المدنية ووزارة التعليم العالي.


- يفضل تراجعوا معاملتكم بنفسكم وتحركوها لأن أحيانا تجلس مجمدة في مكتب من المكاتب ومحد داري عنها. وبالنهاية بالتوفيق لكم وللجميع ^^[/align]

يعطيك العافيه اخوي تركي وفيت وكفيت
والله يكتب لنا جميعا الي فيه الخيره الطيبه

السلام عليكم ورحمه الله وبركاته
ابارك لجميع المرشحين الله يوفقكم
واللي ماترشح الخيره فيما يختاره الله
اخواتي واخواني
كليه التربيه الي الان لاحس ولا خبر
متي ينزلون موعد المقابله الشخصيه
او انهم الغو التوظيف عندهم ؟!!

جزاكم الله خير على المعلومات الرائعة ..
طيب احد عنده خلفية عن مواعيد المقابلة الشخصية في عمادة السنة التحضيرية ؟
وياترى هل اجراءات المحاضر في التعيين نفس اجراءات المعيد ؟

جزى الله خيرا كل من يسعى لنفع إخوانه

أحد عنده خبر عن كلية الشريعة اتصلوا بأحد؟؟

الأخ تركي

شكرا لك شرح كافي ووافي

نشكر لك تفاعلك ونشكر لطموح آخر تفاعله فكلاكما مجتهد ومحب للخير

على أمل ان تكون معاملتي قد دخلت اللجنة يوم الاحد 6/6 وانت قلت

"إذا كل شي تمام خلاص تبدأ اللجنة توافق عليكم ويتم عمل محضر للإجتماع ويرسلوه لمدير الجامعة للمصادقة عليه. بعد ما يرجع المحضر من المدير يرفقوه مع معاملتكم ويرسلوها لعمادة شؤون اعضاء هيئة التدريس."

في هذه الحالة انا الآن انتظر مصادقة مدير الجامعة وبعدها ترجع المعاملة للجنة واللجنة ترسلها لعمادة شؤون اعضاء هيئة التدريس والكشف يمكن ياخذ مني اسبوع واجراتهم في عمادة شؤون الموظفين تاخذلها حسب كلامك تقريبا اسبوعين

عندي امل اباشر في منتصف شهر 7

للاسف لم اتمكن من الحصول على رقم معاملتي وبالتالي اعتمد على التخمينات

بس استغرب من حاجة واحدة وهي في شرحك ما ذكرت ان المتعين يراجع الخدمة المدنية.. كثير من المقبولين قبلنا يوم نقرأ تجاربهم نلاقي انهم "بعد ما استلموا اوراق الكشف من عمادة شؤون اعضاء هيئة التدريس" راجعوا الخدمة المدنية وسلموهم اشياء مثل (الكشف الطبي، السجل، الوثيقة، الخ) فأنت ما ذكرت اننا نراجع الخدمة المدنية؟!

الاخ تركي وطموح اخر وكل من ذكر معلومه
جزاكم الله جنه الفردوس الاعلى وسهل امواركم

جزاك الله خير أنفاس الجوري ما قصرتي
أنا توقعت إن الأسماء تكون معتمدة من بعد المقابلة مباشرة
مني فاهمة ايش معنى كل هذا التأخير أنا مقابلتي كانت يوم 5/16
الله يبشرنا بالقبول جميعا في الدنيا والآخرة