السلام عليكم

ياشباب دائماً افكر بمشاريع للعمل فيها واستوقفتني 3 مشاريع اولها محل خضار 2- سوبر ماركت كبير 3 محل بيتزا كبير 10 ريال لكن تنقصني المادة وقدمت على الشركات والمؤسسات اللي تدعم لكن ماعندك احد والله ماعندهم سالفه , انا جالس 10 سنوات من ايام الثانوي عاطل باطل ومعي شهادة الثانوي وفكرت اني اتوظف في بيتزا هت ( كاشير ) راتبها 5 الاف ريال واحس ان بيتزا هت ماعليه اقبال بكثافه داخل المحل مثل هرفي وكنتاكي لان اتحرج من الناس لكن تدرون وش المشكلة ؟ ( المجتمع ) .. استحي اني اتوظف بمطعم بحكم علاقاتي مع الناس افكر لويشوفني احد اعرفه من زملائي او من الحارة او من اقاربي وش بيقولون علي ؟ خاصه وان هيئتي اللي يشوفني يقول شيخ فاضل وانا ماعندي علم ولا شي فقط هيئة وسبق وأميت مساجد كثيرة يعني بالعربي معروف اني ( ملتزم ) .. هذي العقبة اللي مستوقفتني واللي استحي منها ومأثرة علي ومسببة لي ازمة كبيرة , فكرت اني البس كمامات طبية ( الزرقاء السماوية ) + مع القبعه(الطاقية) حقت بيتزا هت احس محد يعرفني خاصه اني بعد البس نظارات طبية يعني اللي بيجي لو بشوفه اعرفه لكنه مايعرفني ههههههه .. والله اني افضل أجلس عاطل باطل ولا اشتغل بمطعم او محل تجاري عشان مايعرفني احد .. وبعد بقولكم شي : اختياري لبيتزا هت مناسب لي لاني بفتح مشروع بيتزا ان شاء الله ( مطعم بيتزا كبير 10 ريال ) واحس بعد ان المحل اللي تفتحه انت من راس مالك وتشرف عليه افضل واهون من اني اشتغل داخل محل براتب

وش رايكم ؟ عطوني رايكم بالله وتكفون لااحد يستهزي هههههه

وفيه سؤال عن الدوام من كم لكم ؟ وهل فيه دوام صباحي ومتى يبدأ لو فيه ؟ لاني باخذ دوام كامل
وهل اقدر آخذ قرض من البنوك او اقسط سيارة ؟ يعني هل بيتزا هت معتمدة لدى البنوك ؟

سؤال للي مجرب : كيف الدوام معك ؟ من ناحية الراحه النفسية والجهد هل هو كرف ولا عادي وشغلك يكون واحد كاشير فقط مالك علاقه بالشغلات الثانية ؟ وهل لك وجبة باليوم ؟ وماهي المميزات ؟

انا اشوف ان الشغل ماهو عيب مهما كان .. طالما بتاخذ راتب مناسب نوعا ما .. وبعدين المفروض خجلك من انك عاطل عن العمل من ١٠ سنين يكون اكثر من خجلك اذا اشتغلت في مطعم او محل تجاري .. توكل على الله واشتغل .. وبالتوفيق لك

؛


أكل العش مُـرّ ي خيوو ,,
وبعدين أكيد انتا مو مبسوط من قعدتك ف البيت 10 سنوات
( انا قاعده شهر ونص وطفشت ) ..
تآني حاجةة : إنتا تدور لقمة عيشك بالحلال يعني بتشتغل وبتآخد آجر تعبك
ف لاتقول أستحي وما استحي , زي ما قالت هند الشغل مو عيب مهما كآن ..
فـ مهما كآنت الوظيفه اللي لقيتها منآسبة ( لك ) ومالك ومال الناس , قدّم عليها
وعيش يومك , وماعليك من أحد .. دآمك مرضي ربك ثم مرضي نفسك
لا تدي للنآس أكبر من حجمها ( محد له دخل فيك )

ربي يكتب لك اللي فيه الخير

اذا علئ نظرة المجتمع وشايل همها هالمجتمع مو صارف عليك ولا يجي يطق بابك كل شهر يعطيك بدل استهزاء عن وظيفة تكسب منها رزقك
بالعكس المفروض تكون نموذج يقتدي به غيرك
ولد خالي بسادس ابتدائي ويشتغل صبي بمحل وياخذ يوميةليش ما انحرج من نفسة


