أنا عضو جديد وعندي مشكلة ياليت تساعدوني بكلمة أو حكمة

أنا عندي اسرة كبيرة أصرف عليها وموظف وراتبي بالكاد يغطي مايجي 10 الشهر الا وأتسلف من هنا او هناك البعض يصرفني والبعض يمد بالقليل وبصراحة كلام الناس تعبني


فكرت كثير وش الحل أولادي ابغى اعيشهم احسن عيشة بس العين بصيرة واليد قصيرة

وصلت الى قناعة لازم أشتغل اما ابسط خضار او اشتغل فيي العطور عند المساجد لكن المشكلة اللي ذبحتني كلام الناس انا في مدينة صغيرة والكل يعرفني فكرت أروح مدينة ثانية قريبة بس نفس الإشكالية

اعطوني حل وجهوني وش العمل او الطريقة فكرت في محل ولكن صعب افتحه يحتاج مصاريف فكرت انقل مدينة ثانية ما أحد يعرفني واشتغل فيها

السلام عليكم ورحمة الله

اخوي اولا اسأل ان يرزقك من فضله ويحقق كل احلامك

ثانيا نصيحتي لك على نقطتين

النقطه الاولى : اشتغل بالخضار والله العظيم انه يجيب ربح كثير ومر واسال اصحاب محلات الخضره (( ربح عجيب ))

وممكن تاخذ لك قرض حسن من باب رزق جميل وفي فتره سداد كافيه واستفسر عن هالموضوع

النقطه الثانيه : كلام الناس لا يودي ولا يجيب ولا يوكل عيش واسال مجرب

الناس الي يذمونك اليوم بأذن الله راح يتمنون الرضى منك بكره

والناس الي يدعمونك ويهمهم رزقك الحلال خلهم على يمناك





ومثل مايقولون : خلن تظنه زين خله على يمناك


وبشرنا بجديدكـ

اذا بتستحي من طلب الحلال عمرك ما بتنجح
اخوي شوفلك شغله انت متقنها وتوكل على الله واشتغل ولاتستحي من طلب الرزق
و بالعكس استفيد من معارفك ومن قرب مناطق صغيره لك وتنقل بتجارتك بين المعارف والمناطق القريبه احد ماتكون قاعده زبائن و نوع ببضاعتك كل فتره
سال الله ان يرزقك من حيث لاتحتسب ويفتحها بوجهك

حاول تجد عمل اخر
والهدف انك تبني لاولادك بيت ملك
او يكون معك مبلغ بالبنك بالمستقبل حتى تشري سيارات للاولاد اذا كبروا
والبنات برضوه لهم نصيبهم من التوفير المهم انك تسعى لرزق حتى توفر ويكون عندك مبلغ وقدره
اما انك تسعى لرزق حتى تعيش اولادك احسن عيشه هذا غلط
والله يااخي من سابق تجربه الفقر هو اللي يجعل الابناء يطلعون بفايده
اما من ناحية التعليم او من ناحية الاخلاق مثل قوة الصبر والتحمل والله مايصنعه الا من القل
صدقني والله ان الطفل اذا وجد اهتمام زايد افسدت اخلاقه وياليت اذا لبت له طلب يرضى ويقنع لا الا يبي كل شي وكل ماله تزيد طلباته ويطلع الشيب في راسك من بدري وياليت الدلال ينفعه الا اذا كبرت ماراح يرحمك ولايهتم فيك
والله شفت في حياتي نماذج كثيره الفقارى كيف اطلعوا عيالهم
واللي دللوا عيالهم كيف صاروا الا من رحم الله منهم

