السلام عليكم
اول شي احب اقول إني دخلت هالوظيفة بهدف التعلم واكتساب الخبرة في مجال المحاماة ولم يكن للراتب اي أولوية لأن الراتب ضعيف للمحامي المتدرب وتلقى وظايف كثيرة كاشير واستقبال اللي ماتحتاج مؤهل جامعي تعطي رواتب أكثر
أنا لي 3 شهور أعمل بالمكتب وللأمانة الشغل متعب جدا جدا
مشكلتي إني أشتغل عند محامي يتوقع إن ماعندي شغلة بالحياة إلا هو لدرجة إن وقت دوامي ينتهي ويطلب مني بعض الطلبات اللي فيها مشاوير طبعا لأن مثل ماهو معروف المحامي المتدرب يصير معقب ومحامي بوقت واحد فمثلا أحد المرات الساعة 4 انتهى دوامي برجع البيت يكلمني يقول وانت رايح مر على الغرفة التجارية وخلص شغلة عشان بكرة علطول تروح لمؤسسة النقد أنا طبعا أصرفه اقول مشغول أو شي من هالقبيل ماقول دوامي انتهى !
مشكلة المحامي هو يبيك انك تكون نظامي ومنضبط وبنفس الوقت هو مو نظامي لا من ناحية نزول الراتب ولا وقت الإنصراف ولا بعض الأعمال اللي خارج حدود عملك !
أنا مضطر اتحمل بعض الأمور لأني أبي أتعلم المهنة !
بالإضافة إلى أن تعامله سيء ودايم يحط اللوم عليك وكل شي يتوقع يمشي بالأسلوب ويتكلم دايم ويلمح بمعنى لو كنت مكانك لحليت المشكلة بس انت ماعندك اسلوب !
يعني مثلا طلب مني حضور جلسة وماكان معي وكالة عامة قال معك تفويض وانت باسلوبك تقدر تجيب ... ولما رحت الشيخ قال معك وكالة عامة ؟ نعم أو لا ... معك تفضل مامعك توكل على الله
...
وش رايكم انا افكر جديا اقدم استقالتي واروح لمكتب ثاني بس أخاف تكون نقطة سلبية بالسي في لما يشوفون اني اشتغلت 3 شهور ومشيت بيتوقعون إني لعاب مثلا
مع العلم إن والله ماعندي مشكلة بالتعب والنظام بس بحدود عملي ويكون النظام على الجميع

زين عطوك وجه مكاتب المحاماه
ورى طيب يصرفونا حنا يالبنات؟؟؟
والمشكله اطلب بدون راتب لكن الله يعين بس
القسم هذا عطاااااله للحريييم الا اللي بتدبر نفسها يسار ولايمين
بالنسبه لمشكلتك ان شالله يفيدونك الاخوان والاخوات هنا

انا كنت زيك ابغى اتعلم العمل الاداري انا خريج ادارة فستغلوني كثير بس كان في مردود مالي عالي فهذا كان مصبرني لين ربي رزقني بوظيفة حكومية راتبها ومستقبلها عالي رغم انها تشغيل ذاتي لكن ملامح المستقبل المشرق بإذن الله انرسم
فاوصيك ونفسي بدعاء فوالله اني على ما قوله شهيد اني لازمت الصلاة باوقاتها ودعيت ربي ففرجت لدرجة اني بكيت من ان الاماني بدت تتحقق وتحق مالم كنت احلمه وتحقق حلم الوظيفة وغيرها من الاحلام فأشكرك يالله

أخوي / فرصتك ان يكلفك المحامي بكل شيء حتى وأن تعبت ف مدة معينه راح تعرف كل كبيرة وصغيرة
وهالشي لصالحك طبعاً ، لو بتروح مكتب ثاني ممكن تقوم بأعمال محدة وانت مرتاح ، لاكن بتلقى نفسك ماتعرف الا اشياء بسيطه ،



الخبرة دائماً الحصول عليها صعب ، والأصعب انك تاخذ خبرة بعدة جوانب في عمل واحد ...!

الحياة ماتجي على الكيف
لاتطلع من المكتب إلا أنت ضامن مكتب ثاني يعجبك

الخبره الخبره الخبره

أشكركم جميعا على المرور
بخصوص اختي قانونية صحيح كلامك مجال المرأة في المحاماة ضيق جدا مع انه بالوقت الحالي كل يوم عن يوم يتوسع أكثر
في مكاتب توظف محاميات متدربات وانا شفت بالمحكمة محاميات متدربات
يعني فيه مجال لكم

اعتقد في مجالك انت بالذات تحتاج انك تتعلم كل شي لأن هذي مهنة ما راح تتطور فيها الا بالاحتكاك مع المحاميين والاستفادة منهم

حاول تتعلم والله يعينك

من رأيي تصبر. بالعكس لو البيئة عادية وطبيعية ماكنت رح تتعلم.

وبالمناسبة إذا أنت تبي تخرج. غيرك يبغى يحصل على هالفرصة يتدرب.