الله يكتب لي ولكل العاطلين الوظيفة. القهر انك تتعب وتسهر وتاخذ اترام صيفية وتنقطع عن الناس عشان تجيب معدل عالي وبالاخير جامعتك تشوتك ولا تاخذك معيد وبعدها تستلمك الخدمة المدنية وتحرق اعصابك باختبارات مهنية الهدف منها ابراء الذمة من عطالتك عشان اذا طالبت قالوا لك انت راسب بالاختبار انجح وتتوظف واذا نجحت عدلوا الشروط وطلبوا تربوي واذا وفيت كل الشروط قالوا لك ما فيه احتياج لتخصصك للتكدس حنا بدولة بترولية غنية وفوق هذا سياحة الحج والعمرة وساهر يدخل علينا مليارات !! اما اللي يقولي القطاع الخاص فالقطاع الخاص هنا همه السعودة براتب اقل وعدد ساعات اكثر واغلب الاحيان مجال غير مجالك يعني الخبرة بلها واشرب ماها . اللي صاير للشباب ظلم واضطهاد غير مبرر ونصيحة لمسؤولي الدولة لا تختبروا صبر الشباب وتذكروا بعد قضائكم على احلامهم لم يعد يهمهم شيء

اخوي جسد الله يرزقك الوظيفة عاجلا غير اجل يا كريم
بس اخوي ما حاولت تقدم على شركة أرامكو او سابك او معادن؟!

الله يصبرك حتى ساعد لايغرك ماوظفو حامعيين ظنك بيوظفو ثنوي؟
لكن وانا اختك سوي قروب لتخصصك واطرحو الاسئله الي جتكم حتى الي اجتاز دخلوه معكم يفيدكم
انا استفدت كثير من القروب الي سويناه واجتزت ولله الحمد
وربي الشرح يفيدك كثير معهم
وباذن الله تعدي هالعقبه وتجتاز والله يكتبلك الوظيفه عاجلا غير اجل
ويكتب الوظيغه لكل شخص والله حال الشعب يرثى له
الي مسكو مناصب كانو انانيين وعقدو ع الشعب كثير ودي افهم بس وش الي بيخسرونه لو سهلو لهم ووظفوهم
ارحمو من في الارض يرحمكم من في السماء
لكن حسبنا الله ونعم الوكيل بكل شخص عقد الامور

قرارات الوزاره دايم متخبطه الله يعين الجميع
اذا بتنجح بقياس التخصص توكل على الله اول شيء
وبعدين ذاكر كتب المدارس على حسب تخصصك
انا تخصص رياضيات واخترت بقياس ابتدائي ومتوسط ورحت ذاكرت كتب الرياضيات للابتدائي والمتوسط وتدربت كثير والحمد لله اجتزت وفي بعض الاسئله منسوخه من الكتب بس في تغيير بسيط

أنصحك لاتوقف .عيد الاختبار. الله يوفقك.

اذا لقيت وظائف تناسب مؤهلك غير التعليم قدم فيها

يا خوي كلهم كفوا ووفوا في الاراء وانا اضم صوتي لصوتهم حاول قد ماتقدر تسوي ليزر لعيونك لو تتسلف انا ولد خالي معاه الثانوي وعنده النظر مررررره ضعيف ومايشوف الا قليل فقط خلص الثانوي من هنا وسوا ليزر لعيونه في المغربي وماشاء الله قدم على الدفاع المدني واخذ كم دورة وقبلوه وتوظف

انت في الاثناء قدم على قياس من هنا حاول تذاكر وتجتاز وامش في الطريقين والله يكتب لك الخيرة والرزق امامك ولا تيأس ماشاءالله مؤهلك جدا حلو

الله يرزقك من حيث لاتحتسب والله يعيق ويعطل كل من وقف في وجه الخريجين سواءا ذكور او اناث وحرمهم من ابسط حقوقهم وهي الوظيفه لاوبعد عندك مؤهلات تساعده لكن الشكوى لله
قرات في الموضوع حلول من الاعضاء شوف الانسب لك ولاتوقف حياتك عند نقطه معينه............
اخيرا اتمنى لك التوفيق والرزق الحلال عاجلا غير اجل ياااارب

والله حتى انا افكر نفس تفكيرك مستعده اتنازل عن البكالوريوس بس وشلون اظمن الوظيفه بالثانوي ؟
والسبب تخصصي علم نفس لاالتربيه معترفه فيه ولاالصحه كل واحد يرميها عالثاني واحنا ضايعين في النص
والمضحك في الموضوع نقاطي في جداره 86 بس وش الفائده اذا مايفتحون لنا لااداري ولاتعليمي ولاصحي
يعني كأني مادرست من الاساس الله يضيع من ضيع تعب السنين عالفاضي
حسبي الله ونعم الوكيل