السلام عليكم ورحمة الله وبركاته


الكتاب باين من عنوانه مالكم بالطويله اتصل علي وسألني انت باحث عن عمل واكيد الإجابة نعم
سألني عن مؤهلي وقلت له بكالوريوس العلوم السياسية وعن مستواي في اللغة الإنجليزية وقلت له غير متقن قال يعني كم تقيم نفسك من 10 قلت اقل من 5
وسألني عن مستواي في استخدام الحاسب الآلي وبرامجه وقلت توب توب قال طيب عندي عرض وظيفي لك من بنك سامبا الوظيفة مدخل بيانات ودوامك 5 ايام في الإسبوع ومعك الجمعة والسبت إجازة و 30 يوم اجازة في السنة وتأمين صحي قلت الزبدة الراتب كم قال من 7000 وطالع بس اذا حضرت المقابلة يتحدد اكثر ...
وحدد المقابلة بكره الساعة 10
وش رايكم احس في العرض صاروووخ ارض ارض اللي هو الراتب
والا بنك سامبا كريم يعطي الرواتب ذي والشيء الثاني عندي احساس من سنين طبعاً ان رواتب البنوك ما فيها بررركة عشان كذا ما تحمست للعرض

محتاج مشورتكم يالغالين

الظاهر ان الشركة هذي متعاقدة مع البنك
على فكرة بنك سامبا يعطي اكثر من كذا ويعتبر من افضل البنوك من ناحية الرواتب وبيئة العمل
مشغول بكره؟ وش عندك اطلع المقابلة وجرب حظك ماراح تخسر شيء و اذا ناسبك العرض استخير الله
بالتوفيق

وعليكم السلام ورحمة الله وبركاته ..

شركة الحلول الممتازة , شركة مشغله لعدة جهات ..

العرض عادي جدا ، بحكم معرفتي بالبنك وعدة مرات تجيني
عروض منهم إلا ان العروض المتعارف عليها للجامعيين هي
ابتداء من 8500 الاف - 10500 الاف

روح وادخل المقابلة وبعد ماتخلص أسأل عن القسم الي بيوظفونك عليه
وآلية العمل ,, وبعدها توكل على الله وارتاح وبعدها استخير ربك ..

ونصيحة محب اترك البنوك يعلم الله جتني عروض كثيرة بالذات من بنك سامبا
لكن سبب رفضي انني مارتحت رغم أن أحد مشائخ لجنة الافتاء بالمملكة حلل
الوظيفة وانها لاتتعلق بالربا والامور المصرفيه الغير شرعية ,, لكن بعد الاستفتاء
استفت قلبك قبل كل شيء ..

الان بوظيفة ولله الحمد رغم أن الراتب اقل بكثير من عروض البنك قد يصل للثلث ,,
لكن من ترك شيئاً لله بدله الله بشيء أطيب ’ بأذن الله ..


جميع ماكتب بالاعلى حصل معي في بنك سامبا وعدة بنوك لكن الاكثر سامبا ..


فالك التوفيق ,, واحرص في المقابله انك تتعلم طرق المقابله وتتقنها..

انا اعرف ان سامبا اللي معهم دبلوم يعطوهم فوق الـ7000

اكيد اللي كلمك ما يدري عن الراتب سوي المقابلة وشوف وش يصير معك

كيف ممكن طريقة التقديم ! عندي دبلوم محاسبة ي ليت رابط او ايميل التقديم وربي يوفقك بالمقابله