سلام عليكم ورحمة الله وبركاته

والله يسعد صباحكم ومسائكم بكل ماهو مرضي لرب العباد

استفسار بسيط وان شاء الله تقدرون تفيدوني

الموضوع وما فيه مستاجر لي محل فتحتين وعلي شارع تجاري وكل شيء مضبوط وجلست شهر كامل اصقع وارقع فيه ( ابغي افتح لي مطعم شامل ) مشاوي وبرست وفطاير وووو يعني كل شيء ما عدا الرز ( اللي اهم شيء ) ..

المهم مكلف مكاين وخرابيط فوق الـ 150 الف ..

وجاء دور الاهم اللي هو ابغي اطلع سجل تجاري ورخص ووو ..الخ

اعطاني الوالد الشغله بعد ما تضارب معا مصري كان متفق معاه في مكتب خدمات عامة :

وراح ابدا ان شاء الله من بكرة .. المهم قلنا مالها الا منتدانا الحبيب حلول العطالة .

الحين عاد همتكم معاى ..

ابغي اطلع اكبر عدد معين من العمال وش الحل

الوالد يقول اطلع رخصتين لكن الظاهر ما يمدي لان النشاط واحد والمكان واحد ,, لكن اللي سمع بكذا قبل يا ليت يفيدينا


المهم عاد اللي عنده خبرة لا يبخل علينا اخذنا الوكالة من الوالد وصدقناها في الغرفه التجارية من وين ابدا وكم راح تأخذ الشغله وبالنسبه لي بإذن الله كل يوم من الصبح وانا صاحي ورايح للشغله يعني اقصي مدة استخرج فيها رخصه للمحل والاهم عندي العمال او التأشيرات ابيها اكبر قدر ممكن

وفي حال طلعت التأشيرات كم تأخذ وقت لين يجون العماله ..

وسلامتكم

والله يااخوي ماعندي خلفيه لكن سمعت
انهم مايعطونك تاشيرة الا بعد افتتاح المكان 3 شهور بدون عمال
ماادري صحيح هالكلام او لا

الله يوفقكم اخوي ويرزقكم

اولا : افتح سجل تجاري للمؤسسة من وزارة التجارة من الخدمات الالكترونية ويوصلون لك السجل التجاري الى بيتك بفيدكس ب 30 ريال

ثانياً : تفتح ملف بمكتب العمل لمؤسسة

رابعاً :انتظر على موقع التامينات الاجتماعية الى ما يتفعل ويصير ربط بين التأمينات ومكتب العمل

خامساً : اذا صار ربط عبي البيانات وسجل المؤسسة بالتأمينات واطبع ورقة الاشتراك وروح سلمها للتأمينات

سادساً : توظيف سعودي اذا كنت موظف واذا ماكنت موظف انت تسجل نفسك كسعودي

سابعاً : فتح ملف بمصلحة الزكاة عن طريق الانترنت لايحتاج الذهاب واحتفظ بالرقم المميز الخاص بك

ثامناً : قبل أستئجار المحل هل تم عرضه على البلدية تراهم راعين شطحات وكل يوم لهم نظام جديد

وهذه أول اخطائي استأجرت وانهيت كل شئ ولما جات للبلدية قالي ماينفع هالنشاط بهالمكان غير نشاطك

ثم غير اللوحة ثم غير وغير وعدل وارفع البلاط الى نص الجدار فخذ الشروط كامله من البلديه علشان فتح مطعم علشان مايخسرونك

اذا استلمت الرخصة استقدم في مكتب العمل عمال حسب حاجتك وبيعطونك حسب مساحة المحل ويدرسون حاجتك للعمال هل هي ضرورية او لا ممكن تطلب 4 يعطونك فقط 2 ويقولون تكفي واذا احتجت تعال قدم زيادة الخ الخ

بالتوفيق والله يعينكم ويرزقكم

الله لا يهينك اخوي ,, أوائل الخير وربك يعين
نقاطك افادتني كثيرا ونسال الله الرزق الصالح لنا ولكم

انا فتحت مؤسسة جديدة وجلست شهر وطلعت الفيز , ولازم تسجل بنظام ابشر

وبالنسبة لربط البيانات فهي تربط بنفس الوقت , والتفعيل برسالة جوال بثواني

وتوظيف السعودي اذا كنت غير موظف فما يحتاج توظف سعوديين الا اذا عدد عمالتك تعدى 9 عمال

الله يوفقك

ممكن أفهم اش معنى تصديق الوكالة في الغرفة التجارية ؟

الله يوفقك ويسهل لك

المطعم لازم تكون الواجهه ما تقل عن 8 متر

ومكان الخدمات ما تقل عن 95 متر

وبالنسبه للخطوات اعطاك ايها اخوي اوائل الخير

لكن فيه نقطه رقم 7 مصلحة الزكاه ما تفتح ملف فيها الا اذا سجلك له سنه واكثر من سنه يعني جديد ما تجيهم بالمره

وبخصوص التامينات اذا بتنزل نفسك على المطعم بياخذ منك اسبوع اما اذا بتزل سعودي يبي له 3 اشهر

وبالنسبه لمكتب العمل اذا فتحت ملف وكملت اوراقك يبي لك لاااا يقل عن 3 اشهر قبل ما يسلمونك التأشيرات

شكرا لتجاوبكم وبإذن الله احرص علي فعل ما ذكرتم