الفرص لكم يالشباب كبيرة مومثلنا

الله يوفقك وقدم اوراقك

ياحبيبي مجتمعنا فاشل
تبي تفشل مثلهم لاتتوظف
الله يصلحك بس
توظف بس وكون علاقات
وخذ خبره
وراتب زين
ولاتقعد طول عمرك عندهم
وبعدين ماتدري اذا شافوك ممتاز ممكن يخلونك مراقب
او مدير أو مفتش أو أو
توكل على الله ولاتهتم بالمجتمع التعبان هذا

[align=center]ياخي كيف متحمل جالس 10 سنوات عاطل
انا سنه واحس اني بنجن مع القهر والطفش
طيب بسالك انت ما استحيت وانت تطلب من امك وابوك دام تسحتي من الناس
يارجل ايش بيقولوا عنك فلان الفلاني يشتغل بمحل بيتزا ويضحكوا مثلا ؟
لا يارجل تكفير الناس تغير جدا بالعكس يدعولك بالرزق .. انا لما اشوف سعودي
يشتغل بكوفي او مطعم بالعكس افرحله ما انظرله نظرة شفقه لان بيشتغل ويكسب من تعبه ومجهوده
ياخي العقليات تغيرت واحنا لازلنا نستحي من الناس واذا المشكله بدقنك ما اعتقد انها مسببه للاحراج
انت يمكن شهر او شهرين تشتغل محاسب بعدها اداري ماتخلتط بالزبائن كثير
الناس اللي تهتم لهم ماراح يصرفوا عليك #كبر عقلك ياصديقي
اسف ع الاطاله ..
[/align]

اخوي ..لاتشتغل هالشغلات اذا ماعندك قابليه لها..اهم شي الراحه النفسيه وانا اخوك..لان اذا منت مرتاح فيها كل يوم راح يكون مالك نفس للدوام..وللعمل ..

انا من رايي اشتغل معقب في احدى الشركاات .. يعني تراجع في الدوائر الحكومية..احسن لك.. الدوام من 8 ليمن 3 الظهر..

ولاتقوول ماتعرف ..كلنا اول مادخلنا مجال العمل مانعرف شي ..من جنبها بس كل يوم راح يستجد لك شي جديد

وشكرا لك

اهم شي تكون مرتاح نفسيا عشين تتقن عملك هادي امانه ورزقك بيكون حلال

أنا مع اللي قالوا لك توكل ع الله واشتغل ف مطعم بيتزا دام انت طموحك تفتح محل بيتزا هذا من صالحك عشان تفهم الشغل مزبوط وتشوف المبيعات وكذا وتعرف فين تفتح بعدين اعتبرها هالفتره تجهيز لبزنسك القادم .....وانسى الناس ومالك فيهم انا اشوف كل الشباب يشتغلوا بهالاماكن المطاعم والمولات من ملابس وكذا والله انهم يرفعوا الراس مافي حيا ولا حاجه والله اننا نفرح فيهم ...........

بس انت وكل امركـ لله وقدم وان شاء الله تتوفق وحتترقى ان شاء الله الحين هالاماكن فيها مستقبل بعد السعودة هم الحين شوي شوي قاعدين يستغنوا عن الاجانب ويحطوا مكانهم سعوديين ............

وصدقني لو اشتغلت بهالاماكن حتحس عادي والتخوف اللي كان عندك صدقني اسبوع اواثنين وحيروح أسأل مجرب ....وشوف عندك الشباب اللي كل مالهم ف ازدياد وكذا وبعدين هذا بلدنا أن ماأشتغلنا أحنا فيها وخدمناها مين بيخدمها احنا اولى فيها من هالاجانب ......

والله يوفقكـ ياااارب ويفتحها عليكـ ويرزقكـ من واسع فضله

اما انك تستحي عشان ملتزم او عشان الناس

الثقه بالنفس لو تشتغل سواق جدااا عادي

وانا شايفة كمان صارو كثيؤ سواقين سعوديين

للمعلمات والطالبات والعاملات.....اشبهم ماستحو

المهم الله يوفقك وكل مسلم لكن اشتغل اللي تبغى والشغل مو عيب