السلام عليكم ورحمته الله وبركاته

عندي استفساارات

انا ودي اجيب سيارة لتوصيل المعلمات
اقدر احط استمارة السيارة باسمي
او محرم عادات وتقاليدا ومجتمعا ان تكون الاستمارة باسم انثى
ماابيها باسم احد من قرايبي علشان يجحدني

ثانيا انا عندي 10 الالاف اقدر اجيب سيارة فان فيها او ابطي عظم ماجبت
ولو فيه امكانيه وش افضل نوع
واذا مافيه امكانيه عطوني ارخص سيارة فان كم يكون سعرها اذا فوق 10 علشان ادبر عمري

وشكرا جزيلا

وعليكم السلام ورحمة الله وبركاته. ايه عزيزتي تقدرين تحطين سياره بااسمك ، بس ١٠ الاف على حد علمي مستحيل تجيب لك فان ،. وافضل نوعيه اعتقد تويوتا سالة قبل فتره لاني ابي فان ونفس فكرتك ابيه لتوصيل طبعا للحين مانفذت الفكره المبلغ اللي عندي بسيط اتمنى لك توفيق ان شاءالله ��

جزاك الله خير ي بعدي
انا ماابيه جديد ابيه مستعمل اذا كثرت الفلوس
ان شاء الله نجيب جديد
ليت احد يفيدنا عنده خبره
جزاكم الله خير

وعليكم السلام ورحمة الله وبركاته

اعتقد ي أختي١٠٠٠٠ ماتجيب فان للتوصيل لان التوصيل محتاج سياره نظيفه وعشره ماتجيب سياره صغيره زوديها شويه وشوفي فان مستعمل

انا شريت قبل فتره فان ب٧٠٠٠ وصلحت فيه ب٢٠٠٠

وعطيته عمال بناء وكل اشوي اصلح فيه
والان له شهرين طايح ما حصلت احد يصلحه او يشريه

نصيحه لا تفكري في ذا المشروع الا بسياره جديده مكيفه
طبعآ

لان صعب تحصلين سياره ب٣٠ الف صالحه لنقل الطالبات

نقل الطالبات يترتب عليه عمل السياره
٦ ساعات يوميآ مكيف شغال
والسيارات القديمه اذا شغلت المكيف احترت وجونا مو ناقص حراره
واذا احتر الموتر لابد من تلفيات اقل الخساير
وقوف السياره والطالبات موجودات فيه !!؟؟


عمي شراء سياره لزوجته ب٣٥الف قبل سنه
موديلها لا باس واخذ معها معلمات للفايده
بعد شهرين خبط الموتر واستاجر سياره ب٢٠٠ريال اربع ايام
لانه طلع سياره جديده باكثر من ١٠٠الف

اختي لست محبط لكن منصح فقط
الشروع ممتاز لكن
لابد من سياره جديده وطبعآ سائق شاطر

كلام سنكافح بالصميم ومن قلب الحدث وفقه الله
اخي اما أنك تتاجر بالعشرة في أي مجال شراء وبيع ولو حتى سيارات قديمه او غيرها

او انك تدخرها فتره وحتى يفيدوك الاخوان لازم تذكر لهم اهتمامك وهل انت عاطل او مشغول او ... الخ

وعندك طريقة اذا انت مصر على هذا الموضوع رح الشركة واستأجر باص وجب كفيل < ابوك او عمك او اي احد وتوكل على الله واحسب رزقك وخلك فطين ولا تستعجل النتيجة وما هو لازم تكون نظامي برخصة نقل وما نقل البداية داخل البلد وبعدها خير ان شاء الله

واذا ما تقدر على الباص لأن شرط نقل الملكية 9 افراد اما تشوف معقبين او تاخذ لك سيارة تنفع وتمسك سعرها .

كتبت كلامي على السريع اتمنى اني أفدتك بشيء واهم شيء توكل على الله لا تجلس بالتوفيق

10 الاف ماتجيب .. ماابي اكسر مجاديفك .. بس فيه طريقه احسن .. استأجري سياره وجربي كم شهر .. .. اذا ضبطت الامور وزباينك جاهزين .. تسلفي او اخذي قرض

مثل ماقالوا 10 ماتكفي ..

فكرة الايجار اللي ذكروها حلوه .. بس الاهم اسعار الايجار كم بتطلع ؟؟

اول اسالي عن الاسعار وشوفي اذا بتقدرين تغطين المصاريف ولا لا

بس فكرة تشترين فان رخيصة مانصحج صراحه .. بيكون خرابها اكثر من فايدتها ..