السلام عليكم ورحمه الله وبركاته

يا اخوان انا اجنبيه ( اردنية ) ،، متزوجه من سعودي وهالفتره منفصله عنه صار لي سنه وخمس اشهر

زوجي انسان مستهتر ولي موضوع من مواضيعي فيه قصتي كامله معاه ,,

الحين انا عند اهلي ، عندي من هالانسان طفل ، والحين عمره سنتين وسته اشهر ،

زوجي ماطلع له ولا ورقه واحده غير تبليغ الولاده ، فقط .. ومن الاساس زوجي مانقل كفالتي عليه ولا طلع كرت عايله ، لسه بالكمبيوتر عازب ..

يعني احس مشكلتي بهالموضوع عويصه ، من جهة زوجي ماطلع كرت العايله ولانقل كفالتي ، ومن جهة ثانيه انا لازلت على كفاله ابي واقامته

واقامه ابوي قصه لحالها لأنها منتهية من 5 سنوات بسبب خلاف بينه وبين كفيله وبعد التسهيلات قرروا يساعدوه بتجديدها ولكن مشكله اقامه ابوي حاليا ان اخواني اثنين واحد 20 سنه والثاني 18 سنه لازم يخرجو من الاقامه وعشان يقدرو يخرجوهم لازم كل واحد فيهم يلقاله كفيل ،، وعشان يقدرو ينقلو كفالاتهم لازم اقامه مستقله لكل فيهم ومايقدرو يستخرجوها الا لو تجددت اقامه ابوي !!

طلع قرار منح اقامه دائمه على كفاله الدوله لأم الطفل السعودي ، والقرار مدري متى يطبقونه

كل هذا وزوجي والله ثم والله ثم والله يدري فيه ومع كذا ولا هامه وعايش حياته بالطول وبالعرض ولا يصرف ع الولد قرش واحد ولا اعتقد بيوم حيروح يتعب نفسه ويجري بأوراق ولده !!

ابغى حلول ياناس والله ما اقدر اتفرج كذا على ولدي قرب على ثلاث سنوات وهو ماعنده شهاده ميلاد !!

سبق رحت الاحوال وترجيتهم قالولي لازم يجي الاب وهالشيء ماراح يصير اعرف زوجي وبعدين لما شرحت لهم وضعي قالولي روحي لجنه المواليد ولما رحت لجنه المواليد وشفت واسطه وهو ( رئيس قسم الجنسيه هناك طلع جارنا الباب بالباب ) حاول يخدمني ودخل ع نفس مدير الفرع بس قالوله كل شيء ممكن يتجاوزوه الا موضوع انتهاء اقامتي ، لازم تكون مجدده ،،

مستقبل ولدي ضايع مثل ماضعت انا ،، وما ابغى اقعد متفرجه ،، لازم اسوي حاجه ،، مستحيل عشان خاطر ابوه مريح راسه من كل المسؤوليات اجي واكملها واتفرج مثله ،، قولولي اش ممكن يطلع بيدي ،

فكرت اقدم معروض للاماره بس ما اعرف كيف الصيغه الي اكتبها وفوق كذا اخاف مايفيدوني ،، وضعي المادي مايسمح ابدا استهلك فلوسي تكسيات ، شغلي حاليا بالطبخ المنزلي والي اطلعه فتات ،، يادوب مصاريف اكل وشرب ولدي وعلاجه فقط ،،

ساعدوني كيف اتصرف ،، الي مثل وضعي كيف تنقذ ولدها