السلام عليكم ورحمة الله وبركاته ..

كالعاده اعزائي افكر بحالي وانقطاعي عن دراستي وان الحل امتلاك سكن وبمنحه حكوميه..

وابدا ابحث بروتين ممل عن طريقة اقدم فيها ع منحه ملكيه وينتهي بي الامر ابحث عن وظيفه الكترونيه اترزق منها

خصوصا وان الضمان مايسد حاجه نفر فما بالكم بمصروفات مطلقه ومعاها ولد مايجيه مصروف

انا بقريه مقطوعه عن العالم تقريبا ..

عندنا مدارس البنات مايبيعونها فيها الاشيبس و بسكويتات وعصير

فكرتي ابداء اسوي ساندوتشات خفيفه او معجنات واعطيها مشرفة المقصف وتاخذ نسبه ..

وفكرتي الثانيه اسوي حلو وحطه بالبقاله ونفس الشي اعطي البايع ربح من المردود..

وفكرتي الثالثه اني اكون وسيطه اطلب من مواقع التسوق للناس اللي ماتعرف تطلب وكذا ..

طبعا كلها مقدور عليها ومافيها راس مال كبير

اتمنى تساعدوني باتخاذ القرار ايهم الافضل وللعلم فالطبخ الحمدلله طبخي ممتاز ..

الشي الاخير في حال افكاري ماتنفع اشوف دايما اعلانات التداول وهالشغلات لكن اخاف انها مو مضمونه

تنصحوني ادخل فيها .؟

ديرتنا بحاجه مشاريع كثيره منها مغسله ملابس ومكتبه وسوق نسائي وصيدليه وامور كثيره لكن كلها يبيلها راس مال ضخم ما املكه


انتظر ارائكم اتشجع وابداء او لا

حياك الله
افكارك ممتازة بس فكرة الطبخ افضلهم
لان الطبخ ارباحه مبروكة
لانك تتعبين وتكسبين المال من عرق جبينك
وانتي ابدئي بالمدرسه وبعدها بفترة اتوسعي اكثر وبيعي في البقالة
وعقبال مايصير عندك مصنع حلويات ومأكولات تصل منتجاتك لاهالي القرية والقرى المجاورة
الله يوفقك ويرزقك الرزق لواسع آمين

ما دام متميزة بالطبخ

فتوكلي على الله وإبدأي الطبخ من منزلك بلا تكاليف كثيرة
وطوري نفسك بتعلم طبخات جديدة وتحسين مذاقها وجودتها

فيه مشروع لدعم المشاريع الصغيرة للنساء تابع لمؤسسة سليمان الراجحي
هذا موقعهم

http://jana-sa.org/

ممكن تتواصلين مع ارقامهم واطلبي الدعم والإستشارة

والله يوفقك ويكفيك بحلاله

لا تنسينا من صالح الدعاء لأخيك
بخيري الدنيا والأخرة

الله يرزقك من واسع فضله ..مادمتي ماهرة في الطبخ صدقيني سوف

يكون لك دخل شهري ممتاز جدا ان اجدتي التسويق لذلك

حاولي التواصل مع المعلمات وعرض وجبة افطار يومي لهن بمبلغ شهري

كذلك مدارس الاولاد فالمعلمين يبحثون عن الطبخ الجيد حتى وان كان بسعر

مرتفع ..

بعد ذلك حاولي التعاقد مع المقاصف المدرسية لتأمين افطار الطلاب اوالطالبات

ان استطعتي
كذلك ابحثي عن الدوائر الحكومية التي بها عدد من الموظفين وقدمي لهم العرض

صدقيني بيكفيك فطور المعلمين والمعلمات

تحياتي

جزيتم خيرا جميعا ..

فعلا ردودكم شجعتني اشكركم ع دعمي ..

خدمة شي .. حظيت الرابط بالمفضله وراح ارجعله ..

محب الخيل .. شكرا جزيلا لفكرة الافطار اليومي للمعلمات اذا عندك وصفات معينه تشوفها تناسب اطرحها فضلا لا امرا

اذا عندكم افكار ممكن تسند فكرتي اتمنى طرحها مثل اطباق معينه تشوفونها مطلوبه ..

واذا عدكم اقتراح لطريقة البيع بمعنى الصحون والكميات ..

مثلا الكلوب ساندوش راح يمشي كثير لكن ماعرف اذا فيه نسبة ربح لو ابيع بريال .. ؟؟

مابغى ابيع اكثر من ريال لان اعرف ماراح يمشي سوقه زي لما يكون بريال ..

وافكر بالدونات و ممكن ايام معينه بالاسبوع شاورما او ميني بيتزا او كب كيك وكذا

وكمان افكر ب كب كيك مالح بالخضار والجبن اتوقع بيمشي ..

وابغى ارائكم هل احتاج معدات معينه توفر لي الوقت .. الان افكر بعجانه لان اكيد بتساعدني ..

سخانة ساندوتش لو مافي ميكرويف بمقاصف المدارس ..

انا مابغى احوس كثير بحط اصناف معينه لكل يوم بالاسبوع مبدئيا لان اكيد يبغالي فتره لين انظم نفسي مع الشغل

وبعدها اشوف الاصناف المرغوبه واستقر عليها

بعد ابي اسال من فين اجيب اوراق الكب كيك بكميات كبيره اقصد وين احصلها بسوبر ماركت ولا بمحلات معينه

أمتلكي فقط مالك البسيط و تشجيعك لنفسك
وأفتحي صفحة لك بالانستقرام , و أبدي مشروعك البسيط و حبه حبه أعلني لنفسك بصفحات المشاهير
الانستقرام فتح مجال لناس و غير أحوال العالم ..

أهم شي الأحترافية في الصورة و العمل المتقن للأكل وجودته ..
أعملي لك كروت خاصة وكل ماخرجتي وزعيها ..

و الأول و الأخير مايهم الناس السعر قد مايهمهم الشكل و الطعم , و جودة الصورة و احترافيتها
غيرت أحوال الناس بشكل ماتتصورينه


الله يوفقك و يسهل لك رزقك .

شكرا عزيزتي لكن انا سبق وقلت بقريه مقطوعه مسالة الشحن والتوصيل صعبه جدا او مستحيله ..

حابه اسال بعد هل احتاج تصريح من البلديه و ايش رايكم يكون لي طاوله بالساحه ام بنفس المقصف

عن نفسي خارج المقصف افضل اولا عشان مايتلخبط مردودي مع مردود المقصف ثانيه عشان مادخل بمشاحنات مع مسؤلة المقصف لو حست البنات مايشتروا منها مثل اول ..

كمان افكر ب ماكينة ايسكريم فواكه اللي احط فيها فواكه تطلع الايسكريم لانها مفيده وصحيه 100%

هل تنجح ؟ طبعا هي موجله شوي لين انظم نفسي واشوف المدراس بتوافق ع طلبي او لا

أبدأي بدايات بسيطة مثل

تقومي بجمع وصفات طبخ مميزة من النت
وتأرشيفها الحلويات لوحدها
والوجبات الرئيسية كمجموعة وتبدأي التطبيق
والممارسة

اعرضي على جيرانك إذا كان عندهم عزايم وجمعات تخبريهم أنك تتكفلي بحلويات أو عشاء أو غدا
أتمنى تتخصصي بشيء معين حتى تتقنيه وتكوني مشهورة فيه
وبعدها أصناف اخرى

أتمنى الأخوات يتفاعلوا معك ويفيدوا بعضكم البعض

المطبخ المنزلي كنز لايقل عن مطابخ المطاعم
لكن وين النساء عنه

الرابط اللي اعطيتك إياه واطرحي كل استفساراتك ممكن يقدمون لك دعم معلوماتي واستشارة
فلا تأجلي التواصل قد تحصلين على إرشاد وتوجيه

والله يوفقك ويستر عليك

[align=center]
المشاريع اللي قلتيها ما تحتاج راس مال .. توكلي وابدأي بدون تردد ..
لازم تبدأي عشان تتوضحلك باقي الأمور والله يوفقك ويفتح لك أبواب رزقه ..
[/align]