23-08-2014, 03:24 AM
|
عضو نشيط
|
|
تاريخ التسجيل: Mar 2011
المشاركات: 142
معدل تقييم المستوى: 28
|
|
بنات أنا بأقولكم نصيحة
أنا مثلكم ترى .. لا ومعي ماجستير .. ولا لاقية وظيفة إلا تعاونة فقط !!
تعرفون وش معنى متعاونة ؟؟ يعني تكرفين كرف الويل وتستلمين فلوسك نهاية الترم فقط كمكافأة ( مش راتب ) !
ومالي لا راتب تقاعدي ولا تأمينات ولا غيره !!
وإذا جيتوا على التثبيت كموظفة رسمية .. قالوها لنا وبالفم المليان ما فيه أمل لأنكم غير مستقطبات ( الطالبات المبتعثات ) !!
والله ما تحسون ش كثر كرهت شهادتي وحسيت نفسي انسانه حقيرة وفاشلة وكل شيء .. وش فيني ما يقبلون فيني معيدة ولا محاضر .. ولا حتى معلمة في مدرسة عن طريق جدارة اللي أبدا ما جاني منه ترشيح !!
لكن هذا أمر الله وهذا حكمه وما ندري وين الخيرة فيه
بنات نصيحتي لكم ..
لا تخلين مكان ما تقدمين فيه
جربي كل الوسائل .. تلفون / ايميل / تروحين لهم شخصي ( وهو الأفضل وعن تجربة )
سيرتك الذاتية ما ينفع ترى اللي مكتوب بالورق .. ترى أنا يوم أروح بنفسي وأعرف بحالي واقولهم سيرتي الذاتية بلساني أحس الناس تقتنع فيني ويقبلوني والله ..
والحمد الله عندي الحين خبرة 3 سنين ( سنتين بمدرسة أهلية / وسنة بالجامعة متعاونه )
وما زلت أسعى في اللي أفضل منه
بنات .. الوظيفة يبي لها حفر في الصخر وش ما كان معك شهادة .. تحفين تحفين تحفين لين تلقينها ... وبتلقينها... بس الصبر ثم الصبر ثم الصبر .. ثم التعامل الحسن مع الناس في بيئة العمل .. ثم الاخلاص والاجتهاد في العمل .. ( قالها أبوي لي )
وأنا أزيد عليه .. لا تتشرطين في الراتب ولا الكرف ..
نقطة همه جدا جدا ..
أنا زميلاتي ( للأسف ) يتشرطون في الشغل بصورة كبيرة ..
* المكان بعيد >> ما فيه وظيفه بتكون قدام باب بيتك أصلا
* الراتب قليل 1500 >>> اصبري عليهم يزيدونك .. المهم تستلمينهم شهريا وبدون ظلم وبدون اجحاف من أصحاب العمل .. و1500 من تعب يدك وشقاك أزين من زيرو ولا شيء ولا غيري يصرف علي وكأني عاله عليهم
* الشغل مو ع الراتب >> تبين راتب بدون شغل !! مستحيل طبعا .. إذا بتحطين مقارنه بين ضغط العمل والراتب عزالله طول عمرك قعدتي بالبيت
* أول يوم داومت فيه ما ارتحت لهم ولا للناس اللي فيهم وتركتهم >>> اسمحوا لي ذي نفسية !!
* المديرة أو رئيس العمل تعامله زفت / العاملين أو الموظفين ينقلون حكي >> انت سوي اللي عليك والتزمي بأخلاقك وعملك وبس ما عليك من غيرك .. انت ماراح تربين الناس
* ما أبي أشتغل بخاص يستغنون عني بسرعة وقوانينهم صارمة .. أبي حكومي >> أقول عصفور باليد ولا 10 على الشجرة .. والفرصة تجي مره وحدة ولا تتكرر أبداااا
^
طبعا هذا ملخص للي أسمعه عن زميلاتي وللأسف عاطلات بمعنى الكلمة وما غير يتشكون
لذلك بنات .. الا تقعدون ابدا ابدا ابدا .. سوي كل ما بوسعك وتقدري عليه .. المهم تشتغلي ... وش ما كان العمل بسيط ولا صغير .. وش ما كان الراتب قليل
المهم فقط .. انك تكوني متنبهه لحقوقك كموظفة .. راتبك تستلمينه شهري وبدون اجحاف أو تقصير / مدير العمل ما يظلمك في تقييمه / وعقدك إذا كنت موظفة في الخاص وموضحة فيه كافة الشروط بين الطرفين
والله يا بنات أنا كنت في مدرسة أهلية قعدت عندهم سنتين وبراتب 1800 بس .. والله ما شفت منهم الا كل خير ( على الرغم ان المدرسة كانت سمعتها سيئة قبل .. بس تغيرت يوم توظفت عندهم ) .. والحمد الله راتبي شهريا ينزل وبدون نقص ولا حتى نص ريال .. ويوم طلعت من عندهم ( عشان أكمل دراستي ) صاحب المدرسة أعطاني 500 ريال تقديرا لجهودي عندهم .. صدق انها قليلة لكن والله بنظري كبيرة لأنه عارف ان فيه ناس تشتغل عنده ... وبعد سنة ونص دقوا علي تعالي محتاجينك ارجعي لنا ( بس كنت تني أدرس بالماستر ) هذا دليل انهم فعلا ما يستغنون عن أي أحد
والله يا بنات ترى القطاع الخاص مب لذي الدرجة سيء .. صدق فيه منهم سيئين بس مو كلهم .. ويبون موظفاتهم اللي دربوهم ولا يستغنون عنهم
عذرا على الاطالة .. بس حبيت أفيدكم عن تجربتي وأعطيكم نصيحتي
والله يرزقني وياكم بالوظيفة الرسمية أو أي وظيفة فيها أمان وظيفي وتقر عيونكم ان شاء الله
=)
|
العرض العادي
