السلام عليكم ورحمه الله وبركاته عندي موضوع باطرحه طويل شوي
انا مقدم على الامن العام والنتيجه لاالحين ماطلعت ولي قريب زوج خالتي شغال باكادميه نايف بالرياض للمباحث انا كلمته على اساس انه كان بوزارة الداخليه بالرياض قال لي انا نقلت للمباحث على العموم قلت له اني قدمت باخر تقديم بالمباحث الي بشهر 12 الي راح وماانقبلت قال لو قلت لي بدخلك المهم قال ارسل اوراقك وارسلتها وقال شهر 8 بتجيب الاصل وتجيني بالاكادميه يعني الرجال بعد الله نقول يدبرنا بس الي محيرني اني مقدم كمان بالامن العام ولطعنا الامن ومادري وين اروح . اروح المباحث تروح علي الامن وان استنيت الامن اخاف مانقبل وان انقبلت طولي 165 اخاف مامشي لاكن المباحث الرجال واعدني وش رايكم وجاني قبول بتقنيه المعلومات بالقوات البريه ابي شووووووووركم لاهنتم واسفين على الاطاله والله يوفق الجميع.
ملاحظه: اكثر من الاستغفار والصدقه والله جربتها وطلعت نتيجه معي
1-الامن العام
2- المباحث
3-تقنيه المعلومات بالقوات البريه

وعليكم السلام ورحمة الله وبركاتة


والله شوف اخوي الكل راح ينصحك بالشي الى يتمناه هو

والى يشوفه هو الصح ويصلح له وبس

مافي احد بيعرف شنو ظروفك وكيف وضعك وكيف تحملك الخ الخ


شوف اخوي بالنسبة لي انا ( وأعوذ بالله من كلمة انا )

دور القرب من أهلك هذا أول شي قرب الأهل عز ياخوي

ثاني شي دور الراحة في الدوام

ثالث شي دور كم الراتب


والله انا هذا توزيعي للوظيفة وانت شوف الى يريحك

صحيح ان هذا الزمان ظهرك فلوسك محد بينفعك بس لمن تكون قريب من أهلك تهون عليك اشياء كثيره

منها الاجار ولمن تتزوج عيألك جنب امك وابوك الخ الخ وكل واحد وظروفه طبعاً ونصيبه وين

وهالشي مو معناتها كل واحد يشتغل جنب اهله الكل نصيبه ورزقه وين يتبعه

بس الافضل الى عنده واسطة او يقدر يضبط نفسه قريب من اهله أفضل


شوف اخوي

المباحث حلوة والامن العام حلوه وانت شوف نفسك اي وحده فيهم ترتاح لها وتحس انك تميل لها توكل على الله



وتوكل على الله وأهم شي مثل ماقلت انت

أكثر من الاسغفار والصلاة على النبي والحمد لله والله أكبر وسبحان الله

طول الطريق وانت رايح تقضى اي شي استغفر وهلل وكبر

وخل هالشي عادة في كل حياتك مو بس عشان وظيفة


و والله ثم والله انك صادق وربي

يوم اني قمت استغفر واهلل واسبح الله واصلى على النبي

وفعلاً التبرع يفتح لك أبواب رزق سبحان الله

افضل من اشغل لي اغاني وانا رايح وجاي واتحلطم مافيه وظيفه مافيه مافيه مافيه

والله توني أحس بهالنعمة بعد هالعمر الله المستعأن

والله العظيم كنت اروح اسجل في وظايف عن طريق واسطة وما الله يكتبها لي

والحمد لله حتى الرضى



وطبعاً الاهم الصلاه وتواصل الاقرباء

ولاتنسى صلاة الاستخارة

بالتوفيق

توكل على الله ورح المباحث يا رجال
ما دام لازم عسكرية روح المباحث اذا سرقت فاسرق جمل

توجه للمباحث او عسى يمشونك بطول اطول صعب ايمشون فيه

أبعد عن المباحث ... لأسباب أحتفظ بها لنفسي .

دام عندك واسطه ادخل المباحث
وبعدين طولك ما يساعد يدخلك الامن العام نصيحه خلك مع قريبك
ربي يوفقك