تكامل وما بعده

Math Math · #1 (**permalink**) 13-08-2014, 01:21 PM

الإخوة الكرام اللي وجهوا في الدفعة الأولى يا ليت تفيدوننا
وش المطلوب منا في تكامل وتفاصيله والمقابلة وما يليها
والكشف الطبي وبقية الأمور اللتي تخص التعيين

محمد الهلاالي · #2 (**permalink**) 13-08-2014, 06:04 PM

اذا فتح لك تكامل
اولا : ارفع الملفات المطلوبه ( صورة من الهويه- صورة من الوثيقه- اخر صفحه من السجل الاكاديمي
- وصورة من الدبلوم التربوي اذا كان الدبلوم منفصل عن الوثيقه) كلها بلون الماضي ( اسود وابيض)
ثانيا : احجز موعد للمقابله الشخصيه
ثالثا : رتب رغباتك وقم بتثبيتها
رابعا : طباعة مسوغات التعيين ( احتياطا) لكن بتحصلها موجوده عندهم

هذا مايخص برنامج تكامل

واذا حضرت المقابله
وخلصتها تأخذ الكشف الطبي ويكون مختوم وتذهب به للمستشفى
واذا خلصته سلمه للادارة

وانتظر نزول قرار التعيين من التربيه
واذا نزل راح يتم توجيهك للمدرسه

ان شاء الله مانسيت شي

لكن لكل ادارة سياستها
وخذ العلم من عندهم
لانه الاكيد

وعقبال التوجيه للمدرسه

البآرون · #3 (**permalink**) 14-08-2014, 04:13 AM

احد مشاركاتي السابقه في تجمع المجمعه

اقتباس:

المشاركة الأصلية كتبت بواسطة البآرون

اهلن اهلن

اولاً : الله يرزقك التعيين اللي يسرك ويفرحك

ثانياً : طال عمرك رتبنا الرغبات في جدارة وحفظنا الترتيب وطبعناه .. بناء على توجيهات الخدمة المدنية

بعدين انتظرنا فترة شهر تقريباً ثم نزلت الخدمة المدنية اسماء المرشحين المدعوين لمطابقة البيانات بدون مايوضحون لنا مناطق تعيين .. مجرد اسماء يقابلها تاريخ موعدك

رحت بالموعد المحدد لفرع وزارة الخدمة المدنية بالرياض ( لأني محدد هالفرع بملفي بجدارة )

وانتظرت الين فتحوا البوابة وخذيت رقم ثم فتحوا بوابة الصالة وخذوا ارقامنا عشان يدبسونها على نموذج نعبيه .. مثل اسمك وتخصصك وزي كذا

وصل رقمي ورحت اطابق وطلب مني الموظف : النموذج + الوثيقة وصورة منها + الهوية وصورة منها .. شافها وتأكد من مطابقة الصور واللي بالموقع بالأورق الأصل ثم رجع لي الأصول ( الوثيقه + الهوية )

قال خلاص روح الله يستر عليك وبعدين بنعلن عن اماكن التعيين

جلست يوم الأحد والاثنين والثلاثاء والاربعاء والخميس وانا انتظر اعلان اماكن التعيين .. المهم يوم الجمعه نزلوا اماكن التعيين الحمدلله .. ثم قالوا لنا روحوا تكامل

الحين انتيهت من وزارة الخدمه المدنية

ننتقل الآن لوزارة التربية والتعليم

دخلت تكامل وطلبوا مني صورة الهوية وصورة الوثيقه وصورة اخر ورقة من السجل الأكاديمي .. مطلوب مني ارفعها على تكامل باللون الأسود وابيض

رفعتها ثم انتقلت للخطوة الثانيه بأني ارتب المحافظات اللي تتبع لها المجمعه ( المجمعه - سدير - تمير - الأرطاوية - مشذوبه ) .. ولازم تطبعها

رتبتها ثم حفظتها وثبتتها وانتقلت للخطوة الثالثه اللي هي حجز موعد المقابله

بالبداية يطردني يقول مابعد حددوا موعد مقابلة .. الين نزلت لي المواعيد

اخترت الموعد والساعه ثم حفظت

ثم طلعت لي نماذج ( ورقة موعد المقابلة - الفحص الطبي - مسوغات التعيين ) لازم تطبعها وتجيبها معك .. وطبعاً طبعتها

والحين انتظر موعدي الأسبوع الجاي عشان اسوي المقابله .. والله يستر ويوفق

وبس

بالتوفيق

Math Math · #4 (**permalink**) 15-08-2014, 10:14 AM

محمد الهلالي + البارون
جزاكم الله خير على الاجابات الوافية
بخصوص الملف اللي يطلبونه هل هو الأخضر أو غيره؟
وليتكم تشرحون لنا مقابلتكم وكيف كانت طريقتها؟

محمد الهلاالي · #5 (**permalink**) 15-08-2014, 05:59 PM

العفو يخوي

بالنسبه للمقابله
محد يقدر يتوقع الاسئله
لان اسئلتهم مو محدده
توقع منهم يسألونك في اي شي
بالنسبه لي لم يتطرق للتخصص
لكن اسئله تقدر تجاوب عليها
واهم شي تكون واثق من نفسك
وكلامك مسموع
لان الغرض من المقابله
يبون يتحققون من سلامة الحواس
وليس من صحة الاجابه

وبالنسبه للملف انا طلبوا مني ملف بلاستيكي فقط

وبالتوفيق

رامي الرامي · #6 (**permalink**) 15-08-2014, 06:36 PM

بالنسبة للمقابلة ولا سؤال في التخصص كلها سوالف وسؤال عن داعش واخذو الصور بدون ملف وفي انتظار قرار التعيين

أعبدالله · #7 (**permalink**) 16-08-2014, 05:13 PM

جزاكم الله خير ...
استفدت من الموضوع الشي الكثير

واذ بي انام · #8 (**permalink**) 16-08-2014, 07:58 PM

الشباب ماقصرو عطوك المفيد .. بالنسبه للملف يختلف من ادارة لأدارة ..

ادارة تبوك عطتنا مجموعة اوراق نعبيها واول ورقه مكتوب فيها المطلوب .. واتوقع اغلب ادارة التعليم عندها شي شبيه لهالاجراءات ..

ابن الاديب · #9 (**permalink**) 18-08-2014, 06:00 PM

مشكورين شباب ، الله يجزاكم بالخير

الله يجعل اللي تسوونه في موازين حسناتكم

عندي استفسار بسيط النماذج اللي مكتوبه ف الورقه كلها اطبعها من الحين و اجيب ملفات او هم يعطوني المستندات المطلوبه

و شيء ثاني ما اشوف صور شخصية من ضمن المستندات المطلوبه ، هل طلبوا منكم صور شخصية ؟

الف شكر مره ثانية ، و الله يكتب لنا و يكتب لكم اللي فيه الخير

عاطل مصفر · #10 (**permalink**) 18-08-2014, 06:16 PM

الف مبرووك للي تعينوا وعقبال للي ماتعينوا

الحمد لله تعينت بحفر الباطن

الله يجزاكم خير على المعلومات.

كيف ادخل على موقع تكامل ..
انا ارسلوا لي رساله من تكامل وكذلك موقع المنطقة اللي تعينت فيها وهي الحفر ايهما ادخل ياشباب

كيف اسجل في موقع تكامل فززعتكم ياراعين الخير