السلام عليكم ورحمة الله...شكرايكم بفكرة باص بالصباح نقل مدرسي ونقل خاص ......عطوني خبرتكم هذا اللي رسيت عليه اخر شي تعبت من التفكير مابه خساره كبيره ومضمون...انا المسؤوله عن هالمشروع وبديره من بيتي بس كيف اضمن نجاحه ...كيف اطلع كم راتب العامل وكيف اطلع قيمة الصيانه والبنزين ومربحي وكيف اضمن السواق ما يلعب بذيله من وراي ويشتغل على حسابه الخاص...هل لازم ترخيص انا ابيه دخل لي اضافي بما اني تابعه لضمان الاجتماعي تعرفون الظروف والمعيشه صعبه ...ابي شغلي في السليم مو يقولون ماعندك ترخيص وزحمه..اشوف ناس كثير مشغلين سواقينهم توصيل مدارس ومشاوير خاصه ابي اضرب عصفورين بحجر منه لعيالي يوديهم ومنه لمشاويري هلكتني اللموزينات اهم شي ابي كلام واقعي ونسبة نجاح المشروع وكيف اتحاشا الخسارة واحافظ على استمرار هالشغله وكيف مخسر السائق يعني اكسبه لانه اخو احد صديقاتي بالدراسه وناس على قد حالهم وحيدهم الولد ابي الاجر لوظفت ولدهم الوحيد له سنتين متخرج من الثانوي وعوطلي يدور وظيفه حتى يعيل مسؤولية 3 بنات واب وام..مبي اكون ظالمه براتبه لانه بيتعب من هالوظيفه مو سهله بس تدخل ربح ممتاز..بالتوفيق

مشروع ناجح بذات نقل المعلمات لو تاخذين اقل شئ 300ريال على كل معلمه والموجودات 5معلمات كم يطلع ؟
بس اهن مايرضن يبن سواق ومحرم لهن
والطلاب بعد افضل
هذا مالدي والله يرزقنا وياكم



ــــــــــــــــــــــــــــــــــــــــــــــــــ ـــــــــــــــــــــــــــــــــ
ادعولي بقبولي بأحد الكليات المرغوبة

بالنسبة للراتب أعطيه نسبة على كل طالب
بحيث يستطيع جمع اكبر عدد ممكن
وبعد إيصال الطلاب أتركيه يترزق الله وبنسبة أيضا
وفي النهاية كل شيء يرجع لأمانة السواق

اطلع معهن وش وراي محرم لهن
-بس كم النسبه اعطيه حنا النقل في نفس المنطقه 150 ريال ذهاب واياب ؟
-المدرسات مدري كم اسعارهم بسال لي مكتب واشوف كم ياخذون
-نقل الخاص اعطيه باليوم من حقت المشاوير والا نهاية كل شهر

كيف احافظ عليه انه يستمر يعمل معاي لان طبعي متشدده بالتوقيت ولا توقيت جرينتش بكل شي...كل شي يهون لكن لقلت وقت لابد بنفس الوقت اللي قلت يجي لاني انا اعطي وقت حاسبه فيه كل شي بيسويه مع الاحتياط يعني ماله عذر بالتاخير ..مبي اخسر اي شخص يعمل عندي بالتوفيق

السروري اخوي وش الفايده كيف بطلع ربح لي وارجع راس المال وادفع راتبه والبنزين والصيانه؟
مستفدت شي

فكره ممتازة
لا
تتردد
بالتوفيق

بالنسبة للفكرة جيدة وممتازه

وللسايق ليش ماتشاركينة يعني هو بجهده وأنتي بالباص
والربح مقسوم بينكم %كذالك مصروفات السيارة فواتير تكون بينكم
مايمنع من ذالك أنه يشتغل مشاوير غير الطلاب والمدرسات والأرباح%
منها تكسبين ثقته وأبن جلدتك ومعرفه ,,,,,,,,,,,,,,,,,,,,,
صدقيني ماراح تندمين أن شاء الله
وبتوفيق للجميع

