اخوكم توه متخرج من امريكا تخصص علوم حاسب ,,, طبعا ما خليت شي ما قدمتله من يوم ما جيت من ضمنها القطاعات العسكرية وسابك وارامكو ,,, والخ
حاليا تم قبولي في الحرس الوطني بعد ما اجربت الاختبار ومقابلتين والتعيين راح يكون ملازم اول احتمال في استخبارات الحرس الوطني واحتمال مركز المعلومات.
ونفس الشي تم قبولي في كلية الملك فهد الامنية وبكرة موعدي عشان الطول و الوزن وتسليم الاوراق.
في المقابل ما جاني اي عرض من اي شركة كنت اطمح لها.
لكن ما لي اي رغبه ولا 1٪ في القطاع العسكري ( الحرس و الامنية ) لعدة اسباب ,لكن قدمت عشان ارضي الوالد لانه نصحني فيها.
اولا : الدورة العسكرية الي مدتها 9 شهور للحرس الوطني و3 شهور لكلية الملك فهد:
انا انسان مالي ابد في ذا الامور ,,, حلق 0 ومتر الميدان تحت ذا الشموس.
ثانيا : بيئة العمل :
بيئة العمل في القطاع العسكري معروفه كلها مذله ودق خشوم ودق تحيه للي رايح والي جاي.
ثالثا : المستقبل الوظيفي :
صحيح ان الراتب بيصك شي وشويات في اول مربوط .. لكن زيادة الراتب بعد فتره بتكون بسيطة جدا مقارنة بالشركات الكبيرة اضف على ذلك راتب التقاعد.
رابعا واخيرا : صراحه متحسف دراسه 6 سنين برا وكرفي خصوصا اني اشوف نفسي انسان اقدر ابدع في مجالي لكن عملي في العسكرية راج يدفن هالطموح والشغف.
السؤال هنا
- هل تؤيدوني بكلامي بالنسبة للقطاع العسكري والخاص ,,, ولا انا فاهم غلط ؟
في القطاع الخاص راح تحصل وظائف كثيرة بعضهم راح ينصفك ويعطيك القريد الي يناسبك مع راتب حلو كا بداية .. وبعضهم راح يعطيك راتب طفسة ما يسوا
"والشركات الكبيرة" في الغالب عشان تقبلك تبي ناس معهم خبرات وتخصصاتهم تكون في الهندسة والكهرباء
وبخصوص كلامك عن العسكرية اشوفة مبالغ فية انت راح تكون رتبتك ملازم اول ومع اقدمية سنة يعني سنتين وتترقى لرتبة نقيب, وبرأيي ان العسكرية راح تعطيك حقك اكثر من كثير من الشركات! , واما الدورة تراها سهلات وراح تعدي بسرعة .وفية اطباء ادخلوها وتخرجو منها!
ماهي بالصعوبة الي تتصورها
- هل اذا توظفت كمدني في الحرس الوطني راح يكون الراتب قليل جدا بالنسبة للعسكري ؟
وظيفة ضابط بالعسكرية افضل بكثير من الوظائف المدنية الحكومية من ناحية الترقيات
والبدلات اما الراتب الاساسي بدون بدلات تقدر تقول متقاربة الرواتب
لكن يبقى راتب العسكري اقوى بكثير والسبب كثرة البدلات الي عندهم
- هل اذا اخذت الدورة العسكرية وبعدها قررت انسحب راح يأثر هالشي على قبولي في وظائف اخرى ؟
اذا سجلو مهنتك عسكري راح يأثر عليك بعدين لأنك مراح تقدر تدخل العسكرية مرة ثانية
اما الوظائف المدنية والقطاع الخاص عادي تقدر تدخلهن بس طبعاً قبلها لازم تأخذ اخلاء طرف منهم وتعدل مهنتك الى"متسبب" من عند الاحوال المدنية عشان تقدر تدخل الوظائف
وفي الغالب بالعسكرية راح تسجل مهنتك عسكري بعد ال 45يوم فترة الاستجداد
اعذروني على الاطالة
ارجو الرد بمعلومات او تجارب شخصية وليس مجرد رأي