أيش اللي يجبرني اني أشتغل في شركة طالبة خبرة ولغة وشهادات وفي النهاية براتب ضعيف,
وفي المقابل أقدر أتوظف كاشير أو بائع في سوبرماركت أو مطعم وجبات بشهادة الثانوية أو المتوسطة وبراتب حلو,
انا اشتغلت بشهادة دبلوم سنتين بعد الثانوية في أماكن فيها عوار راس وتحتاج تركيز وفيها محاسبة على الأغلاط واطلع للموقع وآخذ المقاسات وارجع للمكتب وأشتغل على الجهاز (كرفXكرف) وفي النهاية يقولوا لك السعودي مب كفو للوظيفة وماهو بقد المسؤولية ونظرتهم له على انه حق نوم مب شغل وراعي غيابات وتأخير في الدوام ويحاسبونه على أقل شي, إستئذان مرة وحدة في السنة يشوفونه معصية لاتغتفر للسعودي لكن الأجنبي يوميا يحضر للدوام متأخر عادي هو مؤدي شغله على أكمل وجه بالنسبة لهم,
والله اني اشتغلت مع أجانب بنفس المسمى الوظيفي وأكرف وأتعب أكثر منهم والمدراء يعرفون هالشي لكن الفضل في النهاية يرجع للأجانب والسعودي ياكل تبن,
أحيانا أفكر أترك وظيفتي اللي راتبها مايوصل راتب كاشير في العثيم أو محاسب في مكدونالدز أبرك لي من هالشغل اللي يذلني مع الأجانب فلبينيين وهنود نفس شهادتي إذا مو أقل يحطونهم مدراء علي وعلى اللي مثلي اللي عندهم شهايد وخبرات كل هذا لأن نظرتهم للسعودي نظرة إحتقار,
بس حبيت أكتب وأنفس عن نفسي عن السنوات اللي ضيعتها في مجالي وتخصصي 7 سنوات غير دراسة بعد الثانوية مدة سنتين أحس ان مالها قيمة لأني سعودي مو هندي أو فلبيني أو حتى مصري أو فلسطيني.
7 سنوات اشتغلت فيها بخمس شركات مايقدرون السعودي فيها حرام في بلدنا ونعاني الأمرين من هالأجانب وللأسف الظلم يجيك من مدرائك من بني جلدتك تحصله يفضل الأجنبي على ولد ديرته حسبي الله ونعم الوكيل على هالنوعية من المدراء.

حاليا أشتغل بشركة عالمية لها فرع بالمنطقة الشرقية والراتب ولله الحمد ممتاز لكن بجد أفكر أتركهم وأروح أشتغل في مكدونالدز كمحاسب أو سوبرماركت العثيم لأني بجد بجد منكرف وأتحمل فوق طاقتي يطلبون مني أنجز شغلات معقدة في وقت قياسي,
أنا متزوج وعندي ولد وبنت وساكن بشقة إيجار فلو تركتهم بأخسر الراتب الحلو ولو رحت محاسب بماكدو بتصير علي ضغوط مالية وراح تضيع سنوات الخبرة في تخصصي وشهادة الدبلوم على الفاضي,
بس خلاص طفشت وطقت نفسي من شغلتي اللي مايقدرون فيها السعودي ويحملونه فيها بفوق طاقته,
يكلفوني فيها فوق طاقتي وينظرون لي نظرة ان سعودي كسول ومهمل في شغله,
هذي المشكلة في أغلب الشركات إذا مو كلها,
وانا قصدي الشركات الهندسية.
أبي نصيحتكم, وشكرا.
أجلس بمكاني علشان الراتب حلو وهم مشغليني بشهادتي وخبرتي؟ والا أشتغل بمكان أقل من شهادتي وخبرتي بس بأخسر الراتب والشهادة والخبرة بتروح على الفاضي؟ وأعيش براتب قليل في ماكدو أو العثيم أو بنده مثلا بس على الأقل مرتاح من ناحية عوار الراس والتركيز وضغط العمل اللي محصله في هالشركات الهندسية وبيكون عندي ضغط مالي.

السلام عليكم ورحمة الله وبركاته

بصراحة ما ألومك بعض الشركات أو نقول الأغلب يهضم حق المواطن السعودي وللأسف أحيانا يكون من مدراء سعوديين مثل ما تفضلت وهنا الطامة الكبرى...

بسألك كونك عندك خبرة هل تقدر تجي الأحساء

وكم راتبك حاليا ما تدري يمكن نقدر نفيدك بشيء

وفق الله الجميع

انت كـ مواطن سعودي . تناول قليلآ من البرسيم الجاف الذي يطلق عليه تبــن وافلح.. لين اذ رحت تشتكي ل مكتب العمل اكيد الشركة مزبطه امورها .. مع كم فاسد هناك ..واذ رحت محكمة جابولك محامي . يماطل فيك لين تعوف نفسك ...ام الاجنبي من يروح يشتكي لي سفارته صدقني الشركة على طول تتقفل ..والسالفة الشهيرة الي تقفلت فيها شركة المديفر الفلبيني الي خصمو عليه 31 ريال بس .. سفارته ماخلته.. قفلت ابوي الشركة يومين كاملة لجل 31 ريال .. اما انت فايدرون محد حولك لامكتب عمل ولا شرطة ولا محكمة حقك ضايع .. وفي تفسير قريب انت اجنبي على هذا البلد

للأسف هذا حال الشركات في بلدنا اصبح الاجانب الغرباء لهم سلطة على ابن البلد

لكن اللوم مو عليهم اللوم على اللي جابهم وفضلهم عن ابناء البلد

ولا ما كان وصلو لهذي الدرجة من الاستهتار ومحاربة المواطن وتطفيشه

جزاك الله خير أخوي مميز الأحساء,
انت سألتني ان كنت أقدر أجي الأحسا أنا أصلا من الحسا بس ساكن في الدمام وأشتغل في الظهران,
وهو هذا اللي بيصير انا صابر وبصبر لمن ربك يفرجها وأحصل مكان عدل وبراتب زوين,
كل اللي أبغاه هو تقدير لأعمالي وراتب يناسب مؤهلي لكن المتوفر حاليا هو إما راتب ممتاز ومعاه عوار راس أو راتب قليل ومسؤولية بسيطه,
ولو يحصل لي شغل بالحسا هذا هو المطلوب.
حاليا أستلم بعد خصم التأمينات 10,800 ريال أدري بتقولون عني غبي لو اني تركتهم على هذا الراتب بس الراحة النفسية أهم من الفلوس.
لو يحصل شغل بالحسا يناسب مؤهلي حتى لو راتب أقل من العشرة بقليل مو كثير راح أروح على طول وبدون تفكير.

والله انهم أحيانا الفلبيني أو الهندي اللي حاطينهم علي مدراء يجوني ويعطوني شغل مب من اختصاصي ويبغوني أخلصه لهم وأشتغله لهم وأخلصه وماأقدر أرفضه لأني لورفضته بيقولوا لي يالله على الباب ومع السلامة,
أنا الوحيد في تخصصي في القسم والضغط كله علي وعارف انهم حاطيني بالهراتب الحلو علشان يستفيدوا مني في السعودة وانا ماأبي أتركهم لأني عندي ضغوط مالية.

حسبي الله ونعم الوكيل خلهم يسرحون ويمرحون في الدنيا لكن راح يلاقونها باالآخرة