السلام عليكم ورحمة الله،

الحمدلله عدنا اليكم
ابشركم الحمدلله المقابلة عدت على خير.
اللجنة رائعة جدا واسئلتها مريحة ولا فيها اي تحجير بالعكس حسيت اني بمجلس حريم
مقابلتي كانت ١١ بالبداية ضيعت الطريق
بس الحمدلله جيت ١١ بالضبط وقلت للاستقبال ان عندي مقابلة، تلقينهم عاليمين اول ماتدخلين.

وشيكت على اللسته اللي عندها وحطت صح على اسمي وقالت انتظري لين نناديك، وانتظرت كان فيه كذا بنت جالسين و٢ منهم مقابلتهم ١١ زيي المهم قلت شكلهم مطولين ذولا ورحت الحمام فسخت عباتي ورتبت شكلي

وانتظر وانتظر ومترت المكان تمتير، ولا اشوف وحده توها طالعة من المقابلة وتقول للبنت الثانيه وش صار معها انا هنا انحشت مابي اسمع كلام غيري اؤمن بان كل شخص له تجربته وخفت اتفائل بزيادة او اتحطم بزيادة من كلامها، انتظرت يمكن ثلث ساعة بعدين نادوا اسمي قالت لي روحي قدام لين اخر السيب بعدين يمين، كانت قاعة الاجتماعات، طقيت الباب، سلمت عليهم وسميت

وبدوا يرحبون فيني كانو ٥ حريم وجت كل وحده عرفت بنفسها ومنصبها مره حبيت هالحركة الله يجزاهم خير خففوا من توتري

بعدين بدينا، وسالوني سوالين مختلفين فنفس اللحظة، وحده سالتني قد قدمتي علينا من قبل، والثانية قالت عرفينا بنفسك انا هنا قلت اختاروا سؤال اي واحد تبون اجاوبه بالبداية
مدري هم قاصدين هالحركة ولا بالصدفة
وجاوبت عليهم وسألوني عن شغلي ووش مميزاته وعيوبه، وكالعادة كنت صريحة بزيادة وقلت لهم انه اختلاط وساعاته طويله

وقالت لي وش السستم المستخدم عندكم، ايش طبيعة شغلك، هل انتي مرتاحة فيه وش المواد اللي تحبينها بتخصصك.

وقالوا لي وش هواياتك، قلت القراءة، قالت اي نوع من الكتب قلت كل شي مافيه شي محدد وعلى حسب الوقت الفاضي اللي عندي، قالت اخر كتاب قريتيه وشو عاد قلتله كتاب اقوم قيلا لسلطان الموسى، قالت لي طيب انتي مسويتله فولو بتويتر قلت له ايه ياحبي لها استغربت سوالها قالت ايه انشهر بتويتر والهوامير سووا له ريتويت وهو يكتب اقتباسات من كتابت فعلشان كذا اشتهر والناس صارت تقرا كتابه. قلت له صح وبالاضافه لانه الموضوع شيق كان يتكلم عن الاديان، قالت وش رايك فيه قلت انا لسه بالبدايه وصلت صفحة٢٠ بس كبداية حلو وشيق وقالت لي وحده ايش افضل كتاب خلصتيه ، قلت لها كتاب قانون الجذب وقعدت اقولها ايش الكتاب باختصار وكيف اني مؤمنه بفكره انك تجذب الشيء سواء خير او شر، وقالت لي كان انقلش او عربي قلت لها الكاتب اجنبي لكنه مترجم بالعربي. وقالت لي تقرين بالانقلش قلت لها ايه بديت اقرا اشياء انقلش وخصوصا الكتب الادارية

وسالوني كيفك مع الابتعاث، قلتلهم ابد ماعنديش مشاكل انا مره ودي، قالوا لي مين بيروح معك قال ابوي جاهز وكل شوي يقولي متى ودك تطلعين فاقوله لسه ماجا الوقت المناسب، انا ودي ابتعث من نفس الشغل اللي بكون فيه ، قالو لي طيب شغلك مافيه ابتعاث قلت لهم فيه بس شروط معينه لازم تجلس ٥ سنين عالاقل علشان تطلع بعثة وانا مستعجلة

وقالت لي الحين انتي بتغيرين من المجال المهني للاكاديمي هل فيه اختبارات سويتيها ، قلت كيف قصدك، قالت لي قدرات مثلا قلت ايه اختبرت قياس الجامعيين وجبت فيه ٨٠ قالت لي حلوه درجتك ليس احس انها مو عاجبتك عاد قلت لها اني اطمح للافضل دائما.

