المشاركة الأصلية كتبت بواسطة تاسع بن سادس

السلام عليكم ورحمة الله وبركاته


اولاً ارحب بك وارحب بالاخوان اللي بيض الله وجيهم وماقصرو , وثانياً اعتذر على تأخيري بالرد ,


ندخل بموضوع اخوي اطخم , من اللي قريته وانا اخوك ابحط اللوم عليك مو على اهلك واسمحلي بالكلام هذا ,


واللي متضح لي انك عجل وتبي كل شي بسرعه واعتقد انك اتذمر لو ماحصلت ع اللي تبيه , وهذا من كلامك بإنك اتحسس كثير من امور كلها بيد رب العالمين ,



عشان تقتنع من كلامي ! شف مصايب غيرك سواء بالسعودية والا خارج السعودية من الدول الفقيره وبعدها قل الحمدلله



لانك ماراح تقتنع الا لما تشوف مصايب غيرك , لها السبب الناس تقول من شاف مصيبة غيره هانت عليه مصيبته ,



انا ليه حملتك الغلط ؟! اكيد تتسآئل وتقول في خاطرك هذا مهبول ؟! اقوله ثور يقول احلبه , معليه يالغالي خذني على قد عقلي وقل عني اللي تبي ,



كان من المفروض عليك تتحمل اهلك اللين الله ياخذ امانته بعد عمرٍ طويل لك ولوالدينك ومن تحب يارب , الام والابو لهم مكانه عظيمه حتى وان اساءو المعاملة معنا ,



رب العالمين يقول وجادلهم باللتي هي احسن , وصدقني والله العظيم مافي اب يكره عياله ولا ام تكره عيالها , ودليلي على هالكلام ! خل يجيهم خبر انك بالمستشفى الله لايقوله ولا يقدر عليك ان شاءالله , شف وش يصير فيهم ؟ اشهد بالله ان عقولهم تطير من الروعه , لانك مهما كان انت ظناهم ومالهم غناة عنك ,




وحط في بالك دايم ان الله مايبعد عنك شي او يأخر عنك شي الا وفيه خيره لك بالاخير , وتأكد بعد ان هالمصايب هذي اللي تجيك , فيها خير ماالله به عليم , وذكرك بعد بكلام الله , رب العالمين يقول عسى ان تكرهو شيء وهو خيرٌ لكم , عسى ان تحبو شيء هو شرٌ لكم والله يعلم وانتم لاتعلمون ,



وماتدري ! لعل المشاكل اللي انت فيها تخفيف ذنوب لك واحتمال تكون اختبار وابتلاء من الله لك , فاالله يبتليك لاجل يشوفك هل انت من اللي اذا جته المصيبه شكر واذا جته النعمه شكر ! والا من الناس اللي ان جته نعمه احيان يشكر واحيان بالخيشه , واذا جته المصيبه كفر وتذمر والعياذبالله ,


وصدقني انا عارف مقدر حالتك يعلم الله , لكن حبيت ابين لك ان العجله والتذمر والحساسيه ماوراها الا المصايب والكدر ,


انت تعامل مع اهلك بكل احترام وود , واي شي يبونه لا تقول لا وخاصه امك وابوك اعيد واكرر خاصه امك وابوك , لان الام والابو مايحبون احد من عيالهم يراددهم او يعصي كلامهم , وراح تذكر كلامي بعد عمرٍ طويل يوم تتزوج وتجيب عيال , او على الاقل حط نفسك مكان ابوك وتخيل انك تكلم واحد من عيالك ويجلس ينفخ عليك او يطول لسانه عليك ! وش تبي تكون ردة فعلك ؟! هي نفسها ردة فعل ابوك عليك الحين ,



انت عليك مجاهدة نفسك بإنك تصبر على المشاكل اللي تجيك وان اكثرت او طولت , فوالله والله انها خير تحتاج لحمد وشكر ,



