السلام عليكم ورحمة الله وبركاته

اخواني انا موظف حكومي بالمرتبة السادسه وعندي دبلوم محاسبة من كلية التقنية وايضا حصلت على بكالرويوس انتساب من جامعة الملك فيصل بتخصص إدارة أعمال

عندي خبرة 4 سنوات وافكر اروح للقطاع الخاص كونه أفضل مزايا مالية ومكافأة نهاية الخدمة وفيها تطوير أكثر

عملي الحالي مدقق حسابات

هل ترون ان الفكرة جيدة ؟

هل شهاداتي وخبرتي البسيطه جاذبة ؟ من وجهة نظركم ؟

مافيه شك مزايا القطاع الخاص أفضل بكثير من القطاع الحكومي فإذا شفت أنك قادر على تحمل ضغط العمل في القطاع الخاص توكل على الله وشهادتك وخبرتك جيدة ومطلوبه ان شاء الله
ولو جينا بنحسبها راتبك بالحكومة ما يقارب 7000 ريال لكن بالقطاع الخاص ممكن تبدأ ب 8000 ريال غير التأمين الطبي والبونص ونهاية الخدمة الافضل من القطاع الحكومي

اخوي لا تنسى موضوع الراحه النفسيه وفارق عدد الساعات واجازة الاسبوع وغيرها من اعياد

الحكومي راتبك لو اقل شوي افضل بكثير معتمد بجميع البنوك والجهات

في الرغبة بشراء سيارة او تملك عقار مباشرة

بينما القطاع الخاص في حال عد وجود اتفاقيات مع البنوك لن تحصل على اي مزايا

واستخير عسى الله يوفقك

الله يعطيكم العافية

اذا تتقن اللغة الانجليزية لا تذهب الا وتحصل راتب فوق 13000 تحصل في شركات اجنبية

لا ذهب للقطاع الخاص
ببساطة راتب الخاص عالي كون متطلبات القطاع الخاص من جهد اكثر
يمكنك الاتجاه الى التدريب على برامج المحاسبة مثلا وحده التدريب دخله عالي
دورة وحده كمبتدئ ممكن تاخذ عليها 1000 ريال
طبعا تحتاج تشتغل على نفسك مثل تعطي كم دورة مجانية .. الخ

بسم الله عليك
أنت تتكلم من جدك ؟؟!!

الشركات مرمطه و قلة حيا و خصميات وكرف و إذا استغنو عنك شاتوك مع الباب و غير مؤسوف عليك
و إلا إذا أحد لقی واسطه شالوك وحطوه بدالك

بعدين هالحين الشركات صارت ألعن من الحكومه الوظائف الزينه ما أحد يدخلها إلا بواسطه
و رؤساك أجانب يعلمونك معنی الاهانه و الشركات تقدس الأجنبي أما السعودي .... ماني بقايل أفضل

تعوذ من ابليس و خلك في وظيفتك و حب يدك و الحمد ربك غيرك يتمنها
بعض العاطلين يعرض 40 ألف أو 50 ألف جامعها من رواتب الشركات عشان أحد يتوسط له في المرتبه الرابعة !!
كيف و أنت بالمرتبة السادسه

بعدين أنت قارن بين ميزات الحكومة و الشركه
الحكومي يقدر ياخذ قروض و سيارات ، الشركة لازم معتمده عند البنك ( و إذا كانت معتمده عند البنك ما تقدر تاخذ قرض إلا بعد خدمه 3 سنوات أو أكثر حسب سياسة الشركة ، شركة ابن لادن متفقه مع البنوك ما تعطي موظفيها قروض إلا بعد 5 سنوات )
الحكومه دوام 6 ساعات ، الشركات دوام 8 ساعات و أكثرالشركات تداوم 6 أيام

الحكومه يعطونك إجازات بالهبل ، الشركات اجازة الأعياد يومين بالكثر 4 أيام

الحكومه فيها أمان وظيفي و مديرك ما يقدر يفصلك ، الشركات متی ما استغنو منك طردوك
الحكومه لها علاوات و ترقيات و سلم رواتب ، وأنت تعرف و ش إلي لك و إلي ما هو لك ، الشركات يمكن تقعد سنين علی ما يزيدون راتبك

واحد من أهلي سائق بالتربية توظف قبل 9 سنوات راتبه كان 1800 ريال كان معه رابع ابتدائي صبر وكمل دراسته وتخرج من الثنوي و توه داخل الجامعه و هالحين راتبه فوق 7000

فرضاً أنت راتبك الآن 6500 الشركه راتبها 8500

إسأل نفسك تبي تجازف بالراحه و الاجازات و الأمان و الترقيات عشان 2000 ريال ؟؟!!

فيه هيئات مثل ( هيئة الغذاء والدواء - هيئة الاستثمار - الهيئة العليا لتطوير مدينة الرياض - الهيئة العليا للسياحه ) امان وظيفي ومميزات ممتازه انصحك بالتركيز عليها

بصراحة القطاع الخاص من وجهة نظري افضل بكثير وبتكلم عن الشركة المتوظف فيها انا الآن اذا انت مثلا جامعي راح يكون راتبك الاجمالي تقريبا 10 ونص، الاساسي 7500 + بدل سكن ثلاث رواتب + تأمين طبي يغطي 90% من مستشفيات المملكة + بدل نقل + زيادة سنوية على حسب ادائك + بونص ودورات تدريبية داخل الشركة او خارجها + انتدابات.
بس عندنا مشكلة بالقطاع الخاص وهي ساعات العمل مملة جداً ويروح يومك كله وانت بمكتبك بعكس الحكومي الساعة 2 وهو في البيت واعتقد مافيه مميزات في الحكومي الا ساعات الدوام فقط

ولا تنسى راحتك النفسيه اهم شئ لا يهمك لا راتب ولا غيره اذا انت مرتاح نفسيا في وظيفتك الحالية فأنصحك شيل فكرة الانتقال الى وظيفه ثانية

ربي يوفقك ويسعدك دنيآ وآخرة ،،،

يرفع مازلت متردد وافكر جديا بذلك