هلا بالجميع

بدون مقدمات ابطرح قصه مشروعي منين بديت ووين وصلت وتجارب مريت فيها .

تبدا القصه بتخرجي من الثنوي تخرجت وانا كلي امال واحلام وهمه عاليه وفي بدايه الطريق واجهت اول عقبه الي هي وش اسوي بعد التخرج لان مافيه احد يوجهني او قدوه لي وقفت عند مفترق طرق ماادري وين اروح ولا وين اتجه بعد تفكير قدمت على جامعه القصيم لاني من سكان بريده سويت مثل ربعي الي تخرجو معي بدون تفكير وكل ماشاورت احد قالي ادخل الجامعه قلت مثلي مثل غيري وفعلن اقبلتني الجامعه خلال قبولي بالجامعه اخذت ابحث عن وظيفه وتوظفت اول وظيفه لي حارس امن بعد مرور سنه او سنتين كنت ادرس بالجامعه الصبح واشتغل باليل خلال الفتره ذي حولت اكثر من مره بين اقسام الجامعه بيطره اقتصاد شريعه واشتغلت اكثر من شغله باليل حارس امن كاشير استقبال مشاوير بعد سنتين من التنقل والبحث عن نفسي انا ادري ان عندي همه وتحمل المسؤليه وقدره على المواجهه عارف نفسي بس مدري وش حلمي او وش مويلي وفي احد الايام ركبت سيارتي الخرده وتوجهت للبر وقعت افكر وش ابي وش ميولي وبعد تفكييييير عميق لقيت اني احب التجاره بيعه شريه والسبب ان التجاره ممتعه كل يوم احداث جديده فيها مغامره وكل ماتتعب زياده تستفيد زياده غير انك مدير نفسك واكثر الوظايف الي تركتها بسبب يسير مديريك هندي ويرفع صوته عليك اذكر وظيفه توي داخل اوول يوم رايح اوقع وسار مديري بنقالي مدري نيبالي اول ماشافني قال ( قرقر زياده مايبغا ) عجزت اتحمل كوفنته الين داخ بديرتنا ومتفرعنين علينا وطبيعي اني انطردت هنا حددت هدف التجاااااره اول مشروع بعد تفكير محل خضار انا اوضاعي الماديه مزريه كان لابد ان ابحث عن شريك بعد معاناه طويله اتفقت مع احد الاصدقاء بالجامعه كانو تجار كان يمديه يوفر مبلغ 20 الف لاكن مافيه سياره هو مايسوق وانا سيارتي سكراب كبر علبه الببسي هنا تذكرت المغامره قلت له عطني شهر خلني احاول بعد عنا لقيت احد الاقربا انسان جميل قلت له القصه وقلت ابي اطلع سياره ونيت اقساط وانا الي ادفع الاقساط انت مجرد اسم وافق الرجل فرحت وخفت فرجت اني وفرت سياره للمشروع وخفت لان قسط السياره 1200 ريال وراتبي وقتها 1500 ريال بس توكلت على الله وطلعت السياره يوم طلعتها من الوكاله واتصل على الي يبي يشاركني بالمشروع وكان الاتفاق انه يوفر 20 الف وانا اوفر السياره يوم اتصلت عليه قال هونت عن المشروع هنا انا شوي وياقف قلبي من الي سمعته سكرت الجوال ورجعت الوكاله ابرجع السياره ومن شين الحظ اني اخذ السياره من بنك الراجحي وبنك الراجحي مايرجع السياره ولا يخليك تجيب واحد وتنازله عن السياره يعني لازم تسدد ولا يشتكون على الي بسمه السياره انا هنا شوي وافقد الوعي من الصدمه كل الي همني بالموضوع الي بسمه السياره مصيبه الرجل وثق فيني سوا فيني معروف اتجهت للي حولي ابي مساعده الكلام هذا قبل 3 او اربع سنوات وقتها كان عمري 20 تقريبآ يعني بزر ومصيبه والي حولي كلن يقول وش دخلني صرف روحك كانت اشين ايام عمري كنت اشتغل طوووول الشهر وكل راتبي يروح للقسط ويبقا لي 300 ريال كانت هذي اول تجربه لي واول مشروع لي واول كارثه لي حبيت اذكر اول محاوله لي بالتفاصيل بعدها توالت الاحداث ومن مشروع الى مشروع ومن فكره الى فكره ومن كارثه الى مصيبه كان معي اثنين من الشباب كنا نجمع وندخل في مشروع صغير ونخسر الى درجه انا استاجرنا خيمه بمزاين ام رقيبه وحطينا فيها بقاله مصغره <عفرته وقراده فريده من نوعها > وكال معتاد خسرنا بعدها تعبت ومليت هنا استرحت استراحه محارب وقعدت مع نفسي وقعتد افكر لقيت على كثر الغرابيل والمشاكل الي مرت علي الا اني كنت مستمتع او كنت حاب المحاوله وتكرار المحاوله واكتسبت خبره بالحياه وبالرجال ومعادنها يعني ماهي خساره او فيه نتيجه من كل هالمشاكل بس ماوصلت لنتيجه هنا قررت اني ابدل بعض الامور لاني لقيت نص طموحي او توجهي بس بالتحديد مادري