السلام عليكم ورحمة الله وبركاته

بعد ان استطلعت على قسم الاستفسارات حصلت تساؤلات كثيره جدا بخصوص الحرس الوطني
وعن الكشف الطبي والمقابلة
انا بعطيكم اللي صار معاي من ال أ الى ال ي وان شاء الله اني اقدر افيدكم
اولا جيتهم بملفي في ادارة التجنيد بالرياض خلف وزارة الحرس الوطني بالرياض
دخلت وانتظرت وطلع علينا مقدم قالي اللي معاه دبلوم كلية التقنية او بكالريوس يوقف ويقدم
واللي معاه ثانوي يتوكل على الله لاننا اكتفينا وممكن بعد اسبوع نفتح لهم تقديم ثاني الله اعلم
لكن تابعو موقعنا وادارتنا واللي يقول اتصلو علي بعد ماحنا مناظرين فيهم
اليوم اللي نبيهم بس دبلوم وبكالريوس غيره يتوكل
اانا معاي دبلوم التقنية وقفت معهم ودخلونا الصاله ودققو اوراقنا وجابو لنا اوراق نوقع عليها ونبصم وبعدين خذو منا صورة الشهادة وصورة بطاقة الاحوال وقالو روحو للشباك الخلفي يعطيكم الاوراق الباقيه
ورحنا للشباك وصار ينادي بالاسامي طبعا الشباك يعطيك استمارة التعيين تعبي فيها بياناتك ومعرفين وشهود واشياء بسيطه ومع الاستماره كرت الكشف الطبي وخطاب الادلة الجنائيه وخطاب برنت الاحوال .. الكشف الطبي كان فتاريخ 20/ 2 / 1435هـ المهم كان وقتها التاريخ 15 واخذت الاوراق هذي ورحت خلصت الادلة الجنائيه وبرنت الاحوال ويوم جاء يوم الموعد حق الكشف الطبي جيتهم الساعه 4 الفجر وصارو ينادونا بالاسامي وحطونا مجموعات والساعه 5 ونص ركبونا الباصات وعلى المستشفى اللي بخشم العان دخلنا على 6 وانتظرنا اللجنة لين جات الساعه 7 وحطونا بصالة بلاط شخفنا البرد لين متنا المهم الحمدلله على كل حال .. ووصلو اللجنة وصارو ينادون بالمجموعات الكشف الطبي عباره عن العظام والجراحه وثاني شي الاعضاء التناسليه وبعدين النظر .. النظر طبعا اول ماتدخل الباب توقف عندك وفيه لوحه قدامك عليها حروف انقليزيه يقولك سكر عين وافتح عين وقولي وين فتحات الاحرف وبعد النظر يودونك للطول والوزن وبعدها ل تحليل الدم وبعدها البول تكرمون وبعدها الاسنان والسمع وعلى الساعه 11 كنا منتهين كلنا
الحمدلله الكشف كان جدا بسيط واكثرهم متساهلين ولله الحمد
وبعدين رجعنا ل ادارة التجنيد وسالتهم متى نسلم الاوراق اللي معنا اللي هي الاستمارة والصحيفة حقت الادلة وبرنت الاحوال قالي تسلمهم بعد 20 يوم من اليوم عشان الكشف الطبي نتجيته ماتطلع الا بعد 20 يوم وتجي هنا وتشوف نتيجتك وتسلم الاوراق معاها
وبكذا خلصت كل شي بس انتظر نتيجة الكشف الطبي اللي هي تطلع بتاريخ 10 / 3 / 1435هـ عشان اروح لهم واسلم الاوراق اللي معاي

كلامي اللي فالاول عن الثانوي انهم مكتفين
ممكن انهم اللحين فاتحين للثانوي لاني اشوف بموقعهم تقديم بسلاح الاشاره
وتقديم بالغربيه .. التقديمين ذولي للثانوي

هذا اللي عندي اخواني وحبيت افيدكم فيه واي استفسار انا حاضر

الله يوفقك

كفيت و وفيت جزاك الله خير
والان التقديم مفتوح للثانوية لمدة يومين للقطاع الغربي
بالتوفيق للجميع

موفقين ان شاءالله

ي شباب ترا فتحو باب تسجيل بسلاح الاشاره قدمو الله يوفقكم

الله يوفقك ماقصرت شرح وافي وكافي
بس سؤال بسيط انا معي دبلوم تقنية تخصص اتصالات
وش الرتبة اللي اعطوك
انا قدمت عليهم وجاني قبول اليوم الصباح بس متردد منها ياخوك خصوصاً اني بجدة
ويبغوني اراجعهم بالرياض يوم الخميس 1 /3 وامكانياتي ماتسمح اسافر , الله يخارجنا بس

استفسار لاهنت بالنسبة للطول والوزن يدققون فيه والحضور بلبس رياضي وكيف الحلاقة

[align=center]يعطيك العاقية اخوي


بس حبيت اسألك لاهنت

1- كم المده حتى خلصت اوراقك من الأدله الجنائية؟ وهل يعطونك اوراق ام تبصم وهم يرسلوها للحرس لاني سمعت احد يقول تبصم وتنتظر اسبوعين صدق؟

2- أنا عطوني مذكره عليها شعار الحرس الوطني أكتب البيانات وخلصها من الشيخ والعمده والختم او شو لاني ماني فاهم قصه المذكره بالضبط اخلصلها قبل موعد الكشف او بعد الموعد


آنتظرك . . .

[/align]

اخوي دبلوم اتصالات

الرتبه الى الان ماعطونا اجابة كافيه عنها لكن اكثرهم يقولون وكيل رقيب
وفيه مقدم قال لنا انو التقنية وكيل رقيب وبعضهم عريف على حسب التخصصات وعلى حسب الارقام الشاغره

اتمنى اني افدتك

اخوي حارس بالنسبه للطول اللي شفته انه مافي تدقيق
لكن على كلام بعض العسكر يقولون 165 اقصى شي والله اعلم
اما الحضور للكشف الطبي ببدلة رياضيه وشبشب تكرم من غير شراب
والحلاقه حاول انك تحلق مكينة رقم 4 هذا افضل شي مو صلعه ولا كثير
انا حلقت مكينة 4 ومشوني لكن فيه قدامي واحد شعره كثير
قال له اللي يقوس الطول والوزن حرام عليك تضضيع وظيفه عشان شعر كان محلقه مو ضارك هذا مستقبلك

اتمنى اني افدتكك