01-02-2011, 12:49 PM
|
 |
عضو نشيط
|
|
تاريخ التسجيل: Aug 2007
المشاركات: 178
معدل تقييم المستوى: 36
|
|
السلام عليكم ورحمة الله وبركاته..
شباب هذي اول مشاركة لي في المنتدى.. ووالله اني مسجل بس عشان اعلمكم وش صار معي وتستفيدون وقسم بالله هذا اللي صااار.. لأني أشوف ناس يتكلمون عن المفاضلة وكلام كثير ..
وأعذروني على الإطاااااااااالة ..
اقول لكم قصتي :
انا الحمدلله طلع اسمي في ديوان المظالم وهيئة التحقيق.. طبعا في هيئة التحقيق كملت اوراقي ووقعت على اقرار انو تسقط جميع المفاضلات من ديوان الخدمة.. وقعنا وخلصنا..
يوم رحت لديوان المظالم بالرياض اللي هو يوم السبت 25/2 عبيت اوراقي وعطوني ورقة اقرار هذا نصة بالضبط :
( إقرار)
أقر بأني تقدمت بموجب مؤهلي للمفاضلة على وظائف ديوان المظالم المجراة بتاريخ 16/7/1432 هـ وحتى 22/7/1432هـ الخاصة بالمرتبة السادسة , ولقبولي المبدئي بالديوان , ولعلمي بأن المفاضلة ستكون من قبل وزارة الخدمة المدنية , لذا فأني أتنازل عن أي طلب تقدمت به عن طريق إعلانات وزارة الخدمة المدنية والغاء سجلي من جميع المفاضلات .
وعلى ذلك جرى التوقيع ,,
طبعا كان ودي ارفعه صورة بس ماعندي سكنر..
المهم شكيت في التاريخ وقلت قبل لأ أوقع بروح أسأله وجيته ولقيت عنده زحمه قلت خلني أسأله اول عن المفاضلة ووضعي في هيئة التحقيق هل يتكنسل رقمي فيها ؟
سألته : قال نعم يتكنسل أسمك في هيئة التحقيق بمجرد مايدخلون اسمك في سستم الخدمة المدنية عشان المفاضلة حتى لو ما قبلت قبول نهائي !!!
انا انصدمت ونسيت اسأله عن الباقي قلت ياخي مايصير.. قال هذا من عند الخدمة انا موظف فقط ؟
المهم خذيت اوراقي ودزيت لوزارة الخدمة المدنية اللي على طريق الملك فهد.. سألت السكيورتي قال أطلع لقسم الأحتياج لقيت موظفين 2 سألت الأول عن نظام المفاضلة وهل يسقط أسمي اذا كنت مقدم على وظيفتين في وقت واحد .. قال ما أدري .. قام وسأل خويه اللي جنبه قال برضو ما أدري.. رح لفرع الوزارة اللي بعدنا بأشارتين..
قلت صبر جميل اذا الوزارة ماعرفت الفرع بيعرف ؟
المهم رحت للفرع وقابلت واحد بشووش ومحترم جدا وفي قسم التوظيف وعلى فكرة لقيت اوراق المرتبه الرابعة على مكتبه ..سألته عن موضوعي قام يحك راسه .. قال والله مدري.. وقام معي وراح يسأل اخوياه اللي معه في الأقسام الثانية والله نصهم يا أخوان مايدرون !!! وراح لأخر واحد وشكله فاهم ..يقول الأكيد أنه بسقط أسمه من موقع الخدمه المدنية مليون بالمية.. ويقول نحط برنامج خاص لديوان المظالم وبرنامج خاص لهيئة التحقيق ونكتب فيه أسماء المرشحين ودوراتهم وخبراتهم والجهاز يرتب أسمائهم حسب الأفضلية !!
قلت طيب متى تطلع الأسماء ؟؟ قال شف بالنسبة للسادسة يمكن من شهر الى شهر ونصف..
قلت اوف ليه ؟
قال لأن مافيه الا 4 او 5 موظفين هم اللي يشتغلون على قسم الترشيح..
قفل جوي منهم وطلعت..
واللي يبي يتأكد يمر فرع وزارة الخدمة بالرياض ويطلع للدور الثاني قسم بالتوظيف.
وأعتذر عن الإطالة مررة ثانية.. وهذا اللي صار معي حرفيا.. ويعلم الله أني ماسجلت في الموقع الا عشان أقولكم وش صار..
ودعواتكم لي بالقبول في هيئة التحقيق لأني شكلي بسحب على ديوان المظالم الفاشل..
|
العرض العادي