ايش وقتها معدلي بالجامعه كل ماله ينزل وجاني ارهاق غير طبيعي جامعه ودوام 8 ساعات وتاخر باليل وعرفت ان مالي توجه بالدراسه وقتها كرهت بريده كل شارع يذكرني بشي سحبت ملفي من الجامعه ونقلت العمل الى عنيزه كنت ما اجي بريده الا وقت النوم لان بيتنا فيها ولا كان ماجيت بعد جلست فتره على هالحال بعدها مليت لاني ماتعودت اني اجلس فاضي اغلب الوقت وبما ان اغلب وقتي فاضي اجلس على بالساعات خلال تصفحي طحت بالكرفانات الكرفان للي مايعرفه هو شقه صغيره تسحب بالسياره يعني شقه من حمام تكرمون واسره نوم ومطبخ وجلسه صغيره تسحبها بالسياره وتسافر وين ماتبي انا راعي بر وطلعات وتمشيات جازتلي الفكره بقوووووه لاكن كان اعجاب فقط تطورت الفكره مع الوقت قلت ليش مااسوي كرفان صغير واسوق له وابيعه ان نجح كان بها مشروع ممتاز وان مانجح انا استخدمه يعني مافي خساره رحت ولفيت ولقيت ان المواد الي يصنع منها ماهي موجوده عندنا بالسعوديه وان وجدت تكون غاااااليه جدآ هنا دخلت مواقع الشركات المصنعه عرفت المخططات وكل التفااااصيل كان لابد ازين مخطط من المواد الي عندنا بحيث يكون الكرفان خفيف جدآ يحركه شخص واحد من خفته وبعض المواصفات اتحفظ عليها بحيث يكون نفس مواصفات الكرفان الاوربي بس بالمواد الي عندنا واجهت صعوبه بس على صعوبه الامر ودقته الا اني بدعت بالامر الى درجه ان انصدمت بنفسي هناااا اكتشفت موهبتي وعرفت الشي الي ابرع فيه بعد ماضاعت سنوات من عمري هدرر بعد مااكتمل التصميم ووضعت مخطط للكرفان بكل تفاصيله قلت مادام اني عرفت وجهتي ليش ما اتعلم الحرف الازمه للمشروع وانا الي اشتغل بيدي لاني احب <العفرته> يعني احب اشتغل خصوصآ بالشي الي احبه ذهبت الى الورش قلت ابي اتعلم عندكم ساعه باليوم واعطيكم الي تبون كل ورشه يتعذرون لانهم من جنسيه وحده ولايبون سعودي ينافسهم او يتعلم صنعه بختصار خليتهم واخذت دوره تدريبيه كامله من العم قوقل واليوتيوب شرح يحبه قلبك من مكينه الحام الى صنفره الخشب ومن قطاع الحديد الى الامنيوم كل هذا نظري بس اخذت معلومات كااامله وجاهز للتطبيق الان المخطط جاهز وانا جاهز باقي راس المالي الي معقدني بحياتي منين اجيبه . الفكره والمخطط والتعلم اخذ مني قرابه الشهر بقا راس المال انا شاب على قد حالي منين اجيب لفيت على رزق جميل و بنك التسليف والمئويه كل حقين دعم الشباب او المشاريع الصغيره وكل ماجيت واحد عطاني شروط تعجيزيه احد الجهات يقول هات كفيلين منين اجيبلك شي يرفع الضغط الزبده محاوله اخذ قرض اخذت مني 3 شهور وبدون نتيجه اخر شي قلت الشكوى لله نشوف شريك براس المال وانا بالجهد بديت اعلن في احد المواقع قبل لا اعلن كنت مسوي دراسه للمشروع كااامله وكان ناجح لان الكرفانات المستورده تكلف 180 200 الف ريال الي انا ابسويه بنفس المواصفات بسعر يبدا من 18 الين 30 الف حسب المواصفات بعد التسويق له مستقبل باهر الزبده بعد مااعلنت قعدت مايقارب 5 شهور وانا كل يوم اقابل 2 او 3 وكلهم من يدرون اني ابشتغل بيدي على طول يعتذر ويمشي لاني سعودي وبما اني متعود على المحاوله كل مره اقول اغدي تزين الامور وارجع اعلن قابلت نص اهل الرياض بالمجمعه انا اجي نص الطريق وهم ونص وكلهم نفس الطريقه ااااخر شي قابلت واحد من اهل بريده انسان جميل شرحت له المشروع كامل وبينت له كل شي اتفقنا وبدينا بالعمل دبرت انا المكان وبديت بالتنفيذ والتطبيق وانصدمت بشغلي اول مره امسك عده بحياتي وبدعت بالشغل كنت اداوم اليل كله واصلي الفجر بالبيت وابدل واتجه لصناعيه وشغل الين الساعه 1 او 2 الظهر الين احس انه بغمى على من التعب لاني مواصل وجوعان بس كنت ما احس لاني مستمتع جدآ جدآ جدآ بالشغل حتى اني قدمت استقاله من العمل حتى اتفرغ للشغل من كثر الحماس وانبهاري بالشغل الي سويته قلت خلاص دام هذا الشغل نجحنا انشالله بنص الشغل انسحب الشريك لان دراهمه قضت واوضاعه ماهي بعيده عن اوضاعي

