السلام عليكم ورحمة الله وبركاته


كيفكم اخواني واخواتي رواد هذا الصرح الجميل

صراحه من توظفت انشغلت عن هالمنتدى لكن يششهد الله انكم بالقلب


الموضوع هي افكار بمبالغ بسيطه وارباحه ممتازه ولا تاخذ جهد


والمطلوب دعوه بظهر الغيب


راح اقسم الافكار على قسمين للرجال وللنساء



ونبدا بالرجال


اولا شغل بالخضار لكن ماهو بشكل دايم يعني وانا اخوك وهذي تجربه انا سويتها انا والوالد ربي يحفظه لي ايام ماكنت عاطل


حملنا السياره بضاعه يوم الخميس اخر الليل بمبلغ 700 ريال بالجمله وبسطنا عليها بعد صلاة الفجر يوم الجمعه ردينا على صلاة الجمعه ومعانا مايقارب 3000 ريال



الشغله الثانيه المتاجرة بدلاله وهالعالم مميز واشتغلت فيه بالعقار
بعضنا يطلع من البيت مايدري وين يروح مر على اقرب حاره شوف الاراضي كلم اصحابها ولا المكتب الي ماسكها شوف كم حاد صاحبها نزلها بالواتس بالعمل بين الزملاء والانترنت كمان وبيجيك رزقك وانت جالس




الشغله الثالثه كون وسيط لكل شي بحياتك جلست بمجلس مع شباب واحد نقز يقول والله ياخي ادور سياره معي 60 الف ومالقيت اكورد ياخي نظيف بكره وانت فاضي انزل المعارض وشوف وبلغ صديقك مثلا لي لما اجيب لك شي نظيف 500 ريال وبهالطريقه


الشغله الأخيره ياخي من فينا مايحب التصوير ؟؟ روح لمعرض او صاله وهالشي انا وربي اشتغلت فيه روح لمعرض استيراد سيارات كلم صاحبه ياخي انا لي معارف ولي شغل بالنت انا بعرض كذا سياره لك مقابل كل سياره تروح من عندك لي فيها الف ريال تامنون بالله انا لما اشتغلت بهالشي صاحب المعرض بعد فتره صار يعطيني اسعار خاصه لزبائني



ياخواني وقتكم هذا فلوس وربي فلوس استغلوه بدل التذمر وانا عاطل وانا مدري وشو اشتغل الاجانب اكلوا من خير هالبلد لين طفشوا وبطروا

تدرون اكره جمله اسمعها وش هي لا قالوا الاجنبي احسن من السعودي ياخي احسن مني فايش عقل معي مخ معي اتحرك اجي واروح احسن منه وش ينقصني ؟؟


اتمنى من كل عاطل يفكر اليوم مع نفسه شوي انا لين متى كذا والله ياخوان ابوك او ولي امرك ليرح فيك جد






بالنسبه لاخواتي هنا انتم الهم الاكبر بالمرحله هذي

نبدى مع بعض هالمشاريع الصغيره


اخواتي انتم ليل الله مع نهاره قدام هالتلفزيون مافكرتم مره تستغلون هالشي لمصلحتكم ؟؟
يعني مثلا فلانه تعرف تطبخ مو شرط انتي اي وحده لو بنت الجيران ليش ماتسوقين لها عبر النت ولك الفايده ياشيخه انتي حتى يمكن تفيدين اخوك اذا عاطل وتخليه يوصل المشاوير الطبخ بفلوس


رمضان مثلا تسوين فطور وتعرضينه بالنت وتحطين رقم ولي امرك للعزابيه وصدقيني تجاره مربحه اعطيني عزابي واحد يحب اكل المطاعم وخاصه برمضان الواحد يحب يشم اكل البيت

فطور للمدرسين يعني مثلا مدرسه قريبه منك اولاد تخلين ولي امرك يتفق معاهم يجيب لهم فطور بشكل يومي انتي عارفه وانا اخوك انا موظف بالبنك والله اننا نصرف يوميا مايقارب 50 ريال فطور واخرتها ياخذها الهندي واننا نتمنى فطور البيت انتم اولى

وحده مثلا تقول ياخي مالي بالطبخ ولا لي بالمطبخ ولا في احد من قريباتي يطبخون زين


اقول لها تعالي عندك موقع الامازون واتوقع 99.99% يعرفونه خشي قسم الأدوات المنزليه فيه بتلقين فيه شياء عجيبه وتنشرى سريع سريع عندك مثال
http://www.amazon.com/The-Cottage-In...ef=pd_sim_k_11

هالكوب يتغير لونه لما تصبين فيه القهوه تعرفين كم سعره

؟؟

$8.50

يعني بالريال السعودي

31 وكسور كم بتعبينه هنا مابتبيعينه دون 90 يعني كاسبه 3 اضعافه مابالك لو بضاعه ووسطاء المالين ياكثرهم بالنت يجيبونه لين باب بيتك تعرفين شغله انا اشتغلت باكواب عدسات كانون اول مانزلت وكانت 16 دولار يعني الكوب الواحد مكلفني 60 والله اني بايعه الكوب واحد 200 هذا وانا منزل عن سعر السوق دخلت هالمشروع 2500 ريال 666 دولار طلعت من هالمشروع بمبلغ 6500 ريال



شغله ثانيه اذا انتي تحبين الاطفال سوي حضانه اطفال صباحيه ببيتك محتاجه مايقارب 2000 ريال بس وغرفه واحد تنقسم لقسمين غرفة نوم وغرفة العاب كم سرير وفرش مناسبه لاعمار الاطفال وتلفزيون والعاب تاخذينها بالجمله بس تكون ماهي مضره وتحددين سن لاستقبال الاطفال وكمرة مراقبة بنفس الغرفه والطفل بالشهر بيكون 1300 ريال هذا لو كنتي تبين تنافسين وتنزلين السعر لو ماتبين بيكون 1700 ريال نقول مبدائا اخذتي 6 اطفال 7800 بالشهر راتب وربي



اذا انتي مثلا مهتمه بدراسه معينه تسوين دورات بالورد او الفديو وتعرضينها للبيع بالنت وبتكسبك ذهب مخلصات وغيره



في منتديات ببداية مشوارها يبون مشرفات مثلا براتب شهري 200 ريال بالشهر تقدرين تحطين لهم وقت معين وتتفقين معاهم


مثلا تهتمين باستايلا الفساتين وغيره تقدرين تصميم استايلات وتحطينها بالمشغال للبيع وبينك وبينهم بالنص هذي بعد فيها فلوس





هذا الي يحضرني انتظروني بافكار ثانيه لو احتجتم لاي استشاره الخاص مفتوح للجميع



بالتوفيق