انتبه لعمرك خلاص
:
كل يوم نقول بيوقف بينتبه لعمره ... بس ما فيه فايدة
:
ولد فلانه ما شاء الله تقول امه مهوب يذوق السكر والرز .. والحين ( غدا ) نصفه .. " غدا = اصبح "
:
انصف اكلك .. ما نقول لا تاكل بس انصف اكلك
:
من يبغاك انت ؟؟ .. والله لو معك شهادات الدنيا ما فيه بنت بتقبل بك
:
فلان ارفع وش اسمه .. قدامنا مطب لا يحك الموتر
:
فلان والله انك تلعب بالموتر لعب .. اجلس في النص تكفى

..

باختصار .. هاذي عبارات يومية يسمعها كل سمين سعودي

اليوم ابتكلم عن حياة السعودي السمين منذ نعومة اظافره ..

السمين & السمينة

كلهم كانوا في يوم من الايام اجسامهم عادية .. بس بقدرت قادر صار اللي صار

ابتكلم عن نفسي انا .. يعني انا بصراحة احمل سبب سمنتي لابوي وامي وكل اقاربي .. يعني انا اذكرهم لما كنت صغير وش حليلي كانوا يقولون كل كل .. فلان ياكل صحنين وانت ما تقدر تكمل صحن .. يجيك خالك يقول اذا اكلت صحنك كله باشتري لك من البقالة >> يعني توي ماكل وبيوكلني بعد .. خالتي الله يذكرها بالخير اذكرها تصلح لي كبسة في الساعة 4 الفجر عشان تقبص خديداتي
بعد هذا كله وش تبون جسمي يكون

بديت اسمن .. عمري 7 سنوات دخلت المدرسة وانا لاني سمين بس ما تقدر تقول نحيف .. تفاجأت بالطلاب اللي كانوا مثل عمري .. الكل كنت اشوفهم تحتي .. انا وكم واحد نعتبر اضخم الفصل .. هالشيء كان يضايقني .. طلاب المدرسة من جهه .. ومبزرة اقارابي من جهه .. الين سلمت الامر اني سمين بعد كم مقارانة سويتها في نفسي ..

المتين - لا فخر - وهو في الابتدائي .. تلقاه في المدرسة افضل حارس في الدوري >> كرموني والله .. و في العزايم اذا سوو المبزرة سباق يصير هو الحكم .. غالبا اذا صار فيه لعبة فيها فريق عيال وبنات تلاقيه مع البنات مدري ليه

ااما اذا جينا للمتوسطة .. فهنا ينقسمون شعبة المتان الى قسمين .. اما انه يكون دافور الفصل .. او انه يصير اقوى واحد في المدرسة .. ورئيس اقوى عصابة في الحارة ..
في هالمرحلة .. يبدأ الشعور بالاحباط والبؤس من شكلك .. وتبدأ المقارنات بينك وبين احلا واحد في المدرسة .. ولكن سرعان ما يزول هذا التفكير والاحباط .. ما ادري ليه
في هالمرحلة .. قررت اني خلاص .. اصير مشعل النحيف والعب كورة مع عيال الحارة >> كان طموحي في ذيك الفترة .. لكن للأسف .. بائت المحاولة بالفشل

نجي للثانوي .. صرت خلاص متأقلم مع الوضع .. واللي حبوك يبونك كذا .. كونك اظرفهم وخفيف دم و محبوب من الجميع و لطيف >> على قولت بعض الناس .. في كل صيفية اشترك في نادي لتخفيف الوزن .. مدة الاشتراك شهر .. احضر اوول اسبوع كل يوم ساعة و باقي الاشتراك اسحب عليه ..


الحين .. المرحلة الجامعية .. بدأ البؤس والحزن يعود مجددا .. لكن السبب مو مقارنة نفسي بأحلا واحد في الجامعة .. لا .. السبب انه في هالمرحلة يكثر التفكير في زوجتك وهل بتقبل بك ولا لا .. وكيف بتخفف وزنك .. ( احصائية : * يعتبر السمين هو السعودي الوحيد اللي ما يكلم بنات في مرحلة المراهقة * ) .. لكن سرعان ما ينصدم بالفراغ العاطفي اللي يعيشه .. ويصير يحب كل من هب ودب >> .. تصدقون اعرف واحد من شلة المتان حب وحده من اسمها .. والله فراغ عاطفي موب سهل

>> في كل سطر وانا اكتب هالموضوع يجيني شعور يسألني : طيب وبعدين ..؟؟ وش الهدف من الموضوع ؟؟


المهم ..

ابي اجابة صادقة وصريحة من الشباب و البنات ..

1- هل السمنة سبب كافي - بالنسبة لكـ ( لكي ) - لرفض البنت او الولد السمين ..؟
يعني لو توفرت جميع الشروط اللي تبيها ( تبينها ) في الولد او البنت .. لكن كونه\ــها سمين ـة ممكن ترفض او ترفضين ؟؟
وكيف تنظر او تنظرين للبنت او الولد السمين ـة اللي تعرفه او تعرفينها ..

و اللي عنده تجربة .. كان سمين وصار نحيف .. كان نحيف وطلع تفخ .. يشاركنا خبرته
برضوه البنات .. كانت سمينة وحققت امنيتها وطلت نحيفة .. او العكس ..
وبس