السلام عليكم ورحمة الله وبركاته

قبل ما ابدأ الموضوع اتأسف لأي خطأ موجود بالموضوع
سواءاً كانت معلومات خاطئه او اخطاء املائيه.
..
..
اولا ًما الدافع اللي خلاني اكتب هالموضوع ؟

اللي دفعني لكتابة هالموضوع هو مواضيع بعض الشباب والشابات اللي يطلبون مشاريع صغيره برأس مال بسيط وما اشوف احد يقدملهم مشاريع تناسب احتياجاتهم الا البعض.

والسبب الثاني هو اني ابي اجرب هالشغله واكسر حاجز الخجل في البيع
مع اني كنت مقتنع قناعه تامه ان التجاره او بين قوسين (البحث عن رزقك) ليس عيباً اطلاقا ان تمارسها
بل العيب انك تجلس بالبيت وتستنى الفلوس تجيك.

طيب نجي الحين للبدايه
البدايه كانت بسيطه جداً وهي اني طلبت من الوالده الله يحفطها انها تسويلي جريش
وتحطه في قدر عشان ابيعه في احد الحدائق العامه في الحاره المجاوره لنا
مع العلم ان امام منزلنا حديقه بس كان الخجل يمنعني اني ابيع فيها
المهم اخذت القدر وتوجهت لأبو ريالين وشريت صحون بلاستيكيه وملاعق بلاستيكيه
وحطيت الاغراض كامله بسله وحركت للحديقه
طبعا كانت الساعه 4 حكم لما وصلت
وبعدها رحت وحطيت الاغراض على احد الكراسي الموجوده بالحديقه
وقعدت استنى واستنى واستنى الين ماجاني شايب وشرا مني صحن
كانت فرحتي في هاذيك اللحظه لا توصف مدري ليش
يمكن عشانه اول زبون ؟
المهم جلست مايقارب ساعه بالحديقه ومابعت الا صحن واحد
مع العلم ان الصحن بخمسه ريال
قلت بنفسي على كذا انا خسران
اقول مالي الا اشد الرحال واروح للحديقه اللي قدام بيتنا
وشلت اغراضي ورحت لها
واول ماوقفت قدام الحديقه الا فيه مشكله
ايش هيا ؟
كل الكراسي جالسين عليها ناس
قلت ياولد لازم استخدم الخطه ب
نزل الفرشه وحطيتها بمكان استراتيجي
ونزلت مركتين وصفيتها جمب بعض
وحطيت قدر الجريش فوقها
الحمدلله في 20 دقيقه بعت 4 صحون
ومشيت للبيت بسبب ان الجريش خلص
يعني مجموع الصحون اللي بعتها بهاذاك اليوم 5 صحون
5 صحون ضرب 5 ريال = 25 ريال
الحمدلله دخلت في ساعه ونص 25 ريال
والمفروض اكثر بس كما ذكرت خلص الجريش
طيب لو افترضنا انك بعت مع الجريش بليله ؟
كيف بيكون دخلك ؟
مع العلم ان كل من مر من عندي قال هاذي بليله
واقوله لا.
المهم اللي ابي اوصله ان لو تبيع جريش وبليله
بيكون دخلك باليوم كويس
وتقريبا من 50 الى سبعين ريال
خاصتاً اذا كنت متوظف وتبي دخل اضافي
وطبعا ماوقفت على تجربه وحده
جربت فوق الخمس مرات
ومن ضمن التجارب كانت البليله
كنت اشتري الكيلو بـ 9 ريال وانقعها واطبخها وابيعها والحمدلله كان دخلها كويس
بس لا تنسى تاخذ معك الخل والشطه والجزر المبشور
وبالأخير اتمنى التجربه نالت على اعجابكم ويستفيدو منها اعضاء المنتدى
والسلام خير الختام





.......