إلا وقت قريب ماكنت مصدق إن فيه شخص ممكن يبيع نفسه ويخون أقاربه الخاصين عشان الريال!!

الموضوع باختصار أن الوالد بعد ماتقاعد واستلم حقوقه فكر يستثمرها بمشروع صغير .. فقال لي إذا جاك واحد ثقة من خوياك ولا من الجماعة يبي أقساط (سيارة - أثاث -بطاقات) خله يجيني وباعطيه بربح يسير وأقل من السوق .. فقلت له أبشر

وبالفعل قسطنا على ناس من الزملاء وتجملوا بالانتظام والسداد.. حتى قابلت أحد أقاربي الخاصين جدا في المعارض بالصدفة وأنا أوقع عقد سيارة قسطتها لأحد العملاء .. سلمنا على بعض وسألني فقلت له ( حقوق الشايب ) نشغلها بدل ماتجلس مجمدة بالبنك

بعدها بأسبوع كلمني جوال وقال فيه واحد من زملائه بالعمل رجال راعي دين ويخاف الله بس عليه ظرف ويبغى سيارة أقساط وأخوه بيكفله .. فقلت له خويك وتعرفه بالله عليك الرجال ثقة؟؟ قال مايحتاااااااج .. المهم قابلتهم بالمعرض وقسطتهم وعطيت قريبي سعي 1000 ريال

الاسبوع اللي بعده نفس الكلام جاب لي أحد خوياه بالعمل وأخذوا بطاقات بحوالي 30 ألف .. وبرضو عطيت قريبي السعي وكنت والله أتشجع على البيعة عشان يستفيد هو بعد .

بعد 6 شهور صار عندي 4 من خوياه بالعمل كلهم ماخذين مبالغ وصل مجموعها حوالي (100 ) ألف ريال!!

انقطعوا كلهم -مرة واحدة- عن القسط بعد آخر مبايعة وجلسوا غاطسين 6 شهور وكل مادقيت على قريبي يقول لي عليهم ظروف ويتعذر لهم وتكفى أصبر على خوياي ...الخ
حتى أرقام جوالاتهم ماعطاني إياها عشان أكلمهم .. وكل ما أطلبه الأرقام يقول كلكم عصبيين وبتخطون على بعض .. المهم يصرفها

حتى قابلت بالصدفة أحدهم في وزارة التربية ومسكته مع يده وقلت له ماتروح اليوم إلا على جنازتي وخلهم ياخذونا للشرطة وساعتها كل واحد ياخذ حقه

آخر شي إنهار الرجل خوفا من الشرطة والمشاكل واعترف بالكارثة الكبرى
قال لي ترى كل خويانا اللي أخذوا منك مجرد واجهة فقط .. والفلوس ياخذها ولد عمك !!!!!!!!!!!!
شلووووون كييييف ؟؟!!! قال يجي العمل ويدور شخص غرقان بالديون وماتفرق معه إذا انسجن أو انمسك .. أهم شي يلقى فلوس يمشي بها حاله .. فكان ولد عمك يقول له تعال أوديك واحد يقسطك وتطلع منه مثلا بمبلغ (30) ألف .. خذ منها عشرة الاف وعطني عشرين !!!!!!!!!!!!!!!!!!!!!!
وتراهم مطفرين وعليهم مطالبات وأنت واحد من مائة واحد يطالبهم !!!!!!!!!!!!!!!!

والله ياجماعة ماعد ناقشته .. تركته وانصرفت مقهووور من هذا الخسيس وفوق هذا كنت أعطيه السعي !!!

ومن يومها مختفي ماعد يفتح جواله وناقل من بيته .. وأنا خلاص الفلوس ماعادت أكبر همي .. هاجسي الأكبر كيف أرفع على قريبي هذا قضية تبرد قلبي فيه .. لن أشتكي بالعقود أو أطالب بالمبالغ أبي الطريقة في صياغة شكوى تدينه بالتحايل والتلاعب .. وأحيانا أقول مالي عليه مدخل لأن العقود بأسامي خوياه وماراح يجيه شي !!!

ماستغني عن شوركم ياشباب .. المعقبين والقانونيين أو أصحاب الخبرة نورونا

هل عندك كمبيالات مبصمهم عليها؟
عندك سند أمر؟
شيكات؟
اذا ماعندك الله يعينك تعلم من غلطتك وطلعلك سجل تجاري تقسيط واطبع عقود بيع وكمبيالات وبصم كل عميل على كل عقد باصبع ابهامه الايسر الكبير.

تقدر تشتكيهم واذا ما حضروا يحضر كفيلهم واذا حضروا اكيد بيعترفون عليه

بس نصيحة اذا علاقتك مع اهله زينه دخل واحد من عقالهم وقل له الموضوع قبل تشتكي علشان صلة الرحم استنفذ كل الحلول السلمية ولأنها في النهاية بتكبر بينكم واذا الله منعم عليك واسترجاع المبلغ ما هو ضروري في الوقت الحالي لا تشد في الموضوع وبيفتحها ربي في وجهك

الحقيقة هذي من مشاكل التعامل المالي مع الاقارب ما وراها الا الخساير ووجع الرأس خذها درس ولا تتعامل تجاريا مع قريب

اطلب حقوقك منه بسياسة اذا مانفع مابينكم الا المحاكم ولا يلحقك لوم

عليكم السلام ،بالنظام تقدر تجيبه، ولاتسوي مشاكل ولاهم يحزنون بما ان عندك اوراق روح للمحكمه او الشرطه الجهه المختصه وقولهم كل السالفه من طق ل السلام عليكم وبيجيبون حقك بالنظاممم
بس وين ابوه وين اهله !!