وقالوا لي لو ماقبلناك هل ممكن تلتحقين ببرنامج الابتعاث علشان تدرسين ماستر؟ قلت لها صراحة اللي يجون من الابتعاث مو لاقين وظايف فافضل شي يكون من نفس الشغل ، قالت فعلا كلامك صحيح، عاد وحده منهم كانت تقول ٨٠-٩٠ بالميه من المبتعثين تخصصاتهم اداره ويرجعون ومايلقون شي، عاد ترد الثانية تقول هو يعتمد على الجامعة صدقيني اذا كانت جامعه كويسه ومطلوبه بيرجع وضامن الوظيفه وانا اقول فعلا كلامك صحيح وبرضه يعتمد على الشخص نفسه وطموحاته، البعض اخذ البعثة تغيير من الروتين لانه مالقى شي يسويه قال يالله خليني اسافر واعيش كم سنه برا مافيه هدف محدد،

اخر شي سووا فيني مقلب بس نفذت


قالت لي التخصص اللي انتي تشتغلين فيه تخصص رائع وانصحك كنصيحة كملي فيه وقدمي على شركات وبتوصلين فوق بسرعة، قلت لها بس الخاص مافيه امان وظيفي،وتجي الثانية وتقول فعلا القطاع الخاص تطوير اسرع وافضل ورواتب قويه ، وتجي الثالثة وتمدح بالقطاع الخاص تقول يمديك فكم سنه تصيرين رئيسة القطاع وعندك خبره قويه، وكل وحده تقدملي اغراءات اختار الخاص، بالاخير قلت لا لا مابغى قطاع خاص مع هزه راس بعد

فجاه كلهم يضحكون عجبنا اصرارك بس كنا نبي نختبرك ونشوف مدى جديتك
انا قلت لهم انا شفتكم كل وحده تمدح قلت بشوف وش عندكم انا اتقبل الاراء بس بالاخير مالي الا رايي،

وقالوا لي خلاص بالتوفيق
وشكرتهم وسلمت عليهم

والحمدلله على تيسيره، على كلام اللي بالاستقبال تقول هالشهرين بيكونون كلهم مقابلات النتايج بعد شهرين بيرسلون مسج او يتصلون


الحمدلله خلصت على خير وطاح همها، ان كان فيها خير الله يكتبها لي وان كان فيها شر الله يصرفها عني،
ماسألوني شي بالانقلش، بس قالوا لي كيف لغتك قلت كويسة، ماسالوني ولا شي عن المعهد لا اهداف لاسياسات ولاشي.

"تمنوا لغيركم الخير، واحسنوا نواياكم فعلى نياتكم ترزقون"

شكرا لمن ساعدني وتعاون معي في هذا التجمع، دعواتي للجميع بالتوفيق

دعواتكم لي

أم أديم اشكرك على طرح تجربتك والله يوفقك ويكتبها لك ان كان فيها خير لك

^ بس ايش تخصصك ؟؟

الاعلان هذا قديم؟

مشكور أخ محمد الحفنه على ردك على سؤالي الحمدالله أنا حاولت أقنع أهلي بفكرة الابتعاث لوظيفة المعيدة ووافقوا بس شرط بيكون معي مرافق طبعا أخوي بيجي معي اذا الله أراد ،بس المشكلة أنه أخوي يقول أنا ما عندي اشكاليه بس اذا جتني ظروف وقت سفرك لدراسة الماجستير بضطر أني ما أسافر وأبطل علشان كذا أبغى أعرف الي عنده خلفيه لو ما قدرت أسافر ايش العقوبه الي ممكن يطبقونها علي ؟ أتمنى الي عنده خلفيه بالأمر هذا يساعدني أنا موعد مقابلتي قرب وأبغى أعرف لأنه ما أبي الفرصة تروح مني لأنه أخاف أخوي يسحب علي ما أضمنه صراحه

متى راح يفتح هذا المعهد بالدمام؟

مساء الخير على الجميع ...حبيت استفسر من البنات اللي سوو مقابله ايش الاوراق المطلوبه الله يعطيها العافيه اللي ترد علي لان مقابلتي بكره ان شاء الله ..والله يوفق الجميع