السلام عليكم والرحمة




أول موضوع وأول مشاركه لي يااخوان وعساها تكون حلوه وخفيفه ومفيده للي يرغب ,,



أول شي كلنا نعرف الأحوال المدنية كلن وبلدته اللي هوا بها



أنا أتكلم عن تجربتي بالرياض \


رحت قبل يومين للأحوال المدنية ( فرع الوشم بالرياض ) , عندي كذا شغلة ودي أخلصها ,

طبعا معروف إنهم مستحييييل يدخلونك إلا وعندك ورقة موعد أو صورة من الموعد لا ومطبوعه على ورق

انا حجزت عن طريق النت وصورت الشاشه ورحت يمهم , عند البوابه اقابل حق الأمن , يقول عطني الموعد أقول عانه بالجوال يقول معليش لازم ورقة ولا اطبع صورة الجوال ! , يبن الحلال هنا الرقم موجود والدعوا واضحه قلي معليش مايمديني والله ,, الزبده عرفت انه يبي ورقه ,

طلعت من عنده على برا الحوش حقهم , ( على إمتداد الحوش من برا كل أبوهم بكراسيهم وماصاتهم ولابتوباتهم وطابعاتهم ) أيييش وظيفتهم ذولا ووش يسوون بالضبط ؟

جالسين يطبعون أوراق للعالم ويحجزون مواعيد ويغيرون مواعيد ويسوون جميع إجراءات الأحوال المدنيه عن طريق موقعها , وهذي أي واحد عنده نت بيعرفها ولا أسهل منها ( بالغالب )

اللي شدني بالموضوع مهو هالشي , لكن اللي شدني السعر المبالغ فيه وفوق هذا تكالب الناس عليهم وبالكاد يغطون هالبشر , يعني تصوروا علشان تسوي حجز موعد وتطبعه بورقه أسود وابيض ب 20 ريال !

واذا ودك بخدمه ثانيه منه ما يحتسب الأوله يطلب منك 20 ثانيه وانت تدفعها وانت مبسوط تبي تمشي وضعك وماعندك وقت
وهم عارفين هالشيئ ,

والله ياخوان جلست أحسبها براسي , الواحد فيهم ماشاء الله تبارك الله يجيله يمكن بالساعه بالقليل عشر زباين

هذا أصلا يعتبر ماجاله أحد ! ,,
لو نحسب كم بيشتغلون خلال الدوام خل نقول 5 ساعات , 10 في 5 = 50 زبون باليوم

20 في 50 زبون = 1000 ريال ,, هذا صافي يوميته لو نحسبها خلال 20 يوم باعتبار استثناء الجمعة والسبت لأنها عطلة = 20000 ريال ,, ياهوه ولا راتب عقيد

أصلا كل اللي مطلوب / لابتوب 1500 حق نت + طابعه أبو 300 إلى 400 + كرسي وطاولة من الحراج واتصال نت 100 ريال تغطيه

يعني بالكثير بالكثير 3000 إلى 4000 ريال بداية العمل وبعد كذا ادهر ,,

أنا قلت انها أكيد مأجرينها عليهم ومن هالكلام ,, سألت كذا واحد , قال ولا أجار ولاشي ,تعرف تسوي حجوزات وهالخرابيط تعال صف طاولتك واشتغل ,, ولاااااا أسهل من كذا

يا أخوان , وربي إن بعض المشاريع والأفكار مايبغالها راس مال قوي , بس شوية تركيز وهمه وكسر حاجز الكسل والعيب ,,

هذا ما عندي وحبيت أفيدكم به ,, لربما بعضكم يعرفه من قبل , والبعض الاخر لا

لكن نشر الفائدة شي طيب

وسلامتكم يالربع