السلام عليكم ورحمة الله وبركاتة

زميلتي تقدم لها واحد أكبر منها ب 14 سنة

من وجهة نظري أنا قلت لها أن كان الرجال سمعته زينه وراعي صلاة وملتزم في عمله
وممدوح توكلي على الله .. عمر الرجال عادي .. والآن لو فرق العمر واجد عقليتهم تغيرت
موب شايب يعني .. بالحيل مايفهم ولايوحي لا بيكون ان شاء الله متفهم خصوصا أنه
موظف في قطاع حلو

وأحس الشباب أغلبهم موكلهم مايبا يتحمل مسؤولية ولارقد ماقام ولاعصب أخلاقه تخرب
وإن تعدل مزاجه زبط الأمور على كيفه يعني . .

وش رأيكم

لاأحد ينطلق علي من الشباب بس حتى بعض البنات ماهم راعين مسؤولية
أقصد الشباب عموما الجنسين طايش هي كلمة وهو كلمة وكل واحد يجاكر الثاني بالكلام
ماأحد يبا يتنازل كل واحد يمسك بكلامه إلا أنا كلامي اللي يمشي ..


يالله بشوف ردودكم عساني أوفق رأسين بالحلال

وعليكم السلام
وحتى لوكان انه اكبر منها ب 20 سنه للأسف بناتنا اصابتهم العنوسه ولاأحد من الشباب يتقدم بسبب الحاله الاقتصاديه كل بيت فيه 4 او5 بنات وعمر الواحده تجاوز 35 و38
اهم شي الدين والاخلاق
اعرف اناس من اقربا ئي وصل عمر الواحده الى 35 و38 ولم يتقدم لهن احد ولازلن في بيوت اباءهن ماذا بقي من العمر

من رأيي.

على حسب عمرها. إذا هي تجاوزت 29 ممكن تقبل فيه. بمعنى قد يكون فرصة مناسبة لها.

طبعا اذا كانت سمعته طيبة وصلاته.

مافيها شيء

بما انه راعي دين واخلاق

الكبير يكون ناضج وباله طويل

وبعض الشباب هداه الله يتزوجها وينساها بالبيت ويسهر مع الشباب في الاستراحه

__________________
ومن يعمل من الصالحات وهو مؤمن فلا يخاف ظلما ولا هضما

على حسب عمرها اذا ثلاثين وفوق توافق عادي .. وعلى حسب اذا عزوبي اومتزوج .. انا ٢٧ سنه وعادي عندي اتزوج شخص غير متزوج حتى لو الفرق بيننا اكثر من ١٥ سنه .. اهم شي شخصيته كويسه

عادي اهم شي عريس☺️

عادي جدا اهم شي التوفيق خالتي موظفه تزوجت واحد اكبر منها بكثير وراتبه جدا بسيط عموما الوقت الحالي مايهم فارق العمر ولا الراتب اهم شي تتزوج وتنستر واغلب الشباب صار يتاخر بزواج بسب صعوبه الحياه والظروف الماديه وبالمقابل هذا الشي انعكس على البنات والله يوفق الجميع دعواتكم

كتبت رد وش طوله وانقطع النت وطااار

عموما ياوخيتي اختصار الكلام اللي كان في ردي هالشيء على حسب عمر البنت وحالة الخاطب الاجتماعية هل متزوج أو أعزب أو مطلق

إذا متزوج يبي لها تفكرر صحح وتنزع الغيرة من قلبها ولازم تكون قوية شخصية لأن كثير تزوجت تحسب الوضع عادي ويوم حبت الرجال

انكوت بنار الغيرة وقل العدل وإذا أعزب ممكن يكون تأخره بسبب تكوين نفسه إذا أخلاقه كويسه فتتوكل على الله طبعا بعد الاستخارة

وودي نوجه رسالة للشباب إذا بغيت تتزوج دور وحدة قريبة من سنك بتفهمك وتحتويك طبعا الكلام مو تعميم بس الأغلب والصغيرات

في هالجيل بالذات غالبا مالهن خلق مسؤوليات وأعيد وأكرر كلامي مو عاام لأن فيه بنات أم ١٨ وعقلها يوزن بلد بس نادراات

والله يوفق صديقتك ويكتب لها مافيه صالح وعليها بالاستخارة.

شوفي زميلتك لازم تفكر من جميع الجوانب لأن هذا زواج ومشروع حياة
أول شي الزوج تسأل عنه في الأمور التالية:
1- حالته الاجتماعية هل هو متزوج أو لا
إذا متزوج فيها كلام هل عنده أطفال أو لا ولا أعزب وإن كان أعزب ايش سبب التأخر !؟
2- حالته المادية وسمعته بين الناس وهل هو مناسب لعايلتها أو أقل مثلاً
3- الأهم من هذا دينه يعني هل هو ملتزم بصلاته هل يدخن هل هل
واخلاقه ، والاخلاق غير الدين ..

إذا سألوا عن هالأمور وصارت كويسة تستخير وتوافق إذا أعزب
والبنت زميلتك هل يخطبونها كثير وضعها الاجتماعي وسمعة أهلها
وتفكر بهالأشياء وتحط الايجابيات والسلبيات

يعني صعبة الواحد يحكم كذا لازم نعرف ايش مميزاته وعيوبه

لكن من رأيي الشخصي إذا اللي يخطونها قليل أو وضعهم الاجتماعي متواضع والرجل مميز في دينه واخلاقه وسمعته وأعزب تستخير وتوافق والعمر شوفي أكيد في البداية تمشي الحياة واكيد بتواجه صعوبات في التفكير لأن الزوج مو في نفس مستوى تفكير جيلها فطبيعي الاهتمامات مختلفة ولازم تراعي هالشي في حال أنها وافقت وحتى الزوج نفس الشي

وقبل كل شي هو التوفيق من رب العالمييين هو أهم شي
لكن مسائل الزواج لازم تفكر فيها كثير خصوصاً في مثل هالحالات

والله يوفقها ويسعدها ويكتب الخير لها يارب العالمين

بالتوفيق للعروسين