السلام عليكم

لاحظت ان كل المشاريع اللي موجودة في القسم كلها على ارض الواقع وتكلف مبالغ كبيرة

طيب في احد فكر يستثمر فلوسه على الانترنت؟؟؟؟

الاجابات المتوقعة (صعب...ما اعرف...ممكن اتنصب!...خايف اخسر)

اليوم انا حتكلم عن نوع من الارباح منتشر كثير في العالم الا ان هذا النوع مو منتشر كثير في الدول العربية وخصوصا السعودية

كلنا نتصفح مواقع يوميا والبعض يتسائل صاحب الموقع وش يستفيد !

انا اقولكم كلنا ملاحظين ان اغلب المواقع تلاقي فيها اعلانات واكيد ان مافي احد فينا الا وهو ضاغط على اعلان في يوم من الايام!...وبمجرد الضغط كذا صاحب الموقع كسب منك!

مثال اخر:الحين لما تتفرج مقاطع على اليوتيوب ما تلاحظ في اعلانات فديو ومكتوب تخطي؟ او اعلان بجانب الفديو او شريط اعلانات على الفديو؟

طيب اكيد بعضنا يقول هذولي كم يكسبو وكيف يحطو اعلانات وكيف يستلم الفلوس وكم يكلفة عمل موقع؟

عمل المواقع حاليا جدا سهل وفي شروحات كثير في الانترنت واذا تبي تبدأ بموقع ممكن تبدأ بأقل من 100 ريال!!! تحجز دومين (رابط) مثل رابط موقعنا العزيز (https://www.btalah.com) وتحجز استضافة وتبدأ تنطلق...طيب بتقولي الزوار كيف؟؟
انا اقولك اخوي عشان تحصل على زوار لازم يكون محتوى الموقع حصري + تحاول تنشر بطرق مجانية يعني في المواقع وكذا او بطرق مدفوعة مثلا الاعلان في مواقع اخرى عن موقعك او الاعلان على الفيس بوك او الاعلان في خدمة جوجل ادوردز وغيرها الكثير

طيب بعد ما لقينا زوار كيف ممكن اكسب ؟

في طرق كثيرة وشركات كثيرة اشهرها (جوجل ادسنس)

مثلا صاحب موقع حلول البطالة حاب يعلن عن موقعه ودخل جوجل ادوردز وحط اعلان ودفع قيمة الاعلان (طبعا هو يحدد كم ميزانيتة )

بعد ما ينزل الاعلان ويدفع المبلغ ...اللي مشتركين في جوجل ادسنس راح يظهر لهم اعلان موقع حلول البطالة في موقعهم وبالتالي اي زائر يضغط على الاعلان انت بتكسب وجوجل ادسنس ياخذ نسبته

يعني المسجلين في جوجل ادورد يعتبرون (معلنين) اما المسجلين في جوجل ادسنس (ناشرين)

طيب بتقولي كم الارباح؟....لحد الان سعر الصغطات في الدول العربية منخفض (مو تحطيم) انا اقولكم ليه الحين المعلنين العرب لما يعلنو بيخلي اي واحد يضغط على اعلانه سعر الضغطة تكون قليلة تبدأ من سنت وتصل الى 25 سنت (لان التعامل غالبا بالدولار) اما المعلنين الاجانب يسوي حمله قوية ف اي زائر يضغط على اعلان من موقعك ممكن تكسب من نص دولار الى 10 دولار واكثر!!!

طيب بتقولي الضغطات العربية ما حستفيد منها فأحسن اسوي لي موقع اجنبي يستهدف زوار اجانب عشان الاقي ضغطات بسعر عالي<<<هنا لك الخيار في ناس عندهم مواقع عربية والمكسب مرة جيد بس يكون عندهم زوار ب كثير جدا يوميا عشان يحصل على مبلغ كويس ... فالافضل ننشأ موقع بمحتوى اجنبي

برضو ما جاوبتكم كم الارباح اللي بتلاقوها صح؟...لان ما اقدر احدد كل ما يكون عندك زوار اكثر ومحتوى قوي على موقعك كل ما تكون ارباحك اكثر

طيب في ناس بتقولك ياخي انا ما احب المواقع وابي اكسب كيف؟؟؟...عادي ممكن تسوي قناه على اليوتيوب وتكسب منها بأنك تشترك في خدمة يوتيوب بارتنر شيب (ابحث بجوجل لمزيد من المعلومات)
وبعد ما تشترك تسوي حساب ادسنس من خلال البارتنر وتنزل مقاطع لك على اليوتيوب يعني مثلا تسوي برنامج على اليوتيوب بفكرة جيدة او عندك موهبة ممكن تنزلها على اليوتيوب عشان تجذب مشاهدات اكثر للفديو وبكذا ممكن تكسب

وفي طرق كثير بس يحتاج لها مواضيع اخرى

انا اعطيتكم رؤس اقلام ابحثو وبتلاقو كل المعلومات

بالنسبة لي انا الحمدلله عندي 6 مواقع والارباح الشهرية ما بين 5000 الى 15000 الف ريال (قولو ما شاء الله )

والله ما اقول المبلغ للتفاخر لكن ابي احمسكم عشان تبدأو بأفكاركم على الانترنت وخصوصا انها ما تكلف كثير انا بديت بأقل من 500 ريال وحاليا اكسب ولله الحمد

طريقة الاستلام (تحويل بنكي - شيكات (ما انصح فيها) - ويسترن يونيون)

والله ياجماعة الموضوع مو اعلاني لشركة جوجل او لاي شركة اخرى لكن اتمنى من جد ان اللي عنده الرغبة وخايف يتشجع ويتوكل على الله

ملاحظة اخيرة (بعض الناس عنده فكرة جديدة وبحث في الانترنت وما لقى الفكرة وما عرف كيف يسويها...هنا ممكن تبحث عن (برمجة خاصة) يعني عمل موقع من الصفر بالفكرة اللي تناسبك والبرمجة شوي مكلفة (لكن برضو ارخص من انك تبدأ على الواقع) يعني ممكن تكلف 1000 الى 5000 ريال واكثر على حسب قوة الفكرة والبرمجيات المطلوبة)

اتمنى من الادارة تثبيت الموضوع عشان الكل يشوفة ويتشجع ويبدأ برأس مال قليل ويكسب الكثير اذا محتوى موقعه حصري وخصوصا المحتوى الاجنبي

واعذروني لو في غلطات او عدم تنسيق لاني كاتب الموضوع على السريع

والسلام....

وعليكم السلام .. كلام جميل أخوي وأفكار حلوه والله يوفقك

طيب ممكن نشوف مواقعك اللي فيها الإعلانات ؟

عليكم السلام
سبحان الله الذي جعل من عباه منارات للعلم والخلق .
هذا الشخص وفقه الله لينير الطريق لبعض االمشاهدين لموضوعه .
كتب الله اجرك واثابك ورزقك ضعف ما تتمناه لهم .

للرفع

صحيح يكسب لكن بعض الاعلانات غير لائقة وبعضها لامور محرمة وهذا اللي يخليها غير مقبولة عندنا

الله يوفقك