زبدة الكلام
اكثر من الإسغفار وبيرزقك الله

الشئ الثاني انصحك تتاجر بالتمر
ترى فيه خير ورزق
ومو شرط يكون عندك محل
ممكن تبيع من بيتك او تبيع بسيارتك في اي مكان حتى لو بعيد عن منطقتك او توزع للمحلات
الشغله يبي لها تحرك شوي ,, والخبرة بالتمر انت بتتعلمها بسرعة
القصيم والأحساء والمدينة والخرج وبيشة هذولا مراكز التمور بالسعودية شوف اللي اقرب لك وافضل لك علشان تبدأ

الله يرزقنا ويرزقك من واسع فضله ,, ويغنينا بحلاله عن حرامه

كيف نفيدك وانت ماقلت لنا كم عدد سكان المدينة اللي انت منها تقريباً ..؟ وفي اي منطقة .. وهل هي على بحر
.. وهل هي قريبة من حدود بعض الدول .. هل هي زراعية او منطقة سياحية مثل الطايف الباحة
كم عمرك ..؟ كم راتبك اذا مافيه مانع وهل يتحمل وضعك الحالي انك تستخرج قرض .. موظف حكومي او خاص ..... وضح اكثر عشان نقدر نفيدك بإذن الله والاخوان والاخوات ماراح يقصرون معك

الله يكون بعونك

ياحبذا لو تذكر بعض التفاصيل عنك لكي يسهل على اعضاء المنتدى افادتك

-ايش وظيفتك ( لعل طبيعة عملك تساعد على ابتكار مشاريع مناسبة لك )
-وقت عملك
-وقت فراغك
-تملك سيارة او لا
-اكثر شيء يستهلك راتبك ( كيف ادارتك لراتبك ) ..الخ

اتمنى لك التوفيق

السلام عليكم ورحمة الله وبركاته
شوف ياخوي قلب الخميس اشتغل في الخضار ... انزل الحلقة من قبل الفجر واشتري لك كمية من الخضرة . وبيعها واترزق الله وبتربح ان شاءالله ,,

وعندي سؤال الحين الناس اللي شايل همهم ومعطيهم اكبر من حجمهم , فيه أحد قال والله ذا نعرفه مسكين خل نساعده بشي ... والله ياخوي الناس نفسي نفسي , محد بيساعد احد اليومين ذي الدنيا تغيرت , الا من رحم ربي


لا تستنى احد ولا تلتفت لكلام الناس اللي لا يسمن ولا يغني من جوع ... واذا اذا احد فتح فمه قوله بتعطيني شي بتصرف علي وخليك في نفسك ...

أتوكل على الله ونط اقرب حلقة خضار اشتر لك طماطم خيار برتقال وعند المسجد بيع بدبلها .. صدقني بتدخل ذهب ان شاءالله .. وإذا شفت انها صعبة بنفس المنطقة روح منطقة اقرب ولا شف احد من العيال الصغار اللي بالحواري يساعدك وقوله بشغلك معاي وبعطيك .. وخلك في السيارة وخل الولد يبيع ولمن تخلص اعطيه المقسوم وصدقني بينبسط وكل يوم بتلاقيه جايك للمسجد . ..


والله يرزقك ويفتحها عليك من واسع فضله ....

الاستغفار اكبر حل لكل مشاكل الحياه جرب تستغفر باليوم 100 او 1000 صدقني من تجربه ايام او بالكثير شهر وربك مفرجها عليك حتى انك تستغرب كيف جاك الفرج اتمنا لك التوفيق

الاحظ الاغلب يذكر الاستغفار
والله ما ذكر اللا من فضل فيه عجيب
اخوي قلب الخميس
حافظ على صلاتك في المسج وبالاخص الفجر
داوم على الاذكار واستغفر بيقين وتوكل على الرحيم
يجيك فرج من حيث لا تعلم سبحان الرازق

ثانيا
اذكر تفاصيل مدينتك وايش القريب منها
كيف مقدرتك البدائية في الشغل
وتجنب كلام الناس
ان نقص عليك شي ما اعطوك
وان زاد حسدوك
ان هم اللا كالانعام بل هم اضل سبيلا