بسم الله الرحمن الرحيم .

السلام عليكم , وشلونكم عساكم طيبين ان شاء الله ~
قبل لا أتخرج هالسنه , إتصل فيني ابوي قال : عطني رقم إثباتك < كرت العايله معي انا طبعاً .
وعطيته وقلت ليه ؟ قال يجيك راتب وانت قاعد , انا عن نفسي إستانست ..
طالب ويجيك فلوس والله نعمه , العموم قال لاتعلم احد ووظيفتك جاهزه بإذن الله - قلت ماعندك مشكله .
( وظيفــه خاصــه )
بعد هالكلام بشهر إتصل فيني وقال تعال للديـره الفلانيه علشان اعطيك بطاقة التقاعد , رحت وإستلمتها واحس الوناسه قطعت وجهي .
ورجعت لديرتي وبعدها بإسبوعين قال ياولدي انا ابي سياره بإسمك وخدماتي موقفه ومن هالكلام .
قلت ابد ماعندك مشكله < كنت ابغاه يرتاح ولا يعاني من أيّ شي .

رحت وقالي ترا هذا المكتب الي تشتغل فيه وعلمني وش اقول إذا جانا المندوب من الوكاله , قلت ابشر - وجاء الرجال وانا على المكتب مسوي اطقطق على الكيبورد , كأني موظف ههههههههههههه والله كل ماتذكرت الموقف هذاك اضحك تسثيير تسثيير.
المهم سئلني عن الراتب ووين ساكن و و و اسئله كثيره قالها ابوي قبل لايجي الرجال والحمدلله جاوبت ولا تلعثمت .

ورحت للوكاله مع ابوي وسويت كل الاجراءات - واستلمت السياره وسلمّت ابوي المفتاح وقلت يالله يبه مع السلامه ورحت لديرتي ^_^.

انا حالياً إسمي بالتأمينات الإجتماعيه وعلى رأس العمل - ولا ادري كم أستلم لأن ابوي الي يستلم بدالي ..
معي بطاقة التقاعد ويجي فيها 2500 ريال , وابوي الله يسعده مايصرف على البيت وازعجوه اهلي بالرسايل , وفكر وجابها صح ! وقال ليه ما أوظف ولدي واخذ راتبه واعطيه بطاقة التقاعد على اساس إني اصرف عليهم .

لعب على الحبلين , وخلاني ما اخذ الفلوس كامله لأني اذا خذيتها اتصلو فيه وقال عطهم .
وبعض المرات يقولي خذ الفلوس كلها ؟!
يحاول يرضييني ويرضي أهلي .
المهم صرت أخذ 500 ريال بس .. علشان مايرسلون له وتصير مشاكل < مع إني المفروض اخذها كامله لكن الشكوى لله .


مشكلتي الله يحفظكم إني ما أقدر اتوظف ! وفيه معهدين قبلوني ومن ظمن شروطهم إنك ماتكون مسجل بالتأمينات : )
والمشكله الثانيه إن السياره بإسمي وباقي 4 سنوات وتخلص .

تكفوون والله من رمضان وانا حالتي حاله , وكل ماتقبّلت أمي تقول ليه ماتتوظف ؟ ماتدري إني منكب ولا يمديني .

س : أقدر أدرس ؟ او اطلع بعثـه ؟ وهل اقدر اوقّف اقصاد السياره ؟ وكيف أدري كم أستلم ووين أنا موظف .

الله يسعدكم أتمنى إنكم تردون وأسف على الإطاله .