[align=center]السلام عليكم ورحمة الله وبركاته

طبعا بداية أبي منكم أن يكون الموضوع عباره عن مشاورات و آراء و تجاربكم وخبراتكم تطرحونها وانا معكم لعل الله يسهل امورنا ونتساعد للأفضل ...

المقاولات بحر كبير وفيه خير لا يعلم فيه إلا الله سبحانه مع أن التكاليف المبدئية ليست كبيره ومقدور عليها إن شاء الله .

مؤسسة المقاولات فيها أفرع كثيره وفيها مهن كثير وفيها بحور يجب أن اللي يدخلها يكون ذيب من الدرجه الأولى .

" جبسيات _ دهانات _ بلاط _ لياسه _ بناء _ نجاره _ سيراميك _ حجر _ بورسلين _ ديكورات _ خشب _ حداده _ بويه _ صب _ بلك _ دفان _ بطحاء _ اسمنت _ معجون _ شيول _ قلاب _ ددسن _ دينا _ شعر _ جبس _ رخام _ ورق جدران ....الخ "

هذي مصطلحات متداوله في سوق المقاولات وهناك الكثير يجب أن الواحد يكون يعرف وش له وش عليه لأنك راح تتعامل مع ناس قاعده تبني وتصلح بيوتها وناس تهدم وتبني وناس ترمم وناس تعدل غرف وأحواش وناس تبي تركب سيراميك وناس تبي بويه تعتيق ووو....الخ

المبدأ أولا أنت لازم تعرف أنك راح تتعامل مع ناس تبي تضبط بيوتها وخذ الموضوع من هذه الجهه راح تعرف وش المطلوب ووش الحاجه في السوق وحاليا السوق صراحة هو المقاولات بشكل عام

القروض ماشيه ولله الحمد والناس تبني والمخططات يالله لك الحمد بدت تزدهر والمدن بدت تكبر واليد العامله أصبحت أقل لدرجة وصل البناء طلبيات وحجز عند بعض المؤسسات .

لذلك شد حيلك و الموضوع ليس سهل وليس صعب في نفس الوقت

يحتاج واحد يعصب راسه ويقول بسم الله الرحمن الرحيم ويبدأ ينزل السوق ويطوف محلات البناء ويتسعر وينزل بعد الفجر للمخططات ويشوف العماير ويشوف العمال وكيف يشتغلون وأسعارهم وو.. الخ


كتبت الموضوع على عجله هذي بداية فقط و راح أرجع أكتب بعض تجاربي البسيطه جدا ...

طبعا لست مقاول كبير وخبرتي ليست طويله ولكن راح اشارك باللي أقدر عليه

ولكني الرجاء من الجميع طرح تجربته ومعرفته وخبراته لكي يستفيد الجميع إن شاء الله وانا أولهم وأدعوا الله سبحانه وتعالى أنه يوفقني ويوفقكم وجميع المسلمين لكل خير

أخوكم ./

[/align]

بارك الله فيك ويشرفني ان اكون اول من يرد عليك
أنا اعمل على كتابة العقود في المقاولات والله فيها خير كثير وبالغالب تكون دفعات اول دفعة تكون عند توقيع العقد بينك وبين الزبون والباقي يتقسم على مراحل العمل السؤال العقد مع جهة حكومية هل هو نفس عقد الزبائن او مختلف ؟؟؟؟؟؟؟؟؟؟؟؟؟؟

بسم الله الرحمن الرحيم
عقد عمل
تم الاتفاق بين الطرفين
الطرف الاول / مؤسس حلول البطالة للمقاولات
الطرف الثاني / الزبون
على ان يقوم الطرف الاول بدهان فلة الطرف الثاني
بسعر المتر أو قطوعه
ثم تكتب الاسعار وغيرها
بروفايل عسيب
ثم الدفعات
دفعة اولى 5000ريال عند توقيع العقد
دفعة ثانية 1000 ريال بعد الانتهاء من الدور الارضي
وعلى هذا تم التوقيع
الطرف الاول الختم الطرف الثاني

السلام عليكم ،،
أعمال المقاولات مُتشعبه كثيرا والعمل فيها مُجدي ولكن يجب ان تتخصص بعمل مُعين في البدايه حتى تتقنه وتلم في جميع اموره من بعدها تبدأ تتدرج لأعمال اخرى ،

بنظري العائق الوحيد والصعب في مجال المقاولات هو (( العماله)) ،،
انا لدي مؤسسه خصصتها لأعمال الانشاء " العظم" وعندي تاشيرات من شهر ٤ والى الآن أطرد وأبحث عن العماله
ان شاءالله بالتأخير خير وعسى الله يوفقنا وياكم.

موضوعك هام بالنسبه لنا يالمبتدئين في هذا المجال واتمنى يكون بالمشاركات توجيهات وارشادات ليكون الموضوع مثمر ومفيد.

بالتوفيق للجميع..

