تجربتي الناجحه ( بدون راس مال ) وأكسب بمجهودك فقط


بسم الله الرحمن الرحيم ..

والسلام عليكم ورحمة الله وبركاته ..

رسالتي إلى كل عاطل وعاطله في هذا البلد ..

كـ عادتي لااحب المقدمات وكما هي بصيغة ( أطلب من الله ثم منكم ) !!

في البدايه بعرفكم بنفسي ..

أنا والعياذ بالله من كلمة أنا .. شاب ابلغ من العمر 27 سنه متزوج وعندي بنت .. متزوج تقريباً من ثلاث سنوات ..

معي شهادة ثانوية وشهادة حاسب آلي وشهادات أخرى وخبرات وحالياً منتسب جامعه

والدي عنده ( معاش ) وضمان اجتماعي مبلغ لايتجاوز 4000 ريال .. وعائلتنا 6 أشخاص ..!

الوالد الله يطول بعمره زوجّني ويصرف علي ومو مقصر أبداً .. لكن مــا باليد حيله .. ديون ومصاريف والصافي من المعاش تقريبا 1000 ريال

مايكفي اغراض البيت ولايسوي شيء ابد ..

المهم .. قسماً بالله العلي العظيم انه احياناً في نصف الشهر بنتي تنام وهي تبكي تبي حليب ماعندي ريال واحد اشتري لها .!!

طبعاً ماخليت شيء ماقدمت عليه عسكريه مدنيه أي شيء .. ( العسكريه ) فيه الجيش وغيره لكن مشكلتي ( ضعف النظر ) ولا عندي واسطه ..

تراودني افكار إني اخربها وابيع مخدرات أو شيء من هذا القبيل ( والعياذ بالله )

ضاقت الدنيا بوجهي .. أشوف العالم حولي يلبسون احسن ملابس واطفالهم يلبسون احلى ملابس .. ومع هذا مؤمن بالله عز وجل وكافر بشهادتي ووظيفتهم !!

عشان مااطول عليكم ..

انا من عام 1419 مدمن كمبيوتر وبرمجه وتصميم .. حافز ماقصر اشتريت منه جهاز لاب توب جديد .. لأنه كان مصدر رزق بعمل تصاميم ودعم فني وكذا ..

نصحني صديق ( روماني ) قال اتجه لبرمجة تطبيقات الجوال .. تبي تعيّن خير .. طبعاً لو هو عربي مانصحني وحسدني

وسمعت كلامه والحمدلله الآن ماني بحاجة وظيفتهم .. وانا في البيت ينزل لي راتبي الشهري ..

الراتب متفاوت يصل أحياناً إلى الـ 10 الآف ريال ولايقل عن 2500 ريال شهرياً ..

وبيني وبينكم انا انسان كسول نوعاً ما .. ولكن اؤكد لكم أنه لو اضغط على نفسي لمدة سنه او سنه ونصف أضمن الـ 50 و 60 الف شهرياً ..!

المبالغ مقابل اعلانات داخل التطبيق طبعاً .. شلون لو تنفرد بـ فكرة جديده ومفيده وتبيع التطبيق بـ دولار واحد ..

ليست مبالغة وهي حقيقه لن يصدقها الا من جربها ..

جربوها وتعلموا وخذوا دورات بهالمجال ولاتنسوني من دعواتكم ..

نزلت هذا الموضوع لأن أحب لكم الخير ومريت مثل حالتكم واعتبر كل عاطل همه من همي ..


^^

قصتي هذي كتبتها قبل 6 أشهر تقريباً .. حفظتها بالجهاز ومالله اراد اني انزلها لكم الا الحين

والحين توظفت ولله الحمد

والله اني كنت مرتاح قبل الوظيفه والحين كرررف وتعب وقلة سنع ( أبن آدم طماع ) ههههه

عموماً أبي دعواتكم واسألأ الله العلي القدير ان يرزقني واياكم بالرزق الحلال

الله يوفقك ويرزقك من واسع فضله

اللهم آمين ___

احيانا الضروف تصنع المستحيل تشغل مخك صح




وشاكر لك سرد تجربتك الشخصيه حتى يستفاد منها

الف شكر لك الله يرزقك على قد نيتك الطيبة
والله اني مصدقتك وعلى يدك افزعلي
عندي افكار لتطبيقات مرة ممتازة
وفيه اثنين هنا بالمنتدى احتالوا علي وخذوا الافكار حسبي الله عليهم
طبعاً كل شي تم من خلال الرسايل هنا بالمنتدى وبعدها اخفوا الرسايل الخاصة ماقدرت اتواصل معهم
يعني فكرتين راحوا من افكاري الله يعوض علي يارب
الجهة اللي تعاملت معها دلني عليها لاني عندي فكرتين اخيرتين عسى الله يحفظني من شرهم يارب
واتمكن من افكاري واستفيد منهن

الله يجزاك الفردوس الاعلى من الجنة على موضوعك اللي جاء في وقته

جزاك الله خير

أنا عندي أفكار لتطبيقات الجوال وتفعل فينا معروف لو تدلنا كيف نتعلمها بطرق سريعة
ونصيحة لا تترك تصميم التطبيقات حتى لو ما تشتغل عليها الا مرة في اليوم

أنتظر نصائحك وتأكد انها راح تفيد كثير ولك اجرهم

ما فهمت صراحة انت ايش كانت وظيفتك بالضبط

هل قصدك تبرمج برنامج كامل من الى وتكتبه بأسمك

او تصمم بطاقات واشياء زي كذا

اعذرني بس ما فهمت ياليت تشرح لي

وحاول توازن بين وظيفتك والشغلة هذي دامها تجيب لك مكسب جيد

بالتوفيق