[align=center]السلام عليكم

حبيت اسألكم اخواني وابي جواب اكيد لان الموضوع يا حياة ياموت
انا كنت اكد على سيارتي مشاوير داخل البلد وقبل امس ركب معي باكستاني ومع السوالف علمني بتجاره يقول انها مضمونه 99% وهو اللي راح يشتغل لي فيها

قال لي : اشتر ترس ( تريلة ) من الاردن تكلفك 130 الف ريال .. وسلمها لي اشغلها لك .. والمربح شهريا 14 الف ريال .. بس تصبر علي اول 8 شهور من بدايتي بالشغله .. وبعدها شهريا اضمن لك 14 الف ..

سألته وش بتشغلها لي .. قال احمل برسيم من طبرجل واوديه لـ جده او سائر مناطق المملكة ..
قلت يمكن مايمشي .. قال ماعليك اذا مامشى نغير التجاره من ( تريلة ) الى ( قلاب ) وراح تمشي ان شاء الله ولو اني ضامن ان مشروع التريلة يمشي 99% لاني خبير ببيع البرسيم واعرفه زين

قلت طيب فيه خساره شي .. قال لا اكبر خسايرك انك تبيع التريلة وتسترجع راس مالك ..
قلت طيب خلال الـ 8 شهور الاولى اللي قلت ما اطالبك بشي فيها .. وبعدها تجيني المرابح .. تحتاج لراتب شي لانك بتكون ع كفالتي .. قال لا ما اخذ منك اي شي الا بعد ماتجي المرابح ..


الشي اللي ريحني ان الباكستاني يقول مالك شغل بالتجاره ولا اي شي نهائيا لك بعد 8 شهور تضمن راتب شهري لك 14 الف ريال .. يعني انا مالي تعامل الا اجيب التريله واسلمها له وانساها وانتظر 8 شهور وبعدها هو يحول بحسابي شهريا 14 الف .. وش رايكم ؟ لا سجل تجاري ولا اي شي لان مالي خبره بهالامور

همسه ( يا اخوان انا عاطل والوالد الله يطول بعمره بتجيه حقوق تقاعده بعد شهر تقريبا 297 الف .. ابي قبل افاتحه بالموضوع واطلب منه 130 الف .. اخذ رايكم تكفون فيدوني )[/align]

اللي ما يتابع حلاله يضيع عليه
انت بنفسك اشتغل مع البكستاني واذا ما تقدر اقول لك احذرررر مليون مرة من الانجراف لما لا يحمد عقباه

اخي احذر
8 شهر في 14 الف 112 الف
ذا مخطط يطلع من التريلة تريلة اخرى ويسحب عليك
بحجة امه تعبانة ويبغى يسافر
الاجنبي ما له امان
احذر
لو تبغى تستفسر اكثر استفسر من كفيله
السابق

احذر احذر
وانا عندي لك فكره تقدر تشتري باص كبير وتنقل طالبات الجامعه او معلمات والله تطلع ذهب .

اخوى الكثير أخبرني ان تجارة البرسيم مربحه جدا وبشكل كبيير
لكن هناك اسئله
ليش العامل ما يعطيك إلا بعد 8 أشهر ..؟ ليش مثلا اول مايبدا العمل يبدا يخلصك ؟
ايش اللي يضمن يجيك بعدين يقول مافي شغل ؟ وهذي صارت مع كثير أعرفهم (بعد الثمانية أشهر ).
وهل يُعقل أخوى راكب ركب معك مره وحده بعدها حب الخير لك وقال لك الموضوع هذا ؟
وخذ نصيحه اخوى
لايمكن لأي شخص يطلع فوووووق إلا اذا كان مراقب ماله وحلاله لحظة بلحظه ويعرف كل صغيره وكبيره
لكن انت ممكن تلعب عليه
تفهم خبايا الشغله منه و توهمه انك وافقت وراح تشترى التريله . وتروح معاه لطبرجل وتعرف أصحاب المزارع وتتعلم على الشغله و أسرارها .بعدين تجيب لك عامل بالراتب

السلام عليكم اخوي
اولاً عندك نقاط مهمه جداً لازم تتبعها
لابد ان تشوف وتطلع على احد شغال بنفس هالمجال وتشوف كيف بدا وكم المدخول وكيف السوق ومعدل الربح والايجابيات والسلبيات من كل النواحي لو تجلس شهرين تتبع اذا تأكدت ان مربوحه ممتاز وسوقه ماشي ومافيه اي خوف او خسار ه ويستحسن انك تسال شخص يعمل بهالمجال بيفيدك اكثر و تطمن
ثانياً البكستاني لابد ان كان بيعمل معك في نفس المجال ان يكون تحت كفالتك ضمانً لك وواهم شيء لاتعطيه الخيط والمخيط من البدايه لانك اصلا متعرف عليه في تكسي يمكن انه حرامي ونصاب كبير لابد ان تشتغل معه ولا تسلمه شيء بيده حُر خلك معه ووقف على شغلك بعد ماتتحق من النقطه الاولى اللي هي مربوحها السوقي
وبعدين وانا اخوك لاتحصر مخك على مشروع واحد ابحث فيه مشاريع ممتازه وتقدر تفتح فيها شغل من رأس مالك الي تقول بكل سهوله ابحث استشر عدد اختياراتك عشان ماتخسر واستخر واسال انتبه تتسرع ترى الامر مافيه لعب
اتمنى لك التوفيق والله يدلك على ماهو صــالح

قيمة التريله تقدر تصلح منها مشروع مزرعة برسيم او اي مشروع اخر يكون تحت ناظريك وبنفس الوقت يدعمك البنك الزراعي باضعاف مكسبك من البكستاني وتبيع حلالك وهو قدامك ولا تبعد عن اهلك ولاهم يحزنون وتصير صاحب اعمال حره بدل الكداده ونصيحتي لك النقليات برمتها يبقى لها شخص يقف عليها وكثير من الناس يسمع بالنقليات وانها ذهب وو لكن الغالب خسروا الا مارحم الله .

انتبه من البكستاني واذا المشروع براسك ما منها طب وما ودك تلف يمين ويسار انزل المانيا وخذ لك راس تريله وتعال هنا انت بنفسك انزل طبرجل وتعال جدة والوقت ما يأخذ يومين ووقف سيارتك بسوق الاعلاف وجب عاملك اللي ع كفالتك واتركه يبيعها لك واجلس عند اهلك حتى تتصرف البضاعة وبقيمتها تتاجر مره اخرى والبدايه صعبه لكن من اول ما تضع قدمك فيها تمر الايام وانت ما تدري بخيرها وشرها والله يكتب لك الخير ويوفقك

ههههههه بيضحك عليك وش اللي بعد 8 شهور ولا بعد تسأله اعطيك شئ اعطيك راتب خلال ال 8شهور

والله انك طيب وعلى نياتك اخوي اقرب شئ بيروح ويختفي وتقعد تقطع بصل تبلغ عنه يبيلك خمس سنوات الى عشر سنوات عشان يلقونه

با اختصار يبي تريله ببلاش وانت اللي بتعطيه التريله ههههههههه