[align=center]السلام عليكم

عودة مره أخرى

كلامك أخوي خالد صحيح وهو أن العمال هم أهم شيء في المقاولات

بأتكلم شوي عن الجبسيات والديكورات

طبعا معلمين + عامل يكفي مبدئيا لبدء العمل في الديكورات الجبسية

( ملاحظه : لن أتحدث عن طيفية فتح مؤسسة ولا بأدخل في تفاصيلها الا إذا أحد سألني لأانها معروفه واللي يبي يسأل يتفضل ) .

قلنا نقدر نبدأ بسم الله ونمسك عماره لأحد المواطنين مثلا يريد عمل جبسيات

نحتاج في البداية إلى العمال + سياره ولو ددسن أو تكسي لو مره الوضع ما يسمح

لأنهم بيجلسون في العماره من الصبح لين آخر العصر مخدومين

نقول أننا مسكنا الدور الأرضي بنشتغل فيه

طبعا التركيب سعره حاليا في السوق بالمتر تقريبا 55 إلى 60 ريال كمتوسط وعلى حسب المنطقه

فرضنا أننا بنشتغل 400 متر , إضربها في 60 ريال بيطلع معك 24000 ريال .,

لو فرضنا انك مشغل العمال يوميه مش راتب

المعلم يوميته قل 150 يعني الإثنين 300 ريال يوميا والعامل 80 مجموع 380 ريال + 20 وجبه غداء = 400 ريال

نفترض أن مدة الشغل 18 يوم .

نحسب أجور العمال مع المصاريف كلها تقريبا 7500 ريال .

راح تحتاج في بداية الشغل الى أكياس جبس و شعر بتاخذها من المصنع وتحتاج سقالات يعني تقريبا تكلفك 3000 ريال الى 3500 ريال تقريبا .

يعني 3500 + 7500 = 11 ألف ريال .

نفرض أن هناك مصاريف أخرى 2000 ريال سياره نقل وجبات نواقص العمل ..

بتكمل المصاريف كامله مع الأجور 13000 ريال .

يعني يصفى تقريبا 11 ألف ريال في جيبك خلال 18 يوم إن شاء الله ! الحمد لله

طبعا المبلغ راح تستلمه من راعي العماره دفعات ( أول العقد مقدم ) ودفعه ثانيه وثالثه عاد على حسب الإتفاق ,..

عموما هذي حسبه سريعه كمثال .

أتمنى منكم المشاركه بخبراتكم عشان نستفيد أيضا ..[/align]

[align=center]بأتكلم عن العمال شوي .

طبعا تقدر تتفق مع معلم دهانات أو معلم لياسه أو أيّا كان من المعلمين الأجانب الموجودين .

أنك توفرله مثلا تأشيرتين أو ثلاث يقدر يبدأ فيها العمل معك .. فرضا أن لقيت معلم لياسه هندي ..

وقلتله تعال يا عزيزي . بأطلب من كفيلك نقل كفالتك عندي وبأدعمك مبدئيا بتأشيرتين أو ثلاث تقدر تجيب فيها معلمي يبدون العمل معك ..

تتفق معه من البدايه بقوه لا ترخي له الحبل ولا تشد .

تتفق معه في كل الأمور كيف بتشتغل معه . الرواتب السكن الإقامات المصاريف الأرباح وش الوضع !!

وتدون الإتفاقيه في ورقه عشان لاحد يلف ويدور بعدين لا أنت ولا هو من باب حفظ الحقوق .

وتبدأ تشتغل معه راح تبدأ بدايه كويسه لأن بيكون عنده قاعده زباين كويسه وكذلك خبرته تساعده ..

( هذا الكلام للمبتدئين في الشغله واللي ماعندهم خلفيه )

أما اللي فاهمين فـ هم أدرى كيف يجيبون العمال صح :P .

بشكل عام العمال والمعلمين راح تلقاهم لكن أنت اجتهد وابحث و فاوض ولكل مجتهد نصيب .

[/align]

[align=center]بعض النصائح والتوجيهات السريعه :

اللي يقولون وزارة العمل معقده السالفه ( إبعد عنهم ) ولا يهمك أحد , إشتغل و مخمخ

الفرص كثيره في السوق على الصعيد الأهلي والحكومي

إحفظ حقك ولا تعطي أحد لحيتك

العمال خلك رسمي معهم وتراهم أوادم زينا زيهم , لكن خلك ذكي

لا تطمع من البدايه في الربح , إبدأ خطوه خطوه وإصدق النيه مع الله وبيرزقك الله خير

حاول قد ما تقدر تخلي أمورك سريه مع اللي حولك لأن الحسد والعين طغت على المسلمين

الله يوفقنا وياكم ..[/align]

[align=center]نبي مشاركاتكم ي شباب[/align]

بصراحه ناوي افتح لي موسسة مقاولات لتركيب السيراميك

بصراحه تنقصني الخبرة والتكلفة

السلام عليكم

حسب خبرتكم ياليت تفيدوني بجواب السؤال هذا؟
ايش اكثر المهنه عليها ضغط شغل واكثر فلوس هذي الايام سباكه انشائيه او كهرباء انشائيه او نجار او بلاد او فني لياسه او ايش ياليت احد يفيدني بجواب وافي
لاني بتطلع لي 3 تأشيرات تحت مؤسسه جديده وماني عارف ايش اختار

والله يوفق الجميع