اهديت لك يازين قلبي هديه
وش عاد تهديـــــــن

يازين لمريت سلم عليه
ياكامل الزين

لو بصبعك يازين رد التحيه
ياداعج العين

كويت قلبي كيتن فوق كيه
من بين ضلعين

ياروح روحي رد روحي عليه
شفت العذابين

ارحم تراني زرت حوض المنيه
والموت قافين

واذاذبحتني بلاي خطيه
وش تستفيدين

رمح الهواء له قاعده عسكريه
بين الحجاجين

فيها صواريخ وبها مدفعيه
لك مستعدين

رميتني بالفرد والبندقيه
يوم انت تعدين

هذي طعونك بينات وخفيه
يوم انت ترمين

سلمت روحي رافع لك يديه
حسب القوانين

انا صويب وعلتي باطنيه
محد مداوين

الا انت يابو قذلتً هلهليه
ادواك يشفين

ياغصن وردً في ذرا ظل فيه
يشرب من العين

يشرب من الشلال صبح وعشيه
بين البساتين

يابوثمان تقل ثلج برديه
بين الشفاتين

اهديت لك يازين قلبي هديه
وش عاد تهدين