وحاول ماتنزعج لا تتذمر ولا تتحسس ولاتعصب اذا بغيت شي وماقدرت تحصل عليه , والله والله انه فيه خيره لك لايعلمها الا الله , واذا تبي حياتك تستقيم ؟ برد والديك حتى وان جتك منهم مضره , واحرص على صلاتك فاوالله فيها خير لايعلمه الا قليل , وفي كل صلاة وكل سجد ادع لنفسك وادع لوالدينك ان الله يصلح شانهم ويزين امورهم ويرضى عنك وعنهم وادع لخوانك ولخواتك , فاوالله اقرب مايكون العبد بينه وبين ربه وهو ساجد , واحرص بعد على الدعاء , فلولا الدعاء ماخرج نبي الله يونس ولولا الدعاء مانجى نبي الله ابراهيم ,




اقرأ هالايات واتعظ منها !

وَلَقَدْ آتَيْنَا لُقْمَانَ الْحِكْمَةَ أَنِ اشْكُرْ لِلَّهِ ۚ وَمَن يَشْكُرْ فَإِنَّمَا يَشْكُرُ لِنَفْسِهِ ۖ وَمَن كَفَرَ فَإِنَّ اللَّهَ غَنِيٌّ حَمِيدٌ (12) وَإِذْ قَالَ لُقْمَانُ لِابْنِهِ وَهُوَ يَعِظُهُ يَا بُنَيَّ لَا تُشْرِكْ بِاللَّهِ ۖ إِنَّ الشِّرْكَ لَظُلْمٌ عَظِيمٌ (13) وَوَصَّيْنَا الْإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَىٰ وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ (14) وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا ۖ وَصَاحِبْهُمَا فِي الدُّنْيَا مَعْرُوفًا ۖ وَاتَّبِعْ سَبِيلَ مَنْ أَنَابَ إِلَيَّ ۚ ثُمَّ إِلَيَّ مَرْجِعُكُمْ فَأُنَبِّئُكُم بِمَا كُنتُمْ تَعْمَلُونَ (15) يَا بُنَيَّ إِنَّهَا إِن تَكُ مِثْقَالَ حَبَّةٍ مِّنْ خَرْدَلٍ فَتَكُن فِي صَخْرَةٍ أَوْ فِي السَّمَاوَاتِ أَوْ فِي الْأَرْضِ يَأْتِ بِهَا اللَّهُ ۚ إِنَّ اللَّهَ لَطِيفٌ خَبِيرٌ (16) يَا بُنَيَّ أَقِمِ الصَّلَاةَ وَأْمُرْ بِالْمَعْرُوفِ وَانْهَ عَنِ الْمُنكَرِ وَاصْبِرْ عَلَىٰ مَا أَصَابَكَ ۖ إِنَّ ذَٰلِكَ مِنْ عَزْمِ الْأُمُورِ (17)



في آخر الايه رب العالمين يامرنا بالصبر ووصفه الله بعزم الامور , نصيحتي لك وانا اخوك اصبر اصبر اصبر , ادري حاس بأن الصبر يطول في كثير من الاوقات , لكن لازم تعرف ان هذا الشي ماهو الا خير لك في نهاية الامر , وان كان على الدراسه ! فإنت لاحق عليها ان شاءالله , لان العلم مايخلص ولا له عمر معين , ولا تهتم لكلام الناس , لان حنا ماذبحنا غير كلام الناس واهتمامنا بكلام الناس هو اللي ضيع حياتنا ,


سو اللي في خاطرك دامه مايعارض الشرع , ولا تخلي كلام الناس السلبي يأثر عليك , وثق بالله تمام الثقه , واحسن الظن بالله دايم في كل كبيره وصغيره , واحرص واحرص واحرص على الصلاة وكثرة الدعاء , واياك واليأس واياك واليأس واياك واليأس , لانه ه اللي بدمرك فالمرتبه الاولى من بعد كلام الناس ,




والله اني متعاطفٍ معك , وودي اعطيك اكثر لكن ماودي اكثر بالهرج , ولكن الشباب ماقصرو وفيهم الخير , وان شاءالله مابنقصر معك بإذن الله ,


وبالاخير اسأل الله لك الخير والصلاح , وجعل ربي يزين امورك ان شاءالله , ان بغيت الشور حاضرين طال عمرك ,


بالتوفيق ان شاءالله