والله اسم على مسمى يالمكافحة وفكرة ولا اروع وجبتيها وانا ماني باخله عليك بافكاري والقصص الي عندي كثير بالنسبة للسواقين والعمالة الي اكلونا وشبعو من خير ديرتنا وعيالنا الي نايمين يحترون المكاتب والكراسي (عسى الله يهديهم)
انا ساكنه غرب الرياض وفي فترة الصباح في اوقات المدارس طبعا مانكون في البيت انا ومي مسجلين في تحفيض القران وختي الصغيرة في المدرسة والي يودينا لمدارسنا باص سوداني
يأخذ على الوحدة 150 ريال في الشهروبيتنا اقرب بيت للمدرسة يعني في الشهر 450 ريال هذا غير الباص المليان ودفعات البنات والامهات هذا غير الى ينسحبون من الدراسه في الصبح بعذر مافيه نقل كافي
وما يحتاج محرم في الباص اهم شي ستارة بينا وبينه مصكرة وسمعة محترمة عند الحريم مايناضر ولا يتكلم معاهم
انشاء الله اذ بديتي مشروعك يحط اعلان على الباص نقل طالبات من اول يوم وانشاء الله خير من الله جاي
ولاتنسينا من الدعاء في ظهر الغيب
واذا تبغين اي خدمة انا فاضيه وتحت امرك

يسلمكم ربي ما قصرتو...اختي الجريحه جزاك الله خير...انا الفكره ماطرت بالي الا بعد ما جربت معاناتي من عدم توفير المواصلات وكيف هالبنغاليه يلعبون لعب علينا سواء تكسي او سواق خاص وتلاعبهم بالاسعار علينا...تخيلي كنت مسجله بنادي مدة شهر مداومت معه الا 10 ايام وبسافر دفعت له تخيلي بس 400 ريال وعصب قال اتفاق 800 الشهر وينها؟؟قلت انت حسبت علي المشوار زي اللموزين وقلت لك ظروفي حتى تنزل من السعر وقلت مافي الا 40 للمشوار الواحد زي لموزين..وانا بحاسبك زي اللموزين بالمشوار وانا عشر مشاوير20 رايح 20 راجع 40 ريال في 10 ايام 400 ريال غير كذا ماعندي.. اخذ الفلوس ويقولي ظلم سعودي الله يقلعهم عن ديرتنا امين...وتوهقت يوم رجعت من السفر برجع لنادي مالقيت من يوصلني اسعار نار 1200 وانتي طالعه اظطريت ادق على البنغالي قال سوري مافي فاضي وسكر بوجهي مت قهر لمتى وحنا عايشين تحت رحمة ابو هنود....من هنا طرا بالي هالفكره

عيال البلد ماعندي مانع بس اعرف شبابنا حقين نوم ومزاج ضيق وحقين تعارف...كيف بحط رزقتي بين ايديهم؟

هلا أختي (( المكافحه )) :

الفكره حلوه ومايبي لها مشاور واتكلى على الله والله يوفقك وبالنسبه للراتب انتي شوفي وشاوري احد يفهم وانصحك بالبدايه انك تكوني واضحه مع الجميع وبالنسبه لمسالة الاحراج وصديقتي وانها بتزعل او بتتحسس ومن هذا الكلام بصراحه احسه ماينفع بالبدايه واتمنى تكوني اكثر حزم ويصير العمل عمل ومافيه عواطف لان بصراحه شغل المجاملات في التجاره بانواعها اشوفها ماتجي لاكن اذا كانت في امور بسيطه ومعقوله يمكن لاكن لاتحسسي السواق بالبدايه انك متساهله ولا تحسسيه بالتسيب يعني خلك نظام امريكي وقت العمل عمل والي بيزعل او يتضايق من العمل او التوجيه والملاحظات اشوفه انسان ماينفع للشراكه وقبل هذا وهذا لازم تستخير ربك وتشاوري اهل العقل من اخوان وغيرهم الي يعرفون مثل هالشغلا ت.. بس انصحك انك تكوني حازمه وماتظلمي بنفس الوقت بتاخير راتب او غيره من حقوقه وبالنسبه للسواق واحيانا فيه ظروف مثل ان السواق يحتاج مصاريف قبل الراتب او اشياء لاهله وماحل راتبه ممكن مساعدته ويكون بخصم من الراتب القادم من باب التفريج وحقوق الموظف و سواء راتب او نسبه اتمنى يكون هذا باتفاق بينكم افضل مع انه الراجح عندنا بالسعوديه شهريا " لاكن اقتداء بقول الرسول اللهم صلى وسلم عليه (( اعطو الاجير أجره قبل ان يجف عرقه )) هذا من باب عدم الظلم وبالنسبه لهذي المساله ما اتوقع بيكون فيها أختلاف بأذن الله واتمنى لك التوفيق والسداد واتمنى اكون افدتك ودعواتك لنا استاذتي الكريمه .

هذا والله اعلم وصلى الله وسلم على نبينا محمد وعلى اله وصحبه أجمعين .