بسم الله الرحمن الرحيم
السلام عليكم ورحمة الله وبركاته ..


ارغب العمل بمجال التجـــارة
وتحديداً تجــارة الملابس والاكسسوارات النسائية ..
" يقولون اي مجــال فيه حريم يمشي لا تخــاف "



ارغب بالتجــارة عن طريق الاستيراد ..
ويكون البيع جملة للمحــلات النسائية ..


وأحيــان أفكر وأقول
اشتري من محــلات الجملة بالرياض وافتح محــل واترزق منه ..
لكن هالنوع ما أحبه ..
لاني اشوف الشغل محدود ويكون فيه روتين مع الوقت..




ما رأي أصحاب الخبــرة والفزعة
بتجــارة الاستيراد .. ؟؟ ؟؟

وماهي النصائح ؟؟

علماً بأن رأس المال
يبدأ من الـ 100 ألف ريال إلى الـ 150 ألف ريال ..

وعسى الله يباركـ لنا ولكم ..

شوف اخوي بالنسبه بالاستيراد (((وجهة نظري))) حلوه بس يبي لها تفكير
ووش البضاعه الي بتمشي
انت فكر في كل شي بالاستيراد لا تحصر تفكيرك على اكسسوارات
فكر في ادوات الحاسب بالذات الصينيه مثل فلاش والذواكر ومن هذا القبيل وانت لك التفكير لان قيمتها رخيصه ولما تبيعها هنا تلقى ربح
وبالتوفيق أن شاء الله

اتمنالك كل خير اخوي وبالتوفيق ..

اما بالنسبه لوجهة نظري المتواضعه ومن تجربه بسيطه فاقولك ان بيع الجمله والاستيراد ليس لي به خبره واما طريقة البيع القطاعي وخاصه بالي اشتغلت فيه فان الاكسسوارات النسائيه فيها خير واذا انت راعي جلد وتصبر فانصحك بقطاعي الاكسسوار والساعات ترى فيهم خير يمكن ماتتوقعه لاكن قبل كل شى التوفيق وبعده الموقع وثالثا البدايه المدروسه وسوال اهل الخبره وعدم جلب بضاعتك من سوق معين او تاجر واحد فالتغيير مطلوب حتى في مصادرك في التجاره لان بيني وبينك وبحكم تجربه بعض التجار والغيرسعوديين خاصه اذا شافك على طول عنده وماتشيل الا منه لعب بالسعر على كيفيه وبالتدرج والتغيير في المصادر اشوفه بصراحه صحي لاهل القطاعي وحتى للزباينك يشوفون ستايلات جديده وغير مكرره ...واخيرا اقول استخر ربك وشاور اهل الراي والخبره وبالتوفيق لك انشالله .

والله اعلم وصلى الله وسلم على نبينا محمد وعلى أله وصحبه أجمعين .

اخي الكريم ...

الأخوان قبلي ما قصرو وقدمو معلومات جداً مهمه وممكن تقلبها براسك وتستخير الله فيها ..

اللي عندي وابي اقوله هو :
اول شي اعتقد أنك ( رجل ) صح ؟؟ هنا بسئلك سؤال وهو ... هل لديك الخبرة الكافية في مجال الملابس والاكسسوارات النسائية ؟ ممكن تكون اجابتك ( لأ ) هنا اقولك مافيه أي مشكلة لأن الخبرة غير مطلوبة لذيك الدرجة .... ولكن السؤال / ماهو البديل عن الخبرة ؟؟ وهذي زبدة الموضوع ..

الخطوة الأولى :

الــــــبــــــديـــل هو : الأستعانة بأحد أخواتك أو زوجتك أو أي وحدة من محارمك وتكون بعمر مناسب , يعني ( من 23 الى 33 سنة ) تقريباً , واهم شي تكون على مستوى جيد جداً من الذوق ومن المتابعات والشغوفات في الموضة وعالمها .
طيب , بتسئلين اذا لقيت وحده من محارمي .. وش اسوي فيها ؟؟ انا اقولك , هذه البنت هي اللي بتكون خبرتك والسبب الرئيسي بعد الله في نجاحك لأنها بتعطيك خلاصة فكر وذوق البنات السعوديات , طبعاً لايمكن انها بتلم كل الأذواق , ولكن لو غطت لك 30 % من اذواق البنات في السعودية ... كثر خيرها وحب راسها ورجليها بعد , مع ملاحظة أن الأذواق في السعودية تختلف اختلاف كبير بين منطقة وأخرى ( يعني ذوق بنات الغربية يختلف عن ذوق بنات نجد وبنات الشرقيه يختلف ذوقهم عن بنات الجنوب ... وقس على ذلك ) يعني ما عندك أي مشكلة إن شاء الله , لأنك مو معقول من اول ما تبدا بتوزع على المملكة كلها ومستحيـــــــــــــــــل هالكلام ... صح ؟؟ .

