السلام عليكم ورحمة الله وبركاته
اخواني واخواتي ابغى استشيركم بمشروعي
وهو ان افتح محل واوفر افطار للمعلمين والمعلمات ويكون فيه توفير قهوه وحلى
والاكل اكون اتفق مع طباخات الي يبيعون اكل بالبيت ويكون اكلهم نظيف ومنوع
لكن اسؤال هل البلديه تحاسبني اذا الاكل جهته غير معروفه يعني هم ماراح يطلعون على مطبخ الي يطبخون
وايش الجهه الي تعطيني التصريح؟

اختي ابدي من بيتك كثار بدوا من بيتهم.وسوي لك منيو .واعطوه حارس المدرسه وهو يوزعه

اكيد راح تحاسبك وتجي تعاين بنفسها البلديه بس كل شي له ثغرات ممكن تستفيدي منها

مشروعك يندرج والله اعلم تحت مشاريع الايدي العامله في ناس من اللي دخلو هالمجال اللي اعرفه يكون البيت او المكان اللي ينطبخ فيه مجهز بشكل خاص في لجنة تنادينهم تشوف وتعاين المكان ويعطونك تصريح يعني مثلا علب واكياس حفظ الاطعمه تكون لها مكان خاص ومرتبه في ارفف خاصه وادوات الطبخ والمطبخ مجهزه وثلاجات وارفف المعلبات لها مكانها مو شرط المكان كبير بس المهم يكون مهيء لكل شي مكانه بعد كذا تبدين تزاولين المهنه هذا في حال تبغين تمشين بشكل رسمي وصريح
وانا انصحك بالهالطريقه طالما انك هيئتي المكان مارح يرفضو لان الحين مشاريع الايدي العامله مدعومه كثير وناس كثير دخلوها بس الشطاره في الطعم وجودة الطبخ

فكره رائعه جدا بس ماانصحك فيها لان عينه المعلمين والمعلمات بربربه كثيره بتجيك من وراهم
لو واحد مغصه بطنه بيشتكي وبلبله لو شفتى غير التعليم يمكن يكون ممتاز مثل محاكم او شركات خاصه بعد توفير المكان الصحي المناسب لعمل الوجبات واخذ الترخيص اللازم لذلك وياليت توافينا بتجربتك لانى دايم افكر في هذا المشروع

اختي والله المشروع من افضل المشاريع النسائية

عن نفسي : معلم في مدرسة وتعبت انا والزملا من المطاعم السيئة

سويت اعلان في الحي ووافقت احدى العوائل على ذلك وبدينا الصباح

يكلفون سائق ياخذ الفطور الى المدرسة سنة كاملة

والله احلى وانظف فطور وكل المدرسين يشكرون ويدعون لصاحب الفكرة

وكانوا يتواصلون معنا ويستفسرون عن اي ملاحظة

والله ان الموظفين بشكل عام مايهتمون كم يدفعون اهم شيء يحصلون

فطور حلو

انا أويدك على ذلك لما يعود عليك بالفائدة باذن الله

المعلمات والمعلمين بالعكس اكثر شي .. واساليني عن اختي معلمه وتقول الصواني داخله طالعه

خصوصا ايام الاختبارات لانهم يجلسون لبعد الظهر ...
وعن تجربة شفتها ولد اختي سادس ابتدائي صار عندهم طبق خيري وامي سوتله جريش من بعدها المدرسين صارو يجون عنده في مناسبات المدرسة يقولون نبي نطلب جريش من جدتك وامي تسويله

فتوكلي على الله وابدي مشروعك

والله ما أحد يسأل عن التصريح لا بلدية ولا جن ولا عفريت . اذا كان الشغل بالبيت , إلا في حالة أنه أحد تضرر من الطعام وأشتكى عليه

الناس شغالين لهم سنين ومعينين خير ...