السلام عليكم ورحمة الله
انا اختكم المها خريجة أحياء ، سجلت بالموقع مخصوص عشان ارد عليكم لأن الموضوع يخصني انا او اي خريجة احياء
بالبداية ليه حنا مهتمين بقياس ؟
لأن نقاطنا بجداره معتمده على ثلاث اشياء:
المعدل الجامعي وعليه 40% من النقاط
اختبار كفايات وعليه 40% من النقاط
اقدمية التخرج وعليه 20% من النقاط

المعدل الجامعي اذا تخرجتي ماتقدرين تعدلين عليه خلاص كتب الكتاب وجف القلم
اقدمية التخرج كل سنه تمر عليك بعد التخرج تزيد نقاطك نقطتين لحد ماتكملين عشر سنين ويصير معك العشرين نقطه كامله
قياس وما ادراك ماقياس! الحل الوحيد عشان نرفع نقاطنا هو العلامه الجيده في اختبار قياس
اول اختبار قالوا صلاحيته 3 سنوات
بعدها بسنه قالوا صلاحيته 5 سنوات
بعدها بسنتين قالوا يخفض الحد الادنى للنجاح من 55 الى 50
قبل شهر او اقل قالوا صلاحيته دائمه
يعني اذا نجحتي ماتعيدين بعد خمس سنوات
يعني كل سنه يفتحونها لنا اكثر
لكن في الواقع حنا مانبي ننجح وبس لأن الغرض من الاختبار الوظيفه الحكومية

انا قبل سنوات اختبرت قياس واخذت درجه موب شينه ولازينه لكنها ماتوظفني الا بعد سنواااات
وش الحل ؟ احط ايدي على خدي وانتظر!! لااا اتعب واتعب اهم شي احصل الوظيفه
عشان احسن نقاطي في جداره مابيدي الا اعدل درجة قياس لان معدلي الجامعي ثابت ما اقدر اغيره والزمن ما اقدر اقدمه عشان احصل نقاط اقدمية التخرج
طيب اذا اعدت الاختبار واخفقت او نزلت درجتي وش السواة ؟
انا ارسلت للمركز الاعلامي بقياس وسألتهم قالوا حنا فقط جهه منفذه يعني نختبركم ونرسل درجاتكم لوزارة التعليم
كلمت الخدمه المدنية بما ان التوظيف بيدينهم قالوا وزارة التعليم هي المسؤوله فقط عن احتساب الدرجه الافضل من عدمها.
سألت مبارك العصيمي المتحدث باسم وزارة التعليم قال تحتسب الدرجه الافضل قلت له ولو اخفقت قال نعم.
التصاريح الرسمية موب لعب يقولونه اليوم ويهونون بكرا
لذلك تحمسوا واتعبوا لأن نهاية الطريق وظيفه وراحة بال
لاتهتمون بأي احد يثبطكم ترا الرزق موب سهل يبي لنا شوي حماس وتعب
نجي لاختبار قياس او المسمى كفايات..
الاختبار موب قاعد يقيس مستوى ذكائك الاختبار يقيس ثقافتك التعليمية
لذلك قبل تدخلين لازم تدرسيييين
وش ادرس ؟!
كتاب رام 1
كتاب كفايات المعلمين القسم العام للبابطين
كتاب كفايات القسم العام لامل القحطاني
هالكتب بالنسبة للاختبار العام بأقسامه الثلاثه (تربوي وعددي ولغوي)
ملاحظة: اي سؤال بالتربوي اختاري اي شي لصالح الطالب وانسي نفسك هذا اللي يهدف له التعليم بالوقت الحالي
نجي للتخصص
كتب الاحياء 1 و 2 و3 ثانوي وخصوصاً اول ثانوي

نصيحه تصفحي الكتب تصفح مره وثنتين وبكذا ماراح تملين ولا تحسين انها دراسه.
اخيراً جداً اسفه على الاطاله وانا بالخدمة حبيباتي..