الخطوة الثانية :

بعد ما تجهز لك وحدة من محارمك وتثق فيها , اطلع لخارج المملكة وخذها معك ( محفولة ومكفولة ) يعني خلها تنبسط بتمشى وتفرج ببلاش , وابدأ بزيارة اسواق الجملة أو المصانع وهي معك وخذ رأيها بكل صغيرة وكبيرة وبناءً عليه قرر الشراء من عدمه .
ملاحظه مهمه (( يجب أن تعمل لك جولة على السوق في السعودية قبل سفرك مع نفس البنت , عشان تأخذ خلفية عن الأسعار الموجودة في السوق , بحيث يكون قرار شرائك من الخارج مبني على 50 % ذوق البنت اللي معك , و 50 % على السعر والكمية وهذا بيدك انت , لأن البنت بتفيدك بالذوق فقط وانت اللي تقرر مدى استيعاب السوق من الناحية التجارية لبضاعتك لأن هي ما عندها خبرة من الناحية التجارية ... وصلت المعلومة ؟؟ )) .

الخطوة الثالثة :

حسب كلامك أن راس مالك هو ( مائة وخمسون الف ريال ) صـــح ؟؟
هنا لازم تطلع من رأس المال مبلغ حوالي ( 20000 ريال ) تقريباً وهذي تسميها ( مصاريف بحث وتقصي ) لاتضحك على ... والله صادق لاتضــــحـــك , وهذي نقطة مهمه جدا جدا للجميع , وهي انك بتصرف هذي المبلغ على سفراتك للبحث عن المصادر خارج المملكة .

الخطوة الرابعة :

طيب , لأي دولة تسافر وكيف تلقا اللي تبية وبأقل التكاليف ؟؟
هنا المشكلة الرئيسية , لأن هالبضائع تجينا للسعودية من عدة دول , مثل ( الصين - تايلند - اندونيسيا - الهند - بنجلاديش - تركيا - لبنان - سوريا - فرنسا - ايطاليا - دول امريكا اللاتينية - ................ الخ ) يعني عد واغلط ... طيب !! ماهب معقول انك بتروح لكل هالدول .. صح ؟؟ طيب وش الحل ؟؟ مالك الا ( هيفا ههههههه ) امزح معك , مالك الا تزور المعارض المتخصصة في هالمجال , وفيه معرض يقام تقريباً كل شهر مرة وفي دول مختلفه , يعني تلقا هالمعرض كل شهر في دولة .. وممكن تبحث عنه وهو بعنوان ( fashion week ) يعني ( اسبوع الموضة ) وتشوف حظك عاد في اي دولة سيقام في وقت سفرتك وتزوره .
وفائدة هالمعارض أنك بتلقا مصنعين ومسوقين من دول كثيره جدا جدا يعرضون ما لديهم من منتجات تخص الموضة ( أزياء - اكسسوارات - شنط - جزم ) وكل ما يختص بالموضة وحــــــــــواء , وتطلع عليهم وتستفسر منهم عن الكميات والاسعار وكل شي في بالك , الزبدة انك ماراح تخلص هالمعرض إلا وانت محصل اللي تبيه تماماً .

الخطوة الخامسة :

والله تعبت اليوم ... وبنكمل بوقت ثاني المعذرة .

بعض النصائح والتوجيهات :

برضو والله تعبت اليوم ... وبنكمل بوقت ثاني المعذرة .


لنا لقاء قريب إن شاء الله .... وتراني نساي درجة أولى , يعني لو ابطيت ذكرني برسالة لاهنت , وموفق بإذن الله .

بالتوفيق يا أخي وأنا أول عميل لديك

وأرجوا من الأخوان أعطائنا النصائح والتوجيهات لمن يفكر بأفتتاح محلات للأكسسورات ؟

وفقكم الله

شكرررررررا مليون يافتى نجدعلى هذه المعلومات القيمه جدااااااا