السلام عليكم ورحمة الله

لقد كتبت موضوعاً سابقاً عن مشاكلي بالوظيفة

https://www.btalah.com/showthread.*****..75#post7509075

والحمد لله نقلت لقسم آخر وبصراحه قسمي كله رجال ومافيه الا حرمة وحده وهي اجنبية مطلقة من سعودي و المكان مختلط سعوديين و أجانب..

والله لولا الحاجة لما بقيت ...

السوبر فايزر لئيم وماكان يعلمني كل شئ بالبداية مثل اللي قبله ماكانت تعلمني الا ملخبط..

بس قدرت امشي بسبب جمعي للمعلومات اللي ممكن تفيدني.. والزملا الله يجزيهم خير علموني معاهم شويه..
ولما تفوقت وكنت كويسه وبدا الجميع يحترمني حدثت حادثة غريبه وانا بصراحه ما ادري هل هي تحرش او تطفيش..

لما كنت جالسه والسوبر فايزر جا جنبي عشان يعلمني الشغل لأكثر من مره حط يده على يدي بالكي بورد ولما لاحظ أن في احد الموظفين أعجب فيني وكأنه يبي يتزوجني غار منه وشال كاسة المويه الخاصه فيني وحطها بمكتبه ؟؟

ما تكلمت ولا شليتها انتظرت كم يوم عشان اشوف اهو ايش بباله وليش سوا هالحركه انتظرت يوم أثنين ثلاث ولا شئ مارجعها وزي ماهي ..

وجت حادثه ونسيت الجوال ولقيته عنده ولقيته في نفس اليوم كسر الكاس اللي اشرب فيه قهوه على مكتبي وبحجة ان الموظف التنظيف اهو اللي كسره.. وانا متأكده انه هو اللي سواها ليش عشان نسيت لأغسل الكاس وكان فيه اثر من المكياج..

واشكيت على قضية الجوال اول ما دخل المدير وسوو جلسة .. وبعدها هددني في الجلسة من تحت لتحت وقال انتبه على جوالي..
وصار يمدون يدهم على شنطتي والأجنبية معاونتو لأنها غيارنه مني بسبب تفوقي بالعمل ولصغر سني (لأنه على كلامها تبي تتزوج وتحط مكياج كامل ولا تلبس عباية وماشية وفاكه شعرها وسط الرجال.. وعاجبتهم وانا اللي بحجابي ما ني عاجبه احد).. صارو يغيرون مكانه بالشنطه لأكثر من مره..

وغير كذا صاروا يلعبون بالإيميلات يضايقوني بالعمل ويخلوني اطلع من المكتب بسرعه ويقعدون على جهازي يلعبون فيه ولما صرت اقفل الجهاز كله يوم اطلع صارو يلعبون بالدوام ويبون يخلوني غصب متأخره عشان أوقع على ورقة تأخير..

لما ما عجبتهم صاروا يضايقوني ويرمون الكلام وكل اللي يسوه لعب بأعصابي عشان يطفشوني من العمل والمصيبه انا ما عرف هل السوبر فايزر اللي معايا يماني و لا سعودي من جيزان..

لمين اشتكي حتى حطت يده على يدي في شاهد على كلامي..

أدري ان الحال مزري بس مضطره اتحمل الله لا يذل أحد..

كانو يبون يفسدون بسمعتي بس مالقو علي شي لأني بحجابي و الكامل و محطيه حد اتكلم من بعيد لبعيد ولا ارضى احد يمزح معي باليد..

والأجنبيه اللي مطلقه من سعودي يفرشون السفرة وتجلس وسطهم تاكل وتعلي الصوت وهي تضحك وتتمايل وتمزح مع ذا وتضرب كتف ذا.. وعاجبتهم وانا اللي حالي حال نفسي ماني عاجبه أحد..

يعني القاها من فين ولا من فين..

من ظروفي الصعبه .. ولا مرضي.. ولا نظرتهم لي ذي جايه تشتغل مع الرجال ليش وشوفوا الحساده واحد منهم يقول احنا نصرف على اهلنا انتي جايه تشتغلين بفلوس وايش تسوين فيها؟؟

والله نص راتبي اديه لأهلي واعطي اخويا اللي يوديني ويجيبني العمل وهو اولى من الغريب ومايبقالي من راتبي الا الرع وعليها كل شئ مصاريفي واحوش وتعالج واكل منها لأن بسبب مرض ما اقدر اكل الأكل العادي زي البشر لازم اكل خاص.. وذا للي خلاني اشتغل لأن أبوي ما قدر يتحمل مصاريف اكلي خاص..

والله حالنا يرحم حتى اخويا له سنين عايش مبهدل بسبب مرض انفصام الشخصية وبالواسطه صاحبه دخله المستشفى وهنالك لقى العلاج ببلاش ولله الحمد والحين لقى مساعدة التاهيل الشامل بعد ماكان مبهدل بالمرض لمدة 13 سنة متخلين وازيدكم من الشعر بيت ..

هو نفسه اخويا اللي يوديني ويجيبني العمل اخواني الثانين كل واحد بحرمته وعياله محد فاضي لا لأمه ولا لأبوه ولا لخواته..

وفوق ذا كله القى مين يتحرش فيني ياهوه قلت لكم مريضه مو كفايه..
لو على الوسخاه البلد مليانه من ذي الشاكله انا في حالي خلاص سيبوني بحالي..

الا مستقعدين لي بالعمل والله خلوني امشي اهستر وبالغصب يبوني اطلع ذول وحوش مو اوادم والله اتعاملت مع كفار ما كانو حتى كذا التعامل معاهم ارحم من اخوك المسلم وصلنا لذي المرحلة يعني...

انا لله وانا اليه راجعون..