هذي صوره للكرفان بنص الشغل


كان بينا اتفاق اذا نجح الكرفان يكون بينا مشروع رسمي والنص بالنص واذا ماانباع ياخذ الشرك الكرفان وانا ما اخذ شي قلت اضحي لاني كنت متامل خير بالمشروع وواثق اني اببدع وبما انه كان بينا اتفاق الكرفان ما اكتمل يعني ماراح ينباع اخذ الكرفان وراح وانا ما استفدت الا التعب والقراده كالمعتاد بس استفدت خبره وحسيت اني تقدمت خطوه كبييييره جدآ بالمجال .
بعد الي سار رجعت اعلن من جديد على امل نبدا من جديد لاكن بعد مرور 4 اشهر ماقدرت اسوي شي لاني بكل بساطه شاب سعودي

بعد ما اقتنعت ان مافي سبيل الى حلمي قلت يالله ناجل الحلم نخليه بعد الوظيفه وبعد مانتزوج لان الواحد سار يخاف على روحه بزمن الفتن اذا استقرينا نرجع نحاول من جديد

ويوم دورت وظيفه مالقيت لان اهل الواسطات ماهم مخلين لنا مجال

الان نفسيتي تعبت لاوظيفه ولا راس مال ودين السياره وراس مالي 150 ريال كل هذا عادي الي يفك الصدر يجي شايب ولا واحد من الشعب ويقول شبابا ضايع اخخخخخ بس

بنهايه اسف على حوسه الموضوع لاني اكتب وانا ضايقن صدري بالحيل اعذرونا