السلام عليكم ورحمة الله وبركاته ,
مساء النور / صباح النور < عاد انت وتوقيتك

يا اخوان طلع اسمي بقبول مكافحة المتخدرات ( رقيب )
بس قالوا لي لازم تسلم الاوراق النهائيه ( الكشف و العمده والبرنت حق الاحوال ) في يوم - 10 من شهر 8 ,,, واخوكم في الله خريج جامعي وبقدم على الكلية الامنيه بجرب حظي بلكن انقبل
معدلي 2.93 من 5 تخصص نظم معلومات << تتوقعون انكرش

طيب وين المشكله .؟

انا اقلكم .. الملازم اول بالمكافحه وقت ما سلمنا الملف الاخضر حق الالتحاق قال لنا : اللي ينقبل قبول نهائي بنعدل مهنته على طول ( وماراح يتقاعد الا بعد اربع سنوات ) وتقديم الكلية الامنيه راح يفتح في يوم 5- من شهر 8
ومير انا خايف انقبل بالامنيه بس الاخوان بالمكافحه يعدلون مهنتي < بعدها النفسيه تصير وشسمه

والله اني وسوست من كلام الملازم اجل بيعدلون المهنه قبل م ادخل الـ45 ؟ منجدهـ ؟

وش بتسوي لو كنت محلي < محلي ولا عالمي

الفزعه يـا رجال

Up.....

انت سلم ملفك كامل لمكافحة المخدرات لا تخليها طوفك اضمنها اول شيء تراها وظيفة حلوة
القبول النهائي الي اعرفة يتاخر كثير يعني يمديك اذا انقبلت بالكلية الامنية تمر عليهم وتسحب ملفك منهم ان شاءالله طبعاً من بعد المرمطة والقروشة لكن صدقني هذة المشكلة لها حل

خذ اللي جاتك دام قبلوك نهائي لان الامنيه مومضمونه للحين بالنسبه لك وعليك بالاستخارة والله يرزقك بالشي اللي بصالحك

..


والله البلشه الكليه الامنيه ماتتفوت بس خوفك ما يتم القبول ..

انت خلص معاهم وحاول تكلم واسطه او تدخل دخاله على رتبه وتقوله موضوعك و ان شاء الله يتساهلون معاك اغلب القطاعات من قبول مبدئي الى نهائي ياخذ وقت ..

استخير وترى كلها ممتازه الله يوفقك ..

نصيحة لا تسحب على المكافحة وانت اصلن مو ضامن القبول في الكلية الامنية
انا بتكلم معك بصراحة انت معدلك 2.93 من 5 يعني تقريباً 71% من 100 يعني مو شيء نسبتك عند العالم الي بتقدم
كل الي معهم جامعة راح يقدمون على الكلية الامنية وشف شكثرهم عاد!
والكلية راح تأخذ الي معدلة عالي في الشهادة وفي اختبار قدرات الجامعيين