السلام عليكم ورحمة الله وبركاته ..
بسم الله الرحمن الرحيم ..

اول شي اعتذر عن الاسم المستعار لكن والله كل ماحط اسم يقول مستخدم ..
المهم ياشباب وياخوان انا شفت مواضيع واعجبتني وحبيت ادخل باب التجاره لأنها تستهويني .
وصراحه ابغى مشروع صغير وان شاء الله اكون ضامن النجاح , والمشكله رأس مالي , بحدود 2000 ريال , ومافي واحد بدا من القمه , وانا تعبت من العطله بالبيت وقلت ابدا مشروع , برأس مالي الي أملكه , واكون ضامن المشروع انه يغنيني , عن كل شي , والله ماكتبت الموضوع الا من القهر , والطفش , لكن الله المستعان , وان الله مع الصابرين ,
والي ابغاه مشروع ابدأ بآلفين ريال , واكون ضامن بأذن الله النجاح , تكفون يأهل الخير ,
ومعاكم اخوكم محمد الطآئف ..

اخوي نصيحه لك بحكم انك في الطايف مر علي القرى المجاورة لك وخذ البضايع اللي زارعينها مثل كوسه والطماطم وغيرها ونزلها جدة وبيعها وبعدين رجع حق صاحب الوادي وخذ حقك او اشتغل في الحلقه بالطايف

حياكم الله
مشروع بـ 2000 ريال
اقترح عليك تعمل لك مشروع
ماادري تبيني اذكره عالعام او ارسلك خاص افضل
اذا عجبك المشروع لاتنسى تدعيلي ان الله يرزقني بشريك المبروك

بما انه راس مالك 2000 خير وبركه انا أقول اشتغل بالخضار فيه خير مثل ما قال اخوي سهم العنا


الله يوفقك ويرزقك

اقول لك على مشروع طالما انت فى الطائف
من فتره كنا نعمل عمره فى مكه واحنا راجعين على الرياض بالسياره وعند الطائف افتكرنا اننا نسينا نشترى ماء زمزم من مكه وبحثنا على جوانب الطريق قبل ما نطلع الهدا وجدنا يمنين يبعوها منتهى الاستغلال بضعف ثمنها فى مكه لدرجه اننا وجدناها فى الرياض ارخص
لذا انصحك تفكر فى شراء مياه زمزم ووتضعها فى سياره على الطريق وتبيعها والمكسب باذن الله ممتاز
بالتوفيق ان شاء الله

السلام عليكم

أقترح عليك تسوي بسطة بليلة وبطاطس مشروع مناسب لرئس مالك , الدخل ممتاز .
وبالتوفيق

مشكورين والله افتدوني الله يجعلها في موازين حسناتكمم
زرقاء اليمامه اسال الله ان ينفع بك , لو تذكره على العام عشان الكل يستفيد والله يعطيك الف عاففيه

الحين الفكره الي دخلت راسي الخضار بس ودي بافكار ثانيه لو تكون ودخلها يكون حلو

كشك البليلة يطلع ذهب بعد الله
خضت تجربة بيعها من المنزل بحكم إني إمرأة فكنت أطلع الربح يومياً ولله الحمد
وإلى الآن أتمنى فتح كشك بليلة بمركز تجاري أو على الشارع مثل كشك الكوفي
والله يوفق الجميع

الله يوفقك راس مالك 2000 تقريبا اشوف الخضره مناسبه لك ومع الايام راح تتطور شوي شوي بسس للاسف اغلبنا يقول ماابغاها لان فيها قومه مع الصبح توكل ع الله انا مثلك بدرس مشروع واتوكل ع الله