السلام عليكم
انا قبل شهرين ونص او ثلاث شهور وشوي سويت مقابلتي الشخصيه بالرياض ..
والصراحه المقابله ما شاء الله تبارك الله كانت من اسوأ ما يكون
غير ان الاسئله اغلبها كانت مبهمه بالنسبه لي ولا ادري هم يبون يعرفون شخصيتي او يبون يعرفون معلوماتي كان فيه شوي شد بالمقابله وكنت ارد عليهم بكل وساعة وجه
بالبدايه كنت اتذكر النصائح لا تشبك ايدينك .. ولا تشبك رجولك ببعض ,
بس من الربكه رجولي حاطها فوق بعض وابي افرقها ما قدرت
!!
كان فيه خمسه اشخاص .. 3 منهم سألوني واثنين يقزقزون
!
الاسئله ما كانت دقيقه بتخصصي .. وكان واضح ان مهب متخصصين ,
عشان كذا كان فيه اسئله كنت اسوي نفسي معصب واقول ما عندي اي خلفيه عن هذا الموضوع ,
وفيه اسئله ثانيه اضطريت استخدم جوجل الي بداخلي واعطيهم من الرخيص ومشت الامور
بس بشكل عام طلعت من المقابله وانا مو راضي ولو كنت ابقيم نفسي كنت راح آخذ 6,5 من 10 !!
بعد المقابله طبعا ما كان عندي امل 1% بالقبول فرجعت للبيت وكبرت المخده ..
وبعد شهر جاني اتصال الصباح وقالي معك معهد الاداره , وقالي انت سويت مقابله وقلت ايه
توقعت انه يقول مبروك تم قبولك وكنت مجهز دموع الفرح وبعدها ابسوي فرحة دروجبا اذا سجل هدف وقام يسحب على ركبه بالملعب
بس للأسف طلع وقالي انت قبلت معنا احتياط ..
!
قلت طيب يعني فيه شئ اقدر اسويه ؟ ولا وش المطلوب مني بالضبط ؟!
قالي ابد لا تسوي شئ .. اذا كان فيه نصيب اتصلنا عليك
سألته قلت طيب بحدود كم بتتصلون علي ؟ قال اسبوع او اسبوعين ونرد لك خبر
والحين لي اكثر من شهر ونص لا حس ولا خبر من زعل القمر
لا اتصلوا علي وقالوا لقينا لك وظيفه وتعال داوم .. ولا قالوا لي توكل على الله مالك نصيب !
الشاهد بالموضوع يا ليت كل الطلاب الي انقبلوا من اول مره يفصلون عشان المساكين الاحتياط الي مثلي يتوظفون ويلحقون على الاقل ياخذون راتب برمضان
وشكرا
03-06-2014, 08:25 PM
العرض العادي
