السلام عليكم ورحمه الله وبركاته
مسئولي الضمان اليوم راجعت مكتب الضمان التابع لمنطقتي لإستلام بطاقه الصراف للوالده الله يحفظها
وكانت معي وكاله شرعيه ونصها واضح [[لمراجعه الضمان وواستلام البطاقه والرقم السري وإنهاء كافه ما يلزم والتوقيع
]]فقال موظف البطايق لازم تحضر الوالده او تكتب لنا وكاله خاصه للضمان لان الوكاله اللي معي فيه مراجعه البلديه والضمان
والموظف يقول لازم توضح بالوكاله سبب عدم حضورها هل هو مرض او اقامه خارج المنطقه
ولما الحيت عليه قال عندي تعميم بالشي هذا ياتحضر بنفسها ياتجيب وكاله خاصه للضمان فقط يعني مافيه اي جهه ثانيه مكتوبه بالوكاله
نبي من الاخوان يفيدنا ولو بطريقه وش فايده الوكاله اذا لازم توجيه للضمان وخاصه
يبون
للعلم الوالده زياره لمنطقه ثانيه وترجع
اسئل الله في هالأيام المباركه ان يرزقكم من واسع فضله

وعليكم السلام
والله العظيم منتهى الفساد اخونا الموظف ياأنه جاهل بالأنظمه ياأنه صايم ومايبغى يكلف على نفسه ويطلع البطاقه من الدرج استهتار حتي بالأوامر الشرعيه
شوف مادام معاك وكاله شرعيه غصبا عنه يكمل اجراءاتك مانفع معاه عنده مدير اشتكي حتي على وكيل الوزارة للضمان وهذا ايميله
Moqla@mosa-d.gov.sa
نحن دائما نضيع لأننا نسكت عن الغلط
ربي يسعدك

الله يرحم والديك وما قصرت
والواجب تأديه العمل على اكمل وجه
والله محاسب كل شخص يتخاذل لان هاذي امانه
براجعه الاحد يمكن الله يهديه
وياليت لو فيه رقم اتصل عليه اذا ماضل مصر على كلامه
رقم شكاوي
والله يوفقك ويصلح لك احوالك جميها

اذا ماحصلت فايده فيه روح لمديره روح لوكيل المدير لاتسكت الحق معك

الله يعطيك العافيه
ان شاء الله الاحد انا عند مديره

اشكرك اخي المنتصر بالله
استلمت البطاقه قبل قليل
وحصلت موظف غير اللي واجهته ونفس الاجراءات الأعتياديه في حاله التوكيل
وكاله رسميه للغرض الفلاني واضح فيها وبدون تردد ولانقاش صور بطاقتي والوكاله وبصمت ومشيت
مع العلم ان الموظف اللي قبله خدمه قديمه عمره بحدود ال ٤٥ لكن استغربت تعقيده وعدم تفهمه للنظام
والحمد لله اني ما واجهته اليوم لان كان بيقروشني شوي
الله يوفقك واتبعت نصيحتك وإلا بصراحه كنت بجيب الوالده
شكرا ياغالي

ربي يسعدك

كويس انك استلمت الصرافة بس صدقني الموظف الاول ماقالك هات وكالة خاصة الا هو متأكد وقال لك عندي تعميم بالشيئء هذا لأنه من المتوقع أنك تشتكي ولن يخسر شيئ اذا سلمك الصراف ولن بعض الموظفين يجهل بعض الانظمة والسبب بالوكالة العامة من جهة مشروعيتها فهي شرعية ولكن يستغل بعض ضعاف النفوس كبار السن بعيدا عنك ويستفيد منهم من هنا وهناك