السلام عليكم
أنا أجريت مقابلة شخصية في مكتب العمل قسم صندوق الموارد البشرية (هدف)
وتم ترشيحي من بين الأشخاص الحاضرين لوظيفة في شركة ارشاد المستقبل
وقعت عقد مبدئي مع شركة ارشاد المستقبل والتي تعتبر مشغل متعاقد مع شركة زين
بوظيفة /مهندس اتصالات/ بتاريخ 24/11/1434 هـ
قالي مدير الموارد البشرية في الشركة خلاص الاسبوع الجاي تبدأ دوامك عند المهندس
وارسلني على المكاتب الادارية لفرع شركة زين وقالي هذي ادارة الشركة
رحت لهم على الموعد المحدد وتفأجأت ان الادارة فقط لشركة زين الرئيسية
قلت له أنا موظف جديد عندكم عن طريق الموارد البشرية
صدمني مدير فرع زين بجوابه: لكن احنا ما طلبنا أي موظف ولسنا بحاجة موظفين
قالي ايش اسم الموظف اللي صلح معك مقابلة ,,وهنا كان غلطتي اني ما سألت عن اسم الموظف من يوم المقابله
سألتهم عن شركة ارشاد المستقبل قالي ما لهم أي مكتب هم شغلهم ميداني فقط

بعد إجازة عيد الأضحى رجعت لمكتب العمل وشرحت لهم الموضوع
فأعطوني اسم الموظف وطلبت رقم جواله وتواصلت معه
قالي انا بأرسلك رقم مدير المهندسين في منطقتك تواصل معاه وهو بيعلمك طريقة الشغل
كلمت مدير المهندسين وقالي انا اعطيك رقم مهندس يعلمك عشان توصلني وانت جاهز

كلمت المهندس الاجنبي قالي خلاص اعطيني كم يوم واحدد لك موقع نتقابل فيه
مر أسبوع وبعدها اسبوعين واتصلت عليه وما يرد على اتصالاتي
ارسله رساله واتصل من جوال ثاني وما يرد علي
وعلى هذا الحال اكثر من 3 اسابيع
وكلمت المدير حقه قالي انا اشوفه واعطيك خبر
المهم قلت ما معي االا اروح اشتكي عليهم
رحت لموظفين برنامج هدف اللي انا وصلت لهذي الشركة عن طريقهم
قالوا لي انت مسجل عندنا في النظام انك موقع عقد معهم والمفروض انك مداوم في الشركة من شهر 11
قلت ما لي حل الا اني ازعج المهندس ومديره الين يردون علي واشوف الحل النهائي معهم
مع كثرة الاتصالات رد علي المهندس وجلس يشرح لي اعذار وكذب ما تدخل العقل
قلت ماشي مقبوله منكم
الحين ايش العلم قال انا اكلم مديري واقوله عنك
قلت لا لا يكفي التسحيب اللي سويتوه فيني
اعطيني رقم مديرك الخاص وانا اتواصل معه
كلمت المدير وقال قابلني في مكاتب ادارة زين الساعه 10 الصباح
رحت الساعه 10 ما حصلته .. اتصلت عليه قالي انا مشغول الحين ارجع لي الساعه 1
رجعت الساعه 1 وانتظرته الين جاء حوالي الساعه 2 الا عشر (1:50)
قالي احنا بنعطيك وقت تتعود على الشغل
بنعطيك اسبوعين تطلع للميدان مع المهندس وتشوف الشغل وبعدها نوقع معك عقد رسمي ونضيفك في التأمينات
والحين مر اسبوع من الاسبوعين اللي اعطاني ولا احد يرد لا المهندس ولا مديره ولا مدير التوظيف

ايش الحل برأيكم؟؟!!!!
واعتذر على الإطالة

الله يعيينك وييسر امرك

آميييييين يارب
الله يكون بعون الجميع