السلام عليكم ورحمة الله وبركاته انا حابه ادخل بالموضوع ع طول عندي صديقه تطلقت من فتره والحمدالله ع قضاء الله هي راضيه ومقتنعه لكن للاسف طليقها منغبن ومنقهر الظاهر مع انها هي الي تضررت بس صار العكس .. صديقتي حاليا معها طفله تخيلوا ان هي الي تصرف عليها وزوجها محاضر جامعي وله مشاريع والله مايدفع لها ريال يبي يقهرها طبعا صديقتي عادي ماهي مهتمه تقول حسبي الله ونعم الوكيل وبكيفه اذا يبي يصرف او لاا لكن المشكله ان بنتها مالها اثبات جت تبي توديها مستفى توهقت جت تبي تسافر لاهلها توهقت بالتذاكر وتبي تسافر لخارج السعوديه وماهي قادره تسوي ولااااا شي بدون اثبات اخوها اتصل ع طليقها قال نبي اثبات لبنتك قال انا لسسه ماضفتها لدفتر العايله مع العلم ان بنتها صار الحين عمرها 3 سنوات !! مدري وش ينتظر ؟؟ او انه يكذب ؟؟ طليقها يتعمد مايرد عليهم وصديقتي صارت تتحسس تقول اخواني صاروا تقل يشحذونه طليقها متزوج وعنده عيال ومو بلشان ابدااا ببنته ذي مهملها ومحاضر باحد الجامعات وملتحي للاسف ولا يبي يدفع مصرف لبنته ولا يبي يجيب اثبات لها ولا يدق ولايسال عن البنت !! حسبي الله عليه ونعم الوكيل ,,, المطلوب الحين صديقتي تبي محامي او شخص فاعل خير يكلمه ويجيب الاثبات حق البنت او اي حل اخر للمعلوميه لحد يقول خل اهلها يكلمونهم اهلها تكلموا بس محد معطي وجه ,, ياليت احد يعطينا حلول لان صديقتي تتابع الموضوع وتبي احد يساعدها في هالمشكله وشكرا لكم ,,

ارفعوا عليه شكوى بالمحكمه من ناحية الاثبات ومن ناحية عدم اضافتها والمماطله المتعمد بذالك
والمحكمه تحسب كم للبنت ما اخذة مصروف وتطلب منه مصروف ذيك الفتره كلها
واجباره على المصروف الشهري
اختي صار معها نفس الشي ممكن قبل 10 سنوات وظل يماطل وسوينا فيه كذا
هذا انسب حل اشوفه بلاش اخوانها يطلبونه او يترجونه
لو صار ذا الشي واشتكيتم عليه هو بيطارد وراكم
بس كنصيحه حقها من المحكمه محفوظ ولا يقدر يتأخر بشي بعد ما يصدر الحكم
توكل احد اخوانها وهو يشتكيه ويكمل الاجراءت

وعليكم السلام ورحمة الله

ارفعوا قضية وااذا رفض يجيب اثبات بنتة من ناحية ما يمديها تتعالج او شي

تروح للاحوال المدنية وتطلع اثبات لبنتها ودفتر عائلة لها هي وبنتها وتجيب ورقة من المحكمة تثبت كلامها للاحوال

لان الحين يمدي اي وحدة تعاني نفس صديقتك تقدم على المحكمة وبعدها تقول لهم تبي اثبات وتروح للاحوال يطلعون لها دفتر مستقل باسمها وتضاف بنتها فية

احسن حل تسال محامي يختصر عليها الوقت ويدلها للصواب واذا مالقت خليها تراسل روضه اليوسف بتويتر كل المطلقات يسالونها لانها خبيره بامور المحاكم وغيرها

يعطيكم العافيه ماقصرتوا والله يفرجلها

أختي مالها إلا جمعية موده اذا كانت ساكنه بالرياض واذا بجده برضو لهم فرع
حبيبتي هذي الجمعيه مختصه بمشاكل المطلقات وايضا لديهم قسم قانون فاذا كانت تبي حضانه ان شالله يساعدونها

وهذا الموقع تبعهم خليها تتواصل معاهم ....


http://mawaddah.org.sa/

للاسف لازالت المرأة في السعودية تعاني الامرين

معقولة للحين مافيه حقوق لها وقانون يردع كل شخص يخرج عن القانون

هذا وجه محاضر يدرس الجيل هذا خداع ومنافق المفروض يحجر عليه ويطرد من وظيفته اقل شي
علشان يعرف يتزوج مرة ثانية ويجيب عيال ويتركم همالا عيب والله عيب والله يارجال

متى بس اسمع قرارات تحفظ للمرأة المطلقة وام عيال كرامتها وتصونها عن مذلة الناس وقهر الرجال

حسبي الله ونعم الوكيل المفروض الدولة تلقائيا توقفه عند حد كل شخص جاهل من زمن قريش

اللي يقولو محاكم هالمحاكم فيها ناس متحجرة معلقة قضايا النساء الضعيفات

ماعاد فيه رجال سواء محاضر والا دكتور وش ماكان كلهم مثل بعض حسبي الله ونعم الوكيل
الله يفرج همها