السلام عليكم
ماخاب من استشار
محتار جداً واحتاج نصيحتكم

جاتني وظيفة حكوميه ع المرتبة الخامسه
وانا حالياً اعمل في شركة مرموقة
براتب 9000 غير التأمين الطبي وخط مجاني
ومعروف المرتبة الخامسه راتبها حول 5200
يعني فرق كبير في الراتب والمميزات

نصيحتكم اروح أكمل اجراءتي في المدنية
أو أبقى في شركتي الحاليه
خاصة أن علي قروض ومتأهل

وشكراً لكل من أعطاني رأيه.

وعليكم السلام

نصيحتي خلك على اللي انت فيه بما ان وصل راتبك إلى هالمستوى يعني اكيد راح يزيد مع اجتهادك وخصوصا ان عليك قروض وديون
لكن في الحكومه تحتاج سنوات على مايوصل راتبك لهالمستوى

لو ان راتبك الحين حول 6 ألاف نصحتك تروح الحكومية ، لكن بهالفرق الكبير .. ماانصح

والحكومه ان شاءالله مهيب طايره ، بيجيك ان شاءالله تعيين بمكان ثاني ..
فوتها هالمرة وبتجيك ان شاءالله فالوقت المناسب

وانت استخير وتوكل على الله

وعليكم السلام ورحمة الله وبركاته

الي يميز وظيفة الحكومه انها امان للمستقبل بعد الله يعني مافي احد يقدر يطرد مثل الشركات ممكن تستغني في اي وقت

ولاكن اشور عليك تبقى في شركتك وتحاول تأهل نفسك يعني تاخذ شهاده جامعية مثلاً في مجال عملك مثلاً في الشركة واذا معك جامعه تاخذ ماستر

وتصير متأهل لمرتبة أفضل أو وظيفة افضل او تعمل بزنس خاص فيك وتستقل بذاتك

أفضل حل ممكن اقوله لك صل استخاره والله يكتب لك الي فيه الخيره

أنصحك تبقى على وظيفتك الراتب جيد ماشاء الله غير كذا القطاع الخاص الترقيات فيه أسرع ممكن تترقى ويزيد مرتبك بإذن الله.

والله شف

اذا انت انسان تحب الفله والراحه و الاستكنان .. رح للحكوميه لكن الراتب لك عليه وترقيات بالقطاره
اذا انت انسان تحب العمل والضغط والكرف .. خلك في شركتك لكن راتب كويس وحسب ادائك يرقونك

هذا الفرق بين الثنتين وسلامتك

انا الحين شغال في شركة دوامين صباح ومساء وكرف وملعنة ولي كل اسبوع 20 دقيقه تاخير .. بعدها خصم .. لكن عندي مكافات كل سنه نزلونها بحسابي تعادل 6 رواتب وتزيد كل سنه بحسب ادائك وقروض ميسره من الشركة بدون فوائد وامتيازات كثيرة
لكن لو تجيني حكومية والله ما افرط فيها حتى لو راتب اقل ..لاني حاسبها على المدى البعيد بكرة بتزوج ويجيني عيال وبعدها ارجع البيت ارقد واقوم اداوم .. لاحظت اغلب اللي معي موكلين بيتهم للسواقين والخدامات لان ما عندهم وقت ابد .. وانا ضد الشيء هذا
وكل واحد ووجهة نظرة وانت حر

انصحك تقدم على الوظيفة الحكومية
وبعدها تفتح لك مشروع عشان
يكون عندك مصدر دخل ثاني
~ بالتوفيق

أخوي أمجد أول شي أستخير
ثانيآ يالغالي أنا مثل ظروفك تقريبآ انا أعمل حاليآ بقطاع خاص وجأتني وظيفة حكومية الحمدلله وأنا ان اشاءالله قررت أروح للوظيفة الحكومية لأنه تقريبآ نفس الراتب ولا يفرق معي إلا التأمين الطبي .. فأنت بعد ما تستخير راح يبين كل شي وكنصيحة بالنسبة لك القطاع الخاص أفضل لك وخاصة إذا فيها مميزات مثل الزيادات السنوية و المميزات الاخرى لأن بعض الشركات يعطيك راتب ويكون هذا راتبك طول عمرك وبالتوفيق لك كان في قطاع خاص او قطاع حكومي

أتوقع انت ما سألت هالسؤال الا عندك مشكلة في عملك الحالي !

بالنسبة لي اهم شئ الراحة النفسية

يعتمد على طبيعة العمل في القطاع الخاص كم عدد ساعاته وكم يوم في الأسبوع وهل أنا مرتاح نفسيآ وأقدر اسوي اللي ابيه بدون ما يأثر عملي على حياتي

ومثل ما قال العضو الرسايل .. لا تخلي دخلك معتمد على الوظيفة .. كثيرة هي المداخليل الاخرى بس تحتاح لتفكير

الفكر السائد بين الشعب هو أن الوظيفة الحكومية هي الأفضل
وهذا خطأ
فالقطاع الخاص هو الأفضل للشخص من الناحية المادية وأيضاً من الناحية المعنوية
فعندما تجتهد يا استاذي في عملك في القطاع الخاص، سيقابل ذلك زيادة في مرتبك
وكلما ازدادت سنين عملك في القطاع الخاص، كلما زادت قيمتك في سوق العمل
يعني إذا طلعت من شركتك الحالية لشركة أخرى، ستجد زيادة في راتبك لأن سنين عملك تفرق وظيفياً
أرى أن الشاب يدخل القطاع الخاص ولا يتعذّر بالتعب لأنك إذا لم تتعب وأنت شاب، فلن تتعب إذا كبرت
ومرحلة الشباب مرحلة تأسيس، والتأسيس يتطلب أدوات أهمها المال، والوظائف الحكومية للأسف رواتبها متدنية جداً جداً جداً ولا توجد بدلات نهائياً سوى بدل نقل يطير مع التأمينات
بالإضافة إلى أنك في الوظيفة الحكومية لن تكتسب خبرة كبيرة، أغلب الموظفين الحكوميين يأتون للعمل لسعة الصدر والوناسة وبالتالي لن تجد منهم أي خبرة عملية بعكس الشركات التي تحتك فيها بطاقات عمل متمكنة تستخرج وتكتسب منهم خبرة عملية تقوي سيرتك الذاتية.
هذه مجرد وجهة نظر مجوفة بنصيحة من موظف تشغيل ذاتي انتقل لقطاع حكومي، ولكنه انصدم من القطاع الحكومي وعاد للتشغيل الذاتي وعاش حياته.

موفق يا صديقي

السؤال المهم

وش الدافع أو الدوافع اللي تخليك تبحث عن وظيفة أخرى غير وظيفتك ؟
ما دام على كلامك الشركة مرموقة ، و راتب ما شاء الله 9000 ، بينما الحكومية على الخامسة يعني أتوقع حول ال 5000 ريال ، فأنت فكر فيها وش العيب اللي في وظيفتك علشان تتركها من أجل وظيفة براتب 5000 ريال ؟ أو في المقابل ايش الميزة اللي في الحكومية علشان تروح لها و تستغني عن فرق راتب حول ال 3000 إلى 4000 ريال ؟

هذي الدوافع ، هل هي مشاكل و عيوب في وظيفتك أو شركتك الحالية ؟
هل هي تخطيطات معينة و الوظيفة الحكومية ستساعدك في تحقيقها ؟ ( دراسة مسائية أو مشروع خاص أو ما شابه و بالتالي الحكومية دوامها أقل و الاسئذانات